(សៀមរាប)៖ យោងតាមអនុសាសន៍ណែនាំរបស់សម្តេចតេជោ ហ៊ុន សែន ជូនលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា ឱ្យមានការកែលម្អផ្លូវសម្តេចវិបុលបញ្ញា សុខ អាន (ផ្លូវ៦០ម៉ែត្រ) ទើបអាជ្ញាធរជាតិអប្សរា បានប្រកាសរកនិស្សិតដែលមានសមត្ថភាពបញ្ចេញស្នាដៃលើគម្រោងកែលម្អផ្លូវនេះ ដែលបញ្ចូលទាំងគំនិតអភិវឌ្ឍន៍ និងអភិរក្ស។
ជាក់ស្តែង នៅថ្ងៃទី០២ ខែកញ្ញា ឆ្នាំ២០១៩ និស្សិតឆ្នាំទី៤នៃសាកលវិទ្យាល័យភូមិន្ទវិចិត្រសិល្បៈ សាកលវិទ្យាល័យន័រតុន សាកលវិទ្យាល័យវេស្ទើន សាកលវិទ្យាល័យបញ្ញាសាស្ត្រ វិទ្យាស្ថានបច្ចេកទេសកម្ពុជា និងវិទ្យាស្ថានជាតិបណ្តុះបណ្តាលបច្ចេកទេស មកពីរាជធានីភ្នំពេញចំនួន ៤៥នាក់ បានជួបជុំគ្នាស្តាប់បទបង្ហាញពីអ្នកជំនាញអាជ្ញាធរជាតិអប្សរា និងចុះទៅត្រួតពិនិត្យទីតាំងផ្ទាល់ ដើម្បីត្រៀមខ្លួនបញ្ចេញគំនិតក្នុងការប្រកួតប្រជែងពីគម្រោងកែលម្អផ្លូវសម្តេចវិបុលបញ្ញា សុខ អាន ដែលមានរយៈពេលមួយខែ ដោយដំណើរការចាប់ពីថ្ងៃទី០២ ខែកញ្ញា ឆ្នាំ២០១៩ តទៅ។
ចំពោះជ័យលាភីនឹងទទួលបានទឹកប្រាក់ចំនួន ១០០០ដុល្លារ សម្រាប់លើកទឹកចិត្ត ហើយតាមរយៈការប្រកួតប្រជែងបញ្ចេញស្នាដៃនេះ គឺជាការផ្តល់ឱកាសឱ្យនិស្សិតបានបញ្ចេញស្នាដៃខ្លួនក្នុងការងារអភិវឌ្ឍន៍ ដើម្បីអភិរក្សនៅក្នុងតំបន់អង្គរផងដែរ។
តាមការឱ្យដឹងពីលោក សោម សុផារ៉ាត់ មន្ត្រីបច្ចេកទេសនាយកដ្ឋានទ្រទ្រង់បច្ចេកទេស និងគម្រោងអន្តរវិស័យ បានឱ្យដឹងថា កំណាត់ផ្លូវដែលត្រូវកែលម្អគឺចាប់ពីរង្វង់មូលស្រីគ្រប់លក្ខណ៍ទៅដល់ផ្លូវហ្សាលឌឺហ្គោល ទល់មុខមន្ទីរពេទ្យគន្ធបុប្ផា ដែលត្រូវកែច្នៃឱ្យមានសោភ័ណភាព សុវត្ថិភាព និងផាសុកភាព។
លោក សុផារ៉ាត់ បានបន្តថា គម្រោងកែលម្អផ្លូវនេះ គឺក្នុងបំណងស្ថាបនាឱ្យកំណាត់ផ្លូវដ៏មមាញឹក ក្នុងការបម្រើសេវាកម្មទេសចរណ៍ ក៏ដូចជាការឆ្លងកាត់របស់ប្រជាជន ក្លាយជាផ្លូវគំរូមួយសម្រាប់ខេត្តសៀមរាប ដោយការរៀបចំឱ្យមានសួនច្បារ ផ្លូវដើរ ផ្លូវកង់ ការដាំដើមឈើ កែលម្អចិញ្ចើមថ្នល់ឱ្យស្អាត ធ្វើឱ្យប្រឡាយមានទឹកជាប្រចាំ ដើម្បីទាក់ទាញទេសចរ និងការធ្វើលំហាត់ប្រាណរបស់ប្រជាជន៕
