លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានរៀបចំពិធីប្រគល់ ម៉ាស់ ទឹកលាងដៃកម្ចាត់មេរោគ និងអាល់កុល ជូនដល់ លោកជំទាវ ឧត្តមសេនីយ៍ទោ កើត ស៊ីយុត្តិ នាយករងមន្ទីរពេទ្យព្រះកេតុមាលា និងលោកជំទាវឧត្តមសេនីយ៍ទោ ឯក ឆវីវណ្ណា នាយករងមន្ទីរពេទ្យព្រះកេតុមាលា នារសៀលថ្ងៃសៅរ៍ ១១កើត ខែពិសា ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី០២ ខែឧសភា ឆ្នាំ២០២០ ។
ឆ្លៀតក្នុងឱកាសនោះ លោកជំទាវកិត្តិសង្គហបណ្ឌិត បានមានប្រសាសន៍ថាៈ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក៏ដូចជារដ្ឋបាលរបស់មន្ទីរពេទ្យព្រះកេតុមាលា ក្នុងសកម្មភាពទប់ស្កាត់ប្រយុទ្ធប្រឆាំង នឹង ការរីករាលដាលជំងឺឆ្លងកូវីដ១៩ លោកជំទាវបាននាំយកម៉ាស់ចំនួន៤ពាន់ម៉ាស់ ទឹកលាងដៃកម្ចាត់មេរោគ ២៥៥ដប និងអាល់កុល ១៥០លីត្រ ឧបត្ថម្ភដល់មន្ទីរពេទ្យព្រះកេតុមាលា សម្រាប់បម្រើដល់វិស័យសុខាភិបាល ដែលកំពុងត្រូវការចាំបាច់នូវម៉ាស់សម្រាប់ពាក់ការពារកុំអោយឆ្លងជំងឺកូវវីដ១៩ដ៏កាចសាហាវនេះ ។
លោកជំទាវ ឧត្តមសេនីយ៍ទោ កើត ស៊ីយុត្តិ ក៏បានគោរពថ្លែងនូវអំណរគុណយ៉ាងជ្រាលជ្រៅចំពោះលោកជំទាវកិត្តិសង្គហបណ្ឌិត ដែលបានផ្តល់សម្ភារៈទាំងនេះ ក្នុងការពារថែទាំសុខភាព ក្នុងពេលដែលជំងឺឆ្លងជាសកលនេះបានរីករាលដាលពាសពេញពិភពលោក ដែលបង្ករអោយមនុស្សឈឺនិងស្លាប់ជាច្រើននាក់ ៕
