នាព្រឹកថ្ងៃទី ១០ ខែ មីនា ឆ្នាំ២០១៧ ឯកឧត្តម ម៉ៅ ភិរុណ អភិបាលខេត្តកណ្តាល បានអញ្ជើញជាអធិបតីក្នុងពិធីបុណ្យល្ខោនខ្មែរ និងប្រកួតកីឡាយុវជន នៅភូមិវិហារសួគ៌ ឃុំវិហារសួគ៌ ស្រុកខ្សាច់កណ្តាល ។ សមាសភាពអញ្ជើញចូលរួមមាន៖ ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលខេត្តរង ឯកឧត្តម លោកឧកញ៉ាប្រធានក្រុមហ៊ុន 7NG SKYLAND ប្រធានក្រុមហ៊ុនក្នុងតំបន់អភិវឌ្ឍន៍វិហារសួគ៌ ប្រធានមន្ទីរអង្គភាពជុំវិញខេត្ត មន្ត្រីសាលាស្រុក សិស្សានុសិស្ស យុវជនកាយរឹទ្ធ កាកបាទក្រហម សភាពសហព័ន្ធយុវជនស្រុក ក្រុមចលនាយុវជនកម្ពុជា១៥៧ សាខាខេត្តកណ្តាល យាយជី តាជី កីឡាករ កីឡាការិនី និងប្រជាពលរដ្ឋ សរុបចំនួន ១ ២៨០ នាក់។
មានមតិសំណេះសំណាលក្នុងឱកាសនេាះ ឯកឧត្តម បានកោតសរសើរពីការអភិវឌ្ឍរីកចម្រើនទាំងផ្នែករឹង និងផ្នែកទន់របស់ខេត្តកណ្តាល និយាយជារួម និងការអភិវឌ្ឍរីកចម្រើនរបស់ស្រុកខ្សាច់កណ្តាល និយាយដោយឡែក ជាពិសេសការរីកចម្រើនយ៉ាងខ្លាំង នៅក្នុងតំបន់អភិវឌ្ឍរបស់ក្រុមហ៊ុន 7NG SKYLAND ក្នុងឃុំវិហារសួគ៌ ស្រុកខ្សាច់កណ្តាល ដែលកំពុងផ្តល់ការងារជូនប្រជាពលរដ្ឋបានប្រមាណ ២០ ០០០ នាក់។
ឯកឧត្តម បានអំពាវនាវដល់យុវជន និងប្រជាពលរដ្ឋ ចូលរួមលេងកីឡាឲ្យបានគ្រប់ៗគ្នា និងជៀសវាងអោយឆ្ងាយពីការប្រព្រឹត្តអំពើអបាយមុខនានា ដែលសង្គមមិនឲ្យតម្លៃ។