អតីតសមាជិកព្រឹទ្ធសភានៃគណបក្សប្រឆាំង លោក ហុង សុខហួរ បានសារភាពថា សន្ធិសញ្ញាព្រំដែនកម្ពុជានិងវៀតណាម គឺពិតជាសន្ធិសញ្ញាក្លែងក្លាយនោះដែន… និងលោកចោទថា គឺជាទង្វើកាត់តរបស់អ្នកកាន់ Page ។ សម្តីសារភាពនេះ ត្រូវគេឃើញបានបង្ហាញថា លោក សម រង្ស៊ី ដែលរងការចោទពីតុលាការ ពីបទឃុបឃិតក្នុងការបង្ហោះសន្ធិសញ្ញាក្លែងក្លាយក្នុង Page របស់ខ្លួន ពិតជាមានការពិតយ៉ាងនោះមែន ។
សម្តីសារភាពរបស់ លោក ហុង សុខហួរ បានធ្វើឡើងកាលពីព្រឹកថ្ងៃទី២២ ខែមករា ឆ្នាំ ២០១៦ ខណៈពេលដែលអនុរក្សពន្ធនាគារព្រៃស បញ្ជូនរូបលោកមកកាន់សាលាដំបូងរាជធានីភ្នំពេញ ក្នុងនាមជាសាក្សី ឆ្លើយបំភ្លឺចំពោះការចោទប្រកាន់លើ លោក សម រង្ស៊ី ដែលត្រូវតុលាការចោទប្រកាន់ពីបទសមគំនិតក្នុងការក្លែងសន្ធិសញ្ញានេះ ។
សូមជំរាបថា សន្ធិសញ្ញាក្លែងក្លាយដែលបង្ហោះក្នុង Page របស់ លោក សម រង្ស៊ី នេះ បានបង្កអោយមានការជេរប្រមាថ ដល់អ្នកដឹកនាំរាជរដ្ឋាភិបាលកម្ពុជា និងបង្កអោយមានការជ្រួលច្របល់ និងការយល់ច្រឡំយ៉ាងខ្លាំងក្លាពីពលរដ្ឋ ដោយចោទថា រាជរដ្ឋាភិបាល សម្តេចតេជោ ហ៊ុន សែន បានកាត់ដីអោយវៀតណាម និងគ្មានបំណងការពារអធិបតេយ្យភាពជាតិកម្ពុជាឡើយ ។
ទោះជាយ៉ាងណាក៏ដោយ ចម្លើយរបស់ លោក ហុង សុខហួរ ដែលបានព្យាយាមឆ្លើយទម្លាក់ កំហុសនោះមកលើអ្នកកាន់ Page របស់ លោក សម រង្ស៊ី នោះ ត្រូវគេសង្ស័យថា ជាការចង់ឆ្លើយដោះសារយករួចខ្លួន និងព្យាយាមការពារ លោក សម រង្ស៊ី ផងដែរ ដោយការទម្លាក់ទោសលើមនុស្សដែលបានរត់ភៀសខ្លួនចេញពីប្រទេសកម្ពុជាបាត់ទៅហើយ អោយទទួលខុសត្រូវ ។
សូមជំរាបថា អ្នកកាន់ផេកហ្វេសប៊ុករបស់ លោក សម រង្ស៊ី មានឈ្មោះ សត្យា សម្បត្តិ ឬសម្បត្តិ សត្យា និងឈ្មោះ អ៊ុង ជុងលាង ត្រូវគេឃើញតុលាការបានចេញដីកាបង្គាប់អោយចាប់ខ្លួនផងដែរ ។ ប៉ុន្តែរហូតមកទល់ពេលនេះ សមត្ថកិច្ចពុំទាន់ចាប់ខ្លួនបាននៅឡើយទេ ព្រោះពួកគេគេចខ្លួនទៅក្រៅប្រទេសអស់ទៅហើយ ។
