រដ្ឋាភិបាលជប៉ុន គ្រោងនឹងផ្តល់ជំនួយឥតសំណងជិត ២៥ម៉ឺនដុល្លារ ដល់រដ្ឋាភិបាលកម្ពុជាលើវិស័យចំនួន២ គឺសុខាភិបាលនិងប្រព័ន្ធធារាសាស្ត្រ។
សេចក្តីថ្លែងការណ៍មួយ របស់ស្ថានទូតជប៉ុនចុះថ្ងៃទី ១០កុម្ភៈ ឆ្នាំ២០១៧ ជំនួយនេះនឹងផ្តល់ជួនអង្គភាពពាក់ព័ន្ធនៅថ្ងៃទី ១៣កុម្ភៈក្នុងការចុះហត្ថលេខាទទួលនៅស្ថានទូតជប៉ុន។ ថវិកាសរុប ចំនួន ២៤៧,៧៣៤ ដុល្លារអាមេរិក នឹងផ្តល់ក្រោមគម្រោងកិច្ចសហប្រតិបត្តិការសេដ្ឋកិច្ចរបស់ជប៉ុន ជំនួយឧបត្ថម្ភឥតសំណងសម្រាប់ទ្រង់ទ្រាយតូចសន្តិសុខមនុស្សជាតិ។
ជំនួយឧបត្ថម្ភឥតសំណងនេះ គឺរួមមាន គម្រោងបំពាក់ឧបករណ៍បរិក្ខាពេទ្យ នៅមន្ទីរពេទ្យបង្អែកចំការលើខេត្តកំពង់ចាមតម្លៃ ៨២,១៨០ដុល្លារ.. គម្រោងសាងសង់អគារផ្នែកសង្រ្គោះបន្ទាន់ នៅមន្ទីរពេទ្យបង្អែកស្ទោងខេត្តកំពង់ធំ តម្លៃ ៨៣,១៧៥ដុល្លារ និងគម្រោងស្តារឡើងវិញ នូវប្រពន្ធ័ធារាសាស្រ្តបឹងកន្សែងខេត្តពោធិ៍សាត់តម្លៃ ៨២,៣៧៩ដុល្លារ។