រាជធានីភ្នំពេញ៖ កិច្ចប្រជុំបណ្ដាញស្ដីពីបច្ចេកវិទ្យាព័ត៌មាន និងសារគមនាគមន៍សម្រាប់វិស័យអប់រំ(ICT4E) គឺជាវេទិកាពិភាក្សាលើអន្តរាគមន៍នានាពាក់ព័ន្ធICT ក្នុងគោលបំណងរួមចំណែកក្នុងការអភិវឌ្ឍ និងពង្រឹងគុណភាពអប់រំ នៅកម្ពុជា ធានាការប្រកួតប្រជែងរបស់កម្ពុជាក្នុងសេដ្ឋកិច្ចឌីជីថល និងឧស្សាហកម្មជំនាន់ទី៤។
វេទិកានេះអនុញ្ញាតឱ្យភាគីរដ្ឋាភិបាល ដៃគូអភិវឌ្ឍ អង្គការជាតិ អន្តរជាតិ និងវិស័យឯកជនដែលបាននឹងកំពុងប្រើប្រាស់បច្ចេកវិទ្យាព័ត៌មាន និងសារគមនាគមន៍ សម្រាប់ការអប់រំ នៅក្នុងប្រទេសកម្ពុជា ធ្វើបច្ចុប្បន្នភាពពិភាក្សាផ្តោះប្តូរយោបល់កំណត់បញ្ហាប្រឈម និងស្វែងរកដំណោះស្រាយ និងរួមគ្នាបង្កើតកិច្ចសហការ និងកិច្ចអភិវឌ្ឍនានា។ មិនតែប៉ុណ្ណោះ កិច្ចប្រជុំនេះ បើកទូលាយសម្រាប់អង្គការជាតិ/អន្តរជាតិ និងវិស័យសាធារណៈ/ឯកជនដែលធ្វើ ការលើការអភិវឌ្ឍ បច្ចេកវិទ្យាព័ត៌មានក្នុងវិស័យអប់រំ។
កម្មវិធីនេះត្រូវបានរៀបចំឡើងក្រោមអធិបតីភាព លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា ដោយមានការចូលរួមពីសំណាក់អង្គការជាតិ អន្តរជាតិ វិស័យសាធារណៈ និងឯកជន ដៃគូអភិវឌ្ឍប្រមាណជាង៤០ស្ថាប័ន។ ក្នុងឱកាសនោះលោកជំទាវ បានវាយតម្លៃខ្ពស់ចំពោះកិច្ចសហការរវាងនាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡា អង្គការទិន្នន័យដើម្បីការអភិវឌ្ឍ និងបណ្ដាញ ICT សម្រាប់ការអភិវឌ្ឍ (ICT4D) ក្នុងការរៀបចំកម្មវិធីកិច្ចប្រជុំនេះឡើង។ ក្នុងឱកាសនោះដែរ លោកជំទាវបានបានមានប្រសាសន៍ថា បច្ចុប្បន្នការអប់រំបែបឌីជីថល កំពុងត្រូវបានចាត់ទុកជាអាទិភាពសំខាន់សម្រាប់ការអប់រំ៕
១១ កញ្ញា ២០១៩ | មជ្ឈមណ្ឌលដាកូនី រាជធានីភ្នំពេញ