សម្តេចតេជោ ហ៊ុន សែន ផ្ញើលិខិតថ្លែងអំណរគុណ ភារធារីនៃស្ថានទូតប្រ៊ុយណេប្រចាំកម្ពុជា ដែលបានផ្ញើសាររំលែកទុក្ខ ចំពោះមរណភាពម្តាយក្មេកសម្តេច


(ភ្នំពេញ)៖ សម្តេចតេជោ ហ៊ុន សែន ផ្ញើលិខិតថ្លែងអំណរគុណ ឯកឧត្តម ខេរិន ទៀនលុង ភារធារីនៃស្ថានទូតប្រ៊ុយណេ ប្រចាំកម្ពុជា ដែលបានផ្ញើសាររំលែកទុក្ខ ចំពោះមរណភាពរបស់អ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ម្តាយក្មេករបស់សម្តេច។

សារលិខិតរបស់សម្តេចតេជោ ហ៊ុន សែននៅថ្ងៃទី២០ ខែឧសភានេះ បានសរសេរយ៉ាងដូច្នេះថា «ខ្ញុំបានទទួលដោយ អំណរគុណយ៉ាងជ្រាលជ្រៅ នូវសាររំលែកទុក្ខរបស់លោក ផ្ញើជូនរូបដល់ខ្ញុំ ព្រមទាំងក្រុមគ្រួសារ ក្នុងឱកាសដែលមាតាក្មេកជាទីស្រឡាញ់របស់ខ្ញុំ បានទទួលអនិច្ចកម្ម កាលពីព្រឹកព្រលឹមថ្ងៃទី ៤ ឧសភា ឆ្នាំ២០២០។

ខ្ញុំ ព្រមទាំងភរិយា មានក្ដីរំភើបណាស់ ចំពោះសមានចិត្តដ៏ប្រពៃរបស់ឯកឧត្ដម ដែលបានចូលរួមមរណទុក្ខជាមួយនឹងក្រុមគ្រួសាររបស់ខ្ញុំ ក្នុងគ្រាដែលយើងទាំងអស់គ្នា កំពុងតែសោកសៅឥតឧប្បមា ដោយសារការបាត់បង់ដ៏ធំធេងនេះ»។

សូមជម្រាបថា អ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែលត្រូវជាមាតា មាតាក្មេក ជីដូន បានទទួលមរណភាពនាថ្ងៃចន្ទ ១៣កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី៤ ខែឧសភា ឆ្នាំ ២០២០ វេលាម៉ោង២និង១២នាទី ទៀបភ្លឺ ក្នុងជន្មាយុ៩៦ឆ្នាំ ដោយជរាពាធ៕