នាព្រឹកថ្ងៃទី០៧ ខែ កញ្ញា ឆ្នាំ ២០១៩ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំមន្ត្រីជំនាញចុះពិនិត្យស្ពានបាឡេ ភូមិទួលរការ ឃុំពាមកោះស្នា ដែលពីថ្ងៃទី០៦ ខែកញ្ញា ឆ្នាំ២០១៩ ម៉ោង ១៨.៣០នាទីល្ងាច ករណីទឹកហូរខ្លាំង បណ្ដាលឱ្យបាក់ស្រុតស្ពានមួយកន្លែង (បាក់សសរជើងទ្រស្ពានអស់ចំនួន១) នៅស្រុកស្ទឹងត្រង់ ។
តាមរបាយការណ៍របស់មន្ត្រីជំនាញបានឲ្យដឹងថាដើម្បីឱ្យចរាចរណ៍លើស្ពាននេះធ្វើដំណើរបាន ក្រុមបច្ចេកទេសកំពុងតែសិក្សានិងរៀបចំសម្ភារៈដើម្បីជួសជុលស្ពាននេះបណ្ដោះអាសន្ន សូមគូសបញ្ជាក់ថាបច្ចុប្បន្ននេះស្ពាននេះអាចធ្វើចរាចរណ៍បានតែថ្មើរជើង និងទោចក្រយានយន្តតែប៉ុណ្ណោះ ដាច់ខាតមិនអាចមានរថយន្តឆ្លងកាត់បានទេ ប្រសិនបើមានរថយន្តឆ្លងកាត់នោះបណ្ដាលឲ្យស្ពាននេះដាច់តែម្តង។
ក្រោយទទួលបានបទបញ្ជាររបស់ឯកឧត្តម អភិបាលខេត្តភ្លាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានចាត់ឲ្យ កម្លាំងនគរបាល នៃអធិការដ្ឋាននគរបាលស្រុកស្ទឹងត្រង់ ចុះត្រួតពិនិត្យ និងបានដាក់ផ្លាកសញ្ញាហាមឃាត់ជាបណ្ដោះអាសន្ន និងយាមការពារមិនអោយប្រជាពលរដ្ឋបើករថយន្តឆ្លងកាត់ឡើយ ដើម្បីជៀសវាងគ្រោះថ្នាក់កើតឡើងជាយថាហេតុ
ឯកឧត្តមអភិបាលខេត្ត បានស្នើដល់បងប្អូនប្រជាពលរដ្ឋ ត្រូវឆ្លងកាត់ស្ពាននេះ មានការយោគយល់ចំពោះការស្ទះចរាចរណ៍នេះ ។
