ឯកឧត្តម ជាវ តាយ អភិបាលនៃគណៈអភិបាលខេត្ត អមដំណើរដោយឯកឧត្តម ប៉ិល កុសល អភិបាលរងខេត្ត និងមន្ត្រីជំនាញរួមជាមួយអាជ្ញាធរមូលដ្ឋាន នៅរសៀលថ្ងៃពុធ ១១កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៩ ខែតុលា ឆ្នាំ២០១៩ បានអញ្ជើញចុះពិនិត្យ និងជំរុញដំណើរការសាងសង់ផ្លូវបេតុង១ខ្សែហៅផ្លូវម្លប់ឫស្សី ដែលតភ្ជាប់បំបែកចេញពីផ្លូវជាតិលេខ៣ ស្ថិតនៅភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត។ ជារួមគម្រោងផ្លូវ១ខ្សែនេះជាប្រភេទផ្លូវបេតុងសសៃដែក មានប្រវែងជិត៤០០ម៉ែត្រ ទទឹង៨ម៉ែត្រ មានកម្រាស់ ០,១៥ម៉ែត្រដោយ ប្រើប្រាស់ថវិកា បដិភាគ៥០បូក៥០រវាងការចូលរួមពីសប្បុរសជននិង មូលនិធិសង្កាត់ក្នុងឆ្នាំ២០២០។
ឯកឧត្តម ជាវ តាយ បានណែនាំជំរុញដល់អាជ្ញាធរក្រុង និងសង្កាត់ព្រមទាំងមន្ត្រីជំនាញពាក់ព័ន្ធរួមនឹងសប្បុរសជន និងប្រជាពលរដ្ឋត្រូវធ្វើយ៉ាងណាសហការគ្នាឱ្យបានល្អ ដើម្បីជំរុញដំណើរការសាងសង់ផ្លូវ១ខ្សែនេះបានលឿនឆាប់រហ័សមុនដំណាច់ខែតុលា ឆ្នាំ២០១៩នេះ ប្រកបដោយគុណភាពតាមលក្ខណៈបទដ្ឋានបច្ចេកទេសស្តង់ដារត្រឹមត្រូវធានាការប្រើប្រាស់បានយូរអង្វែង។
ជាមួយនេះ ឯកឧត្តមអភិបាលខេត្តក៏បានណែនាំបន្ថែមដល់អាជ្ញាធរក្រុង និង សង្កាត់ ឱ្យយកចិត្តទុកដាក់បន្ថែមទៀតចំពោះបញ្ហាសោភណភាព អនាម័យ បរិស្ថានក្នុងក្រុងកំពត ពិសេសត្រូវយកចិត្តទុកដាក់មើលការថែទាំ និងស្ដារប្រព័ន្ធលូទឹក ព្រមទាំងបំផុសចលនាផ្សព្វផ្សាយដល់ប្រជាពលរដ្ឋឱ្យមានការចូលរួមធ្វើការសម្អាតនូវអនាម័យបរិស្ថានតាមដងផ្លូវនិងមុខផ្ទះពិសេស កាប់ស្កាព្រៃតាមដងផ្លូវដើម្បីធ្វើឱ្យក្រុងកំពតប្រកបដោយសោភណភាព ភាពបៃតងនិងមានអនាម័យ បរិស្ថានល្អស្អាត ស័ក្តិសមជាក្រុង និងជាខេត្តទេសចរណ៍។
ក្នុងឱកាសនោះឯកឧត្តមអភិបាលខេត្តបានសន្យាដាក់ពង្រាយអំពូលភ្លើងតាមដងផ្លូវក្នុងក្រុងកំពតបន្ថែមទៀត ឱ្យបានភ្លឺស្ថិតតាមដងផ្លូវសំខាន់ និងដាក់អំពូលភ្លើងតាមដងផ្លូវនេះបន្ទាប់ពីបានសាងសង់រួច ដើម្បីធ្វើយ៉ាងណាឱ្យមានសោភណភាពទាក់ទាញពីសំណាក់ប្រជាពលរដ្ឋ និងភ្ញៀវទេសចរ។ ឯកឧត្តម ក៏បានថ្លែងអំណរគុណនិងកោតសរសើរចំពោះលោកឡាយ ពីន ដែលជាសប្បុរសជនបានចូលរួមបដិភាគបរិច្ចាគថវិកាក្នុងការកសាងផ្លូវ១ខ្សែនេះស្របទៅនឹងអ្វីនៃភាពរីកចម្រើរបស់ប្រទេសជាតិបច្ចុប្បន្ន ពិសេសក្នុងក្រុងកំពត ដើម្បីបម្រើនិងឆ្លើយតបទៅនឹងសំណូមពរតម្រូវការប្រើប្រាស់របស់ប្រជាពលរដ្ឋក្នុងមូលដ្ឋានជាការចាំបាច់៕
