ឯកឧត្តមបណ្ឌិត អ៊ិត សំហេង អនុញ្ញាតិឱ្យប្រធានគ្រប់គ្រងជាន់ខ្ពស់ នៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន ចូលជួបសំដែងការគួរសម និងពិភាក្សាការងារ


នាព្រឹកនៅថ្ងៃទី២១ ខែកុម្ភៈ ឆ្នាំ២០១៧ ផងដែរបន្ទាប់ពីទទួលជួបជាមួយគណៈប្រតិភូរដ្ឋបាលក្រុងប៉េហាយ នៃតំបន់ស្វ័យយ័តគងស៊ីចាង នៃសាធារណរដ្ឋប្រជាមានិតចិនរួចមក ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអនុញ្ញាតិឱ្យលោកស្រី សុនីតា កាភូ (Sunita Kapoor) ប្រធានគ្រប់គ្រងជាន់ខ្ពស់ នៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន ដឹកនាំគណៈប្រតិភូនាយកប្រតិបត្តិជាន់ខ្ពស់ នៃក្រុមហ៊ុនប្រមាណជាង ១០ តំណាងឱ្យក្រុមហ៊ុនធំៗលំដាប់ពិភពលោកចំនួន៥០០ ក្រុមហ៊ុនរបស់សហរដ្ឋ អាមេរិកចូលជួបសំដែងការគួរសម និងពិភាក្សាការងារ។
ក្នុងជំនួបខាងលើ គណៈប្រតិភូគណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន បានសំដែងនូវចំណាប់អារម្មណ៍យ៉ាងខ្លាំងពីការ វិវត្តរីកចំរើនរបស់កម្ពុជា ដែលធ្វើឱ្យសេដ្ឋកិច្ចរីកចំរើនលូតលាស់ជាលំដាប់ចាប់តាំងពីរាជរដ្ឋាភិបាលកម្ពុជា បានអនុវត្តនូវគោលនយោបាយផ្សាភ្ជាប់ពាណិជ្ជកម្ម និងលក្ខខណ្ឌការងារ តាមរយៈកិច្ចព្រមព្រៀងពាណិជ្ជកម្មជាមួយ សហរដ្ឋអាមេរិកតាំងពីឆ្នាំ១៩៩៩។ ដំណើរទស្សកិច្ចរបស់គណៈប្រតិភូនេះ ជាការបង្ហាញឱ្យឃើញនូវចំណាប់អារម្មណ៍របស់អ្នកវិនិយោគទុកសហរដ្ឋអាមេរិកដែលចង់មកបណ្តាក់ទុនបន្ថែមទៀតនៅកម្ពុជា។ ភាគីសហរដ្ឋអាមេរិកពិតជាមានការពេញចិត្តយ៉ាងខ្លាំងចំពោះអ្វីដែលរាជរដ្ឋាភិបាលកម្ពុជា បានអនុវត្តនូវការផ្តល់នូវឱកាសវិនិយោគទុនតាមរយៈកិច្ចសម្រួលពាណិជ្ជកម្ម។ តំណាងក្រុមហ៊ុនអាមេរិកដែលកំពុង ប្រតិបត្តិការងារនៅកម្ពុជាក៏បានសំដែងនូវការថ្លែងអំណរគុណ ចំពោះកិច្ចខិតខំប្រឹងប្រែងនានារបស់ក្រសួងការងារ និងបណ្តុះ បណ្តាលវិជ្ជាជីវៈ ដែលដោះស្រាយនូវកង្វល់របស់អ្នកវិនិយោគទុន ព្រមទាំងជួយគាំទ្រសព្វបែបយ៉ាងសំដៅធ្វើឱ្យប្រសើរឡើងនូវលក្ខខណ្ឌការងារ និងជំនាញវិជ្ជាជីវៈ ជូនបងប្អូនកម្មករ និយោជិត។ ភាគីទាំងពីរបានឯកភាពគ្នានឹងខិតខំបន្តកិច្ចសហប្រិតបត្តិការជាមួយគ្នាក្នុងភាពជាដៃគូរ ដើម្បីពង្រីកឱកាសវិនិយោគ និងចូលរួមក្នុងការជួយទៅដល់ការទទួលខុសត្រូវសង្គម (Corporate Social Responsibility)។ ទន្ទឹមនឹងនេះ ទាំងក៏បានពិភាក្សាលើចំណុចមួយចំនួន រួមមាន៖
-ការគាំទ្រសន្ធិសញ្ញាវិនិយោគទ្វេភាគីរវាងសហរដ្ឋអាមេរិក-កម្ពុជា
-ការបំផុសឱ្យឃើញនូវសារសំខាន់នៃវិស័យថាមពល និងការអភិវឌ្ឍហេដ្ឋារចនាសម្ព័ន្ធក្នុងនោះមានបញ្ហាតំបន់ត្រួតស៊ីគ្នារវាងកម្ពុជា-ថៃ ជាដើម
-ការគាំទ្រដល់រាជរដ្ឋាភិបាលកម្ពុជាក្នុងការអនុវត្តឱ្យបានកាន់តែប្រសើរនូវអភិបាលកិច្ចល្អ និងតម្លាភាព
-ការគាំទ្រដល់កិច្ចខិតខំប្រឹងប្រែងអភិវឌ្ឍសមត្ថភាព រួមមានការអភិវឌ្ឍធនធានមនុស្ស ការទទួលខុសត្រូវសង្គម ការបណ្តុះបណ្តាលអាជីវកម្មខ្នាតតូច និងមធ្យម ភាពជាអ្នកដឹកនាំយុវជន និងកម្មវិធីផ្លាស់ប្តូរវប្បធម៌របស់កម្ពុជា និងសហរដ្ឋអាមេរិក។
សូមបញ្ជាក់ផងដែរថា ទំហំពាណិជ្ជកម្មសរុបរវាងកម្ពុជា-សហរដ្ឋអាមេរិក ពីឆ្នាំ២០១៣ ដល់ ២០១៦ នេះ មានការកើនឡើងពី ៣.០១២,៤០លានដុល្លាអាមេរិក ដល់ ៣.១៧៤,៣០ លានដុល្លាអាមេរិក ដែលក្នុងនោះទំហំនៃការនាំចេញទំនិញពីកម្ពុជាទៅសហរដ្ឋអាមេរិក មានការកើនឡើងពី ២.៧៧១,២០ លានដុល្លាអាមេរិក ដល់ ២.៨១២,៥០ លានដុល្លាអាមេរិក (ប្រភព៖ក្រសួងពាណិជ្ជកម្មសហរដ្ឋអាមេរិក ២០១៦)។