កម្ពុជាបានដាក់ល្បែងទាញព្រ័ត្រក្នុងបេតិកភណ្ឌ និងអង្គការ Unesco បានប្រគល់ជាផ្លូវការនូវវិញ្ញាបនបត្រ ដែលទទួលស្គាល់ល្បែងទាញព្រ័ត្រខ្មែរនេះ ក្នុងបញ្ជីបេតិកភណ្ឌវប្បធម៌អរូបីមនុស្សជាតិ។
ការប្រគល់បានធ្វើនៅព្រឹកថ្ងៃ២១ មករានេះ ក្នុងឱកាសដែលកម្ពុជាបានធ្វើពិធី «តភ្ជាប់ព្រះកេសជាមួយដងខ្លួនរបស់បដិមាព្រះហរិរៈភ្នំដា» ។ ពិធីនោះបានធ្វើឡើងនៅសារមន្ទីរជាតិ រាជធានីភ្នំពេញ ក្រោមអធិបតីភាព ឯកឧត្តមបណ្ឌិតសភាចារ្យ សុខ អាន ឧកនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណរដ្ឋមន្ត្រី និងមានការចូលរួមពីរដ្ឋមន្រ្តីក្រសួងវប្បធម៌ និង លោក S. Makariou ប្រធានសារមន្ទីរជាតិ នៃសិល្បៈអាស៊ីហ្គីមេ ប្រទេសបារាំងផងដែរ ។
ឯកឧត្តមបណ្ឌិតសភាចារ្យ សុខ អាន បានថ្លែងថា កម្ពុជាស្វាគមន៍ការវិលត្រឡប់នៃព្រះកេសរបស់ព្រះបដិមា ព្រះហរិហរៈភ្នំដា ដើម្បីតភ្ជាប់ជាមួយដឹងដងខ្លួនវិញ បន្ទាប់ពីបានព្រាត់គ្នាអស់រយៈពេលប្រមាណ ១៣០ឆ្នាំ ដែលប្រៀបបាននឹងការផ្តល់ជីវិតថ្មីឡើងវិញ ដល់ព្រះហរិហរៈ ។ ឯកឧត្តមបានលើកឡើងថា តាមជំនឿខ្មែរ នេះគឺជាមិត្តរូបដ៏ល្អប្រពៃនៃការជួបជុំគ្នា ការរួបរួម ភាពចំរុងចម្រើន ភាពសុខដុមរមនា និងភាពរឹងមាំនៃព្រលឹងជាតិខ្មែរផងដែរ ។
កម្ពុជាកាលពីឆ្នាំកន្លងទៅ បានទទួលជោគជ័យច្រើននៅក្នុងវិស័យបេតិកភណ្ឌវប្បធម៌ ដូចជាការវិលត្រឡប់មកកាន់មាតុភូមិវិញ នូវរូបបដិមាដ៏ធំនៃដៃគូប្រយុទ្ធគ្នាគឺ ទុរយោធន៍ និង ភីម រួមជាមួយនឹ ពលរាម ដោយសារកិច្ចខិតខំប្រឹងប្រែងប្រកបដោយឆន្ទៈយ៉ាងមោះមុត របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ និងដោយមានការចូលរួមសហការ ពីរដ្ឋាភិបាលសហរដ្ឋអាមេរិក អង្គការយូណេស្កូ សាលាបារាំងចុងបូព៌ា (EFEO) និងអ្នកជំនាញដទៃទៀតជាច្រើននាក់ ។
ជាងនេះទៅទៀត កាលពីឆ្នាំ ២០១៣ ក៏មានព្រឹត្តិការណ៍ដ៏សំខាន់មួយដែលត្រូវបានអ្នកសង្កេតការណ៍មួយ ចាត់ទុកថាជារបត់ថ្មីមួយប្រកបដោយក្តីសង្ឃឹមខ្ពស់ នៃការអនុវត្ត «ក្រមសីលធម៌វិជ្ជាជីវៈនៃអង្គការក្រុមប្រឹក្សាអន្តរជាតិសារមន្ទីរ ។ ព្រឹត្តិការណ៍នោះ គឺការប្រគល់ជូនរាជរដ្ឋាភិបាលនូវបដិមា សហទេព និងនកុល ដែលជាទេវរូបពីរអង្គក្នុងចំណោមបងប្អូនបណ្ឌវ ដោយសុឆន្ទៈរបស់សារមន្ទីរ Metropolitan of Art ទីក្រុងញូវយ៉ក ក្នុងឱកាសនៃសម័យប្រជុំលើកទី៣៧ នៃគណៈកម្មាធិការបេតិកភណ្ឌពិភពលោក នៅរាជធានីភ្នំពេញ ។
ក្នុងពិធីនោះដែល ឯកឧត្តមបណ្ឌិតសភាចារ្យ សុខ អាន បានថ្លែងថា ពិធីប្រគល់ជាផ្លូវការនូវវិញ្ញាបនបត្រ ទទួលស្គាល់ «ល្បែងទាញព្រ័ត្រ» ចុះក្នុងបញ្ជីបេតិក ភណ្ឌវប្បធម៌អរូបីនៃមនុស្សជាតិ នៃអង្គការយូណេស្កូ នៅក្នុងសម័យប្រជុំរបស់ខ្លួនកាលពីថ្ងៃទី២ ខែធ្នូ ឆ្នាំ ២០១៥ នៅប្រទេសណាមីប៊ី។
បណ្ឌិតសភាចារ្យ សុខ អាន បានមានប្រសាសន៍ថា កម្ពុជាអបអរសាទរ «ល្បែងទាញព្រ័ត្រ» ដែលបានចុះក្នុងបញ្ជីបេតិកភណ្ឌវប្បធម៌នៃមនុស្សជាតិបន្ថែមទៀតនេះ ។
