ឯកឧត្តមអភិបាលខេត្តតាកែវ បានបើកកិច្ចប្រជុំបន្ទាន់ជាមួយអយ្យការ និងសាលាដំបូងខេត្តព្រមទាំងសមត្ថកិច្ចពាក់ព័ន្ធករណី ការប៉ុនប៉ងធ្វើរដ្ឋប្រហាររបស់ទណ្ឌិត សម រង្សី

សូមបញ្ជាក់ដែរ កាលពីនៅរសៀលថ្ងៃព្រហស្បតិ្ត ១៣រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែកញ្ញា ឆ្នាំ២០១៩ នៅទីស្តីការក្រសួងយុត្តិធម៌ ឯកឧត្តម អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានដឹកនាំកិច្ចប្រជុំពិភាក្សាលើការពង្រឹងសន្តិសុខសង្គម។ កិច្ចប្រជុំ ដែលមានការចូលរួមពីថ្នាក់ដឹកនាំក្រសួងយុត្តិធម៌ ប្រធានសាលាដំបូង និងព្រះរាជអាជ្ញាអមសាលាដំបូងទូទាំងប្រទេស ត្រូវបានរៀបចំទ្បើងដើម្បីពិនិត្យ និងពិភាក្សា លើបញ្ហាស្ថានការណ៍សន្តិសុខសង្គម ដើម្បីរិះរក និងដាក់ចេញនូវវិធានការរួមមួយចំនួន ក្នុងការពង្រឹងការអនុវត្តច្បាប់ តាមរយៈការចាត់វិធានការច្បាប់លេីសកម្មភាព ឬទង្វើទាំងទ្បាយណាដែលប៉ះពាល់ដល់សន្តិសុខជាតិ សំដៅធានាបាននូវសន្តិសុខប្រទេស សណ្តាប់ធ្នាប់ សាធារណៈ និងសុវត្ថិភាពសង្គម។

បើយោងតាមច្បាប់ក្រមព្រហ្មទណ្ឌ មាត្រា ៤៥១៖ បទឧបឃាតឧបឃាត គឺជាការប្រព្រឹត្តអំពើហិង្សាមួយ ឬច្រើន ក្នុងគោលបំណងបង្កឲ្យមានគ្រោះថ្នាក់ ដល់ស្ថាប័ននៃព្រះរាជាណាចក្រកម្ពុជា ឬ នាំឲ្យមានការប៉ះពាល់ដល់បូរណភាពនៃដែនដីជាតិ។

ឧបឃាត ត្រូវផ្ដន្ទាទោសដាក់ពន្ធនាគារពី ១៥ (ដប់ប្រាំ) ឆ្នាំ ទៅ ៣០ (សាបសិប) ឆ្នាំ។
មាត្រា ៤៥២៖ ស្ថានទម្ងន់ទោសដែលទាក់ទងទៅនឹងជនល្មើសឧបឃាត ត្រូវផ្ដន្ទាទោសដាក់ពន្ធនាគារអស់មួយជីវិត កាលបើអំពើនេះត្រូវបានប្រព្រឹត្តដោយអ្នករាជការសាធារណោះ។

និងមាត្រា ៤៥៣៖ បទរួមគំនិតក្បត់
អំពើរួមគំនិតក្បត់ គឺជាគម្រោងដែលបង្កើតឡើងដោយមនុស្សច្រើននាក់ ដើម្បីប្រព្រឹត្តឧបឃាត កាលបើគម្រោងនេះត្រូវបានសម្ដែងចេញជារូបរាងច្បាស់លាស់ ដោយអំពើជាក់ស្ដែងមួយ ឬច្រើន ។
ការរួមគំនិតក្បត់ត្រូវផ្ដន្ទាទោសដាក់ពន្ធនាគារពី ៥ (ប្រាំ) ឆ្នាំ ទៅ ១០ (ដប់) ឆ្នាំ។ ត្រូវផ្ដន្ទាទោសដាក់ពន្ធនាគារពី ១០ (ដប់) ឆ្នាំទៅ ២០ (ម្ភៃ) ឆ្នាំ ប្រសិនបើបទល្មើសនេះ ត្រូវបានប្រព្រឹត្តដោយអ្នករាជការសាធារណៈ ៕