ឯកឧត្ដម សៅ សុភាព បានអញ្ជើញជាអធិបតីក្នុងពិធីចុះហត្ថលេខាលើអនុសារណៈនៃការយោគយល់ ស្តីពីកិច្ចសហប្រតិបត្តិការក្នុងវិស័យបរិស្ថាន

ក្នុងពិធីចុះហត្ថលេខានេះមានការអញ្ជើញូចូលរួមពីឯកឧត្តម អស់លោក ជាថ្នាក់ដឹកនាំក្រសួងបរិស្ថាន លោកជំទាវ ជា សិរីជំនួយការទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា ឯកឧត្តម រត័្ន សុវណ្ណរៈ អគ្គនាយកត្រួតពិនិត្យ ធនាគារជាតិនៃកម្ពុជា លោកបណ្ឌិត អ៊ិន ចាន់នី ប្រធានសមាគមធនាគានៅកម្ពុជា បណ្ឌិត Lee Sang មន្ត្រីទទួលបន្ទុកសន្តិសុខស្បៀង និងបរិស្ថាន នៃ USAID និងឯកឧត្តម លោកជំទាវ លោកឧកញ៉ា លោក លោកស្រី ភ្ញៀវកិត្តយសជាតិនិងអន្តរជាតិជាច្រើននាក់។

ពិធីចុះហត្ថលេខានេះ មានគោលបំណងពង្រឹង និងអភិវឌ្ឍន៍កិច្ចសហប្រតិបត្តិការ ហិរញ្ញវត្ថុប្រកបដោយចីរភាពក្នុងវិស័យធនាគារ សំដៅជួយគាំទ្រដល់កិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិរក្សដោយចីរភាព ក៏ដូចជាការឆ្លើយតបទៅនឹងការប្រែប្រួលអាកាសធាតុ ដែលជាសក្ខីកម្មមួយបង្ហាញអំពីកិច្ចសហប្រតិបត្តិការជាផ្លូវការ ដែលបានបន្តរវាង រាជរដ្ឋាភិបាលកម្ពុជា ជាមួយវិស័យឯកជន ធនាគារ ដើម្បី​ចូលរួមអនុវត្តនូវយុទ្ធសាស្រ្តចតុកោណរបស់រាជរដ្ឋាភិបាល ដើម្បីប្រទេសកម្ពុជា និងការការពារភពផែនដី និងដើម្បីជាប្រយោជន៍របស់ធនាគារជាសមាជិកក្នុងការទាក់ទាញមូលនិធិអន្តរជាតិនានាជាមួយនឹងអត្រាការប្រាក់ទាបផងដែរ។