អាជ្ញាធររាជធានីភ្នំពេញ បានបង្ហាញគម្រោងលំអិតលើការអភិវឌ្ឍន៍នៅតំបន់បឹងជើងឯក ក្រោយការបណ្ដោយអោយក្រុមហ៊ុនគ្រួសារ ឧកញា អ៊ឹង ប៊ុនហូវ ធ្វើការឈូឆាយមួយរយៈពេល ដែលធ្វើអោយប្រជាជនមានការថ្នាំងថ្នាក់នោះមក ។
គម្រោងលំអិតនៃការអភិវឌ្ឍន៍នេះ បានលើកឡើងយកមកជជែកក្នុងកិច្ចប្រជុំមួយ រវាងរដ្ឋាភិបាលរាជធានីភ្នំពេញ ឯកឧត្តម ប៉ា សុជាតិវង្ស និងប្រជាជននៅក្នុងតំបន់នោះ នាថ្ងៃទី២១ ខែមករានេះ ។ អភិបាលរាជធានីបានពន្យល់ថា គោលការណ៍របស់រាជរដ្ឋាភិបាល គឺរៀបចំតំបន់អភិវឌ្ឍន៍នៅជើងឯកនោះ អោយក្លាយជាតំបន់មួយដែលមានរបៀបរៀបរយ និងហេដ្ឋារចនាសម្ព័ន្ធផ្លូវថ្នល់ មន្ទីរពេទ្យ សាលារៀន និងប្រព័ន្ធលូជាដើម ។
ឯកឧត្តមបានបន្ដថាតំបន់អភិវឌ្ឍន៍នោះមានផ្ទៃដីសរុប ២ពាន់ ៥៧២ហិចតានិងតម្រូវអោយប្រជាពលរដ្ឋដែរមានដីត្រូវចូលរួមបដិភាគដីរបស់ខ្លួនចំនួន៣៥% ទៅតាមទំហំដីរបស់ខ្លួន និងចេញថវិកាខ្លះទៀតក្នុងការកសាងហេដ្ឋារចនាសម្ព័ន្ធលើដីរបស់ខ្លួន ។ ឯកឧត្តមអភិបាលបានបន្តថា បន្ទាប់ពីប្រជាពលរដ្ឋយល់ព្រមផ្ដល់នូវបដិភាគដីរបស់ខ្លួន ៣៥% រួចហើយនោះទំហំដីដែលនៅសល់ គឺអាជ្ញាធរនិងចេញប័ណ្ណកម្មសិទ្ធិជូនតែម្ដង ។
ប្រជាពលរដ្ឋដែលបានចូលរួមស្នើអោយអាជ្ញាធរពិចារណា ទំលាក់ការចូលរួមបដិភាគមកនូវត្រឹម ២០% និងប្រជាពលរដ្ឋខ្លះបានស្នើអោយមានការពន្យល់ ពីភាពខុសគ្នារវាងដីសំរាប់អភិវឌ្ឍន៍ និងដីលំនៅដ្ឋាន និងខ្លះទៀតសំដែងការបារម្ភថា ពួកគាត់មិនមានលុយគ្រប់គ្រាន់សំរាប់ចូលរួមអភិវឌ្ឍន៍នោះឡើយ ។
ទោះជាយ៉ាងណា ឯកឧត្តមអភិបាលរាជធានីភ្នំពេញបានពន្យល់ថា ការចូលរួមបដិភាគ៣៥% នេះ គឺពុំមែនធ្លាក់មកជាកម្មសិទ្ធិរបស់អាជ្ញាធររាជធានីភ្នំពេញជាអ្នកកាន់កាប់និងទទួលផលនោះឡើយ តែទុកសម្រាប់កសាងផ្លូវថ្នល់ រហូតដល់ ៦១ខ្សែ និងហេដ្ឋារចនាសម្ព័ន្ធមួយចំនួនទៀតដោយស្របទៅតាមការវិនិច្ឆ័យ របស់គណៈកម្មការសិក្សាយ៉ាងលំអិត ។
នៅលើគណនី Facebook របស់ ឯកឧត្តម ប៉ា សុជាតិវង្ស បានអំពាវនាវដល់ប្រជាពលរដ្ឋដែលមានដីនៅតំបន់នេះ ឲ្យយកឯកសារកាន់កាប់ដីរបស់ខ្លួន មកប្រគល់ឲ្យគណៈកម្មការទទួលឯកសារ ដែលរង់ចាំទទួលនៅ ទីស្នាក់ការក្រុមហ៊ុន ING Holding ចាក់អង្រែ ចាប់ពីថ្ងៃទី២២ មករា តទៅ រហូតដល់រយៈពេល ២០ថ្ងៃ យ៉ាងយូរ ។