កិច្ច​ប្រជុំ​ស្ដីពី​បញ្ហា​ប្រមូល​ធនធាន​មនុស្ស​ជំនាញ​ផ្នែក​វិទ្យាសាស្ត្រ និង​បច្ចេកវិទ្យា សម្រាប់​ជា​ឃ្លាំង​ចំណេះ​របស់​ជាតិ


រាជធានី​ភ្នំពេញ៖ ថ្នាក់​ដឹកនាំ​ក្រសួង​អប់រំ យុវជន និង​កីឡា បាន​ធ្វើ​កិច្ច​ជំនួប​ជាមួយ​​ថ្នាក់​ដឹកនាំ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ដើម្បី​ពិភាក្សា​ស្ដីពី​ការ​​ប្រមូល​ផ្តុំ​ធនធាន​មនុស្ស​ផ្នែក​វិទ្យាសាស្ត្រ បច្ចេកវិទ្យា និង​នវានុវត្តន៍​ ដែល​នៅ​បែកខ្ញែក​គ្នា តាម​ស្ថាប័ន ក្រសួង មន្ទីរ វិស័យ​ឯកជន​ក៏​ដូចជា​នៅ​ក្នុង​អង្គការ​ក្រៅ​រាជរដ្ឋាភិបាល​ រួម​ទាំង​ការ​ផ្តោត​ទៅ​លើ​សិស្ស​លេចធ្លោ​ដែល​កំពុង​សិក្សា​ក្នុង​សាលារៀន និង​បញ្ញវន្ត​ដែល​បញ្ចប់​ការ​សិក្សា ដែល​ជា​គោលដៅ​ដ៏​សំខាន់​ដែល​រាជរដ្ឋាភិបាល​ក៏​ដូចជា​ក្រសួង ស្ថាប័ន​ពាក់ព័ន្ធ​សហការ​គ្នា ដើម្បី​ធ្វើ​ជា​បញ្ជី​សារពើ​ភណ្ឌ​ប្រមូល​ផ្តុំ​ទុក​ជា​ខួរក្បាល​របស់​ជាតិ។

កិច្ច​ជំនួប​ពិភាក្សា​នេះ​បាន​ប្រព្រឹត្ត​ទៅ​ក្រោម​ការ​ដឹកនាំ​ដោយ​ ​ឯកឧត្តម​កិត្តិសេដ្ឋា​បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ និង​ឯកឧត្តម​បណ្ឌិត​សភាចារ្យ ហង់ជួន ណារ៉ុន រដ្ឋមន្រ្តី​ក្រសួង​អប់រំ យុវជន និង​កីឡា។

ឆ្លង​កាត់​ការ​ពិភាក្សា និង​ផ្លាស់ប្ដូរ​យោបល់​ទៅ​វិញ​ទៅ​មក សាមី​ក្រសួង​ទាំង​ពីរ​បាន​បង្ហាញ​នូវ​សារៈសំខាន់​នៃ​ការ​បណ្តុះបណ្តាល ការគ្រប់គ្រង និង​ការ​អភិវឌ្ឍ​ធនធាន​មនុស្ស​ផ្នែក​វិទ្យាសាស្ត្រ បច្ចេកវិទ្យា និង​ការ​ច្នៃ​ប្រឌិត​ថ្មីៗ ហើយ​ត្រូវ​យក​ចិត្ត​ទុក​ដាក់​ការ​ធ្វើ​បញ្ជី​សារពើភ័ណ្ឌ​មួយ ទុក​ជា​ធនធាន​ខួរ​ក្បាល​របស់​ជាតិ ដែល​បច្ចុប្បន្ន​ធនធាន​ទាំងនេះ នៅ​បែកខ្ញែកគ្នា ហើយ​មាន​មួយ​ចំនួន​កំពុង​បំពេញ​ការងារ​ខុសជំនាញ ។ មួយ​វិញ​ទៀត​ការងារ​សំខាន់​បំផុត គឺ​ការ​សម្រួច​ខួរ​ក្បាល​ធនធាន​ទាំងនេះ តាម​រយៈ​ការ​រៀន​សូត្រ​ផ្សារ​ភ្ជាប់​នឹង​ការ​អនុវត្តជាក់ស្តែង ។

ដូច្នេះ​ជា​យន្តការ ក្រសួង​ស្ថាប័ន និង​ដៃគូ​ពាក់ព័ន្ធ​ទាំង​អស់​ត្រូវ​សហការគ្នា ធ្វើ​សមាហរណកម្ម​ធនធាន​ទាំង​នោះ តាមរយៈ​កិច្ច​សហការ​រវាង​ស្ថាប័នរដ្ឋ ជាមួយ​សាកលវិទ្យាល័យ​ជំនាញ វិស័យ​ឯកជន និង​អង្គការ​ក្រៅ​រដ្ឋាភិបាល​ជា​ដើម ដើម្បី​ឲ្យ​ប្រាកដ​ថា​ធនធាន​មួយ​ណា​មាន​តម្រូវ​ការ​ជាក់ស្តែង និង​ក៏​ជា​មូលដ្ឋាន​បែងចែក​ធនធាន​ឲ្យ​ត្រូវ​មុខ​សញ្ញាការងារ ។

ក្នុងនោះ រដ្ឋ ត្រូវសហការរៀបចំវេទិកា រឺសិក្ខាសាលានានា ដើម្បីធ្វើជាព្រឹត្តិការណ៌ជួបជុំគ្នាផ្លាស់ប្តូរបទពិសោធន៍ រឺការផ្ទេរចំណេះដឹងថ្មីៗ រវាងអ្នកបានប្រឡូកក្នុងការងារជាក់ស្តែងតាមចំណេះដឹងដែលខ្លួនមាន និងអ្នកដែលទើបបញ្ចប់ការសិក្សាជំនាញពីសាលា ។ ទន្ទឹមនឹងនេះ រាជរដ្ឋាភិបាលត្រូវមានធនធានសមស្រប ដោយសហការជាមួយដៃគូអភិវឌ្ឍន៌ និងប្រទេសផ្តល់ជំនួយ សម្រាប់ការងារស្រាវជ្រាវ និងការអភិវឌ្ឍ អភិវឌ្ឍធនធានគ្រូបង្រៀន គ្រូឧទ្ទេសនាម ជំនាញការ និងធនធានឧបករណ៌សម្ភារៈ ដូចជាមន្ទីរពិសោធន៌ជាដើម៕

២៩ ​មិថុនា ២០២០ | ទីស្ដីការ​ក្រសួង​អប់រំ