ភ្នំពេញ ថ្ងៃទី២០ ខែមីនា ឆ្នាំ២០២០ ឯកឧត្ដម គឹម សន្ដិភាព រដ្ឋលេខាធិការ និងជាអ្នកនាំពាក្យក្រសួងយុត្ដិធម៌បានលើកឡើងថា ទណ្ឌិតជិត៤០០នាក់ បានស្នើសុំបន្ធូរបន្ថយ និងលើកលែងទោស ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ។ ការលើកឡើងរបស់ ឯកឧត្ដម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌នេះ ក្នុងកិច្ចប្រជុំគណៈកម្មាធិការជាតិ ដើម្បីពិនិត្យលើសំណើសុំអនុគ្រោះទោសដល់ទណ្ឌិតសរុប ៣៩៩ នាក់ (ស្រី ៤៣ នាក់) ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ តាមសំណើពីគណៈកម្មការរាជធានី-ខេត្តចំនួន២២(ពន្ធនាគារ២២) និងពីគណៈកម្មការក្រសួងមហាផ្ទៃ(មណ្ឌលអប់រំកែប្រែចំនួន៤) កាលពីថ្ងៃទី១៩ ខែមីនា ឆ្នាំ២០២០ នៅទីស្តីការក្រសួងយុត្តិធម៌ ដោយមានការអញ្ជើញចូលរួមពី ឯកឧត្ដម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានគណៈកម្មាការថ្នាក់ជាតិ ពិនិត្យ និងវាយតម្លៃបញ្ជីរឈ្មោះទណ្ឌិត ស្នើសុំបន្ធូរបន្ថយទោស និងលើកលែងទោស។
ឯកឧត្ដម គឹម សន្តិភាព បានគូសបញ្ជាក់ថា ទណ្ឌិតដែលបានស្នើសុំបន្ធូរបន្ថយទោសសម្រាប់ពិធីបុណ្យចូលឆ្នាំខ្មែរខាងមុខនេះមានទណ្ឌិតដែលស្នើសុំនោះមានប្រភេទបទល្មើសច្រើន ក្នុងនោះក៏មានបទល្មើសគ្រឿងញៀនផងដែរ។ ប៉ុន្តែសម្រាប់ការពិនិត្យរបស់គណៈកម្មាធិការជាតិបន្ធូរបន្ថយ និងលើកលែងទោស មិនយកបទល្មើសគ្រឿងញៀនក្នុង ការផ្តល់ការអនុគ្រោះ ឬលើកលែងទោសនោះទេ ហើយ បទល្មើសដែលមានភាពសាហាវយង់ឃ្នងព្រៃផ្សៃក៏មិនយកការពិនិត្យនោះដែរ។ ឯកឧត្ដមបានបន្ដថា សម្រាប់ការផ្តល់អនុគ្រោះ និងលើកលែងទោសនោះបានផ្តល់ទៅលើទណ្ឌិតដែលបានប្រព្រឹត្តបទល្មើសដែលស្រាល និងប្រភេទទណ្ឌិតដែលអនុវត្តន៍ទោសបានប្រព្រឹត្តបានត្រឹមត្រូវតាមច្បាប់កំណត់ហើយសល់រយៈពេលខ្លី ឬក៏ទណ្ឌិតដែលមានភាពចាស់ជរា ឬមានជំងឺរ៉ាំរ៉ៃ ឬពិការភាព។
ឯកឧត្ដមរដ្ឋលេខាធិការបានបន្ថែមថា ចំពោះទណ្ឌិតដែលស្នើសុំនោះគណៈកម្មាធិការជាតិពិនិត្យបន្ធូរបន្ថយ និងលើកលែងទោសបានវាយតម្លៃរួចហើយ តែនៅរង់ចាំឯកសារមួយចំនួនដែលត្រូវបំពេញគ្រប់ ទើបផ្សព្វផ្សាយនៅពេលក្រោយ។ ឯកឧត្ដមបានបន្ថែមទៀតថា ការពិនិត្យលើការស្នើសុំបន្ធូរបន្ថយ និងលើកលែងទោសមិនបានគិតពីទណ្ឌិតមកពីបក្សនយោបាយណានោះទេគឺថាទណ្ឌិតមកពីណាក៏ពិនិត្យព្រោះអ្នកនោះមានសិទ្ធិស្មើគ្នាចំពោះមុខច្បាប់ ហើយច្បាប់មិនបានចែងថាទណ្ឌិតមកពីបក្សណានោះទេ។
សូមរម្លឹកផងដែរថា កាលពីអំឡុងពិធីបុណ្យអុំទូក ក្នុងឆ្នាំ២០១៩ កន្លងមក គណៈកម្មាធិការជាតិ ពិនិត្យបញ្ជីស្នើសុំបន្ធូរបន្ថយទោស និងលើកលែងទោសដល់ទណ្ឌិត ដែលបានលើកសំណើសុំអនុគ្រោះទោសដល់ទណ្ឌិតសរុប ៥១២ នាក់ (ស្រី ៥៨ នាក់) ជាលទ្ធផល អង្គប្រជុំបានសម្រេចធ្វើសំណើរគោរពជូនប្រមុខរាជរដ្ឋាភិបាលដើម្បីពិនិត្យ និងសម្រេចទូលថ្វាយព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុត ក្នុងការផ្តល់ការអនុគ្រោះទោស ដល់ទណ្ឌិតសរុប ៩០ នាក់ ( ស្រី ១៧ នាក់) ។ ជាមួយគ្នានេះ ចំពោះការបន្ថយទោស៦ ខែ ចំនួន ៥៨ នាក់ (ស្រី ១៣ នាក់) បន្ថយទោស៩ ខែ ចំនួន ១៤ នាក់ (ស្រី ០១ នាក់) បន្ថយទោស១២ខែ ចំនួន ០៨ នាក់ (ស្រី ០១ នាក់) និងលើកលែងទោស ចំនួន ១០ នាក់ ( ស្រី ០២ នាក់ ) ៕