នៅព្រឹកថ្ងៃទី២១ មករានេះ កម្ពុជាបានរៀបចំពិធីតភ្ជាប់ព្រះកេសជាមួយដងខ្លួនបដិមាព្រះហរិហរៈភ្នំដាវិញ ក្រោយពីបានឃ្លាតគ្នាជាង១៣០ឆ្នាំមក ។ លោក សុខ អាន រដ្ឋមន្ត្រីទីស្ដីការគណៈរដ្ឋមន្ត្រីថា ការទទួលបានព្រះហរិហរៈតភ្ជាប់ដងខ្លួនពេលនេះ គឺជាប្រថ្នូលល្អ នាំមកនូវសុខដុមរមនានៅឆ្នាំ២០១៦នេះ។ថ្លែងនៅក្នុងពិធីតភ្ជាប់រូបរាងដើមព្រះហរិហរៈ លោក សុខ អាន រដ្ឋមន្ត្រីទីស្ដីការគណៈរដ្ឋមន្ត្រីបានបញ្ជាក់ថា រូបបដិមាព្រះហរិហរៈដែលបានលេចចេញជារូបរាងដើមនេះ គឺបង្ហាញពីនិមិត្តរូបដ៏ល្អប្រពៃនៃការជួបជុំគ្នា ការរួបរួម ភាពចំរុងចម្រើន សុខដុមរមនា និងភាពរឹងមាំនៃព្រលឹងជាតិខ្មែរ។ លោកថា នេះក៍ជាប្រថ្នូលដ៏ល្អដែលនាំមកនូវវិបុលភាព និងសមិទ្ធផលថ្មីសម្រាប់ប្រជាជាតិកម្ពុជា ដែលជាជោគជ័យបន្ថែមទៀមក្នុងការការពារសម្បត្តិបេតិកភណ្ឌវប្បធម៌ជាតិ។លោក Pierre Baptiste តំណាងឲ្យសារមន្ទីជាតិនៃសិល្បៈអាស៊ីហ្គីមេប្រទេសបារាំង ដែលបានប្រគល់ព្រះកេសព្រះហរិហរៈមកកម្ពុជានោះ បានបញ្ជាក់ថា ការលេចរូបរាងដើមបដិមាព្រះហរិហរៈវិញនេះ គឺជាការកាយវិការនៃការស្ថាបនាឡើងវិញ ពោរពេញដោយអត្ថន័យមួយរបស់ប្រទេសកម្ពុជា។
