ព្រឹកថ្ងៃចន្ទទី១១ ខែមករា ឆ្នាំ២០២១ ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត និងឯកឧត្តម ភឹម ភីរ៉ា អភិបាលរងខេត្ត បានអញ្ជើញចូលរួមពិធីបេីកបវេសនកាលឆ្នាំសិក្សាថ្មី ២០២០-២០២១ ក្រោមអធិបតីភាព ឯកឧត្ដម ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ នៅសាលាបឋមសិក្សាត្រពាំងទ្រាំង ភូមិកសាង ឃុំចង្រ្កង់ ស្រុកចិត្របុរី ខេត្តក្រចេះ។
ក្នុងពិធីនេះ ឯកឧត្ដមរដ្ឋមន្រ្តី បានមានប្រសាសន៍ណែនាំដល់សិស្សានុសិស្សត្រូវតែខិតខំប្រឹងប្រែងក្នុងបវេសនកាលឆ្នាំសិក្សាថ្មីនេះ និងគោរពឱ្យបានត្រឹមត្រូវលើវិធានការពារ ការឆ្លងរីករាលដាលនៃជំងឺ covid-19 តាមរយៈការធ្វើអនាម័យជាប្រចាំ រក្សាគម្លាតសង្គម និងពាក់ម៉ាសឱ្យបានខ្ជាប់ខ្ជួន និងត្រូវគោរពតាមគោលការណ៍ប្រតិបត្តិស្តង់ដារSOP របស់ក្រសួងអប់រំ យុវជន និងកីឡា ព្រមទាំង ការណែនាំរបស់ក្រសួងសុខាភិបាល។
ជាទីបញ្ចប់ ឯកឧត្ដមរដ្ឋមន្រ្តី បានប្រគល់ជូនជាថវិកា សម្ភារសិក្សាមួយចំនួន និងកង់ចំនួន២២៩គ្រឿង ដល់លោកគ្រូ អ្នកគ្រូ សិស្សានុសិស្ស។ ជាពិសេស ឯកឧត្ដម នឹងប្រគល់ជូនអគារសិក្សាថ្មីមួយខ្នងជូនដល់សាលាបឋមសិក្សាត្រពាំងទ្រាំងក្នុងពេលឆាប់ៗនេះផងដែរ៕