ភ្នំពេញ ៖ នៅថ្ងៃទី២២ ខែកញ្ញា ឆ្នាំ២០២០នេះ នៅសួនសមិទ្ធផលយោធា នៃវិមានឈ្នះឈ្នះកងរាជអាវុធហត្ថ និងនគរបាលជាតិ ឯកឧត្តម នាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និង ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស បានអញ្ជើញចុះពិនិត្យការដ្ឋានសំណង់ស្តូបសមិទ្ធផលសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលកំពុងដំណើរការសាងសង់។
សូមជម្រាបថា សួនសន្តិសុខ សុវត្ថិភាព និងសណ្តាប់ធ្នាប់សង្គម ដែលរៀបចំកសាងដោយ កងរាជអាវុធហត្ថលើផ្ទៃប្រទេស រួមសហការជាមួយ អគ្គស្នងការដ្ឋាននគរបាលជាតិនេះ សម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារ ជាតិ ធ្លាប់បានណែនាំដល់ការរៀបចំសាងសង់សួននេះ នៅវិមាន ឈ្នះ ឈ្នះ ត្រូវធ្វើយ៉ាងណារាល់ការសាងសង់ ត្រូវមានរចនាបទលក្ខណៈ វប្បធម៌ខ្មែរ ពិសេសត្រូវរំលេចនូវអត្តសញ្ញាណនយោបាយ ឈ្នះ ឈ្នះ ដែលជានិមិត្តរូប នៃសន្តិភាព ហើយរាល់វត្ថុធាតុដើមសាងសង់ ត្រូវធានាឲ្យបាននូវភាពរឹងមាំយូរអង្វែងដែលជាសមិទ្ធផលជាតិ ៕