នៅទីស្តីការក្រសួងបរិស្ថាន ព្រឹកថ្ងៃទី១៩ ខែមេសានេះ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតី និងដឹកនាំគណៈកម្មាធិការប្រតិបត្តិ (EXCOM) ក្រសួងបរិស្ថាន ដោយមានការចូលរួមពីថ្នាក់ដឹកនាំ គ្រប់អង្គភាពចំណុះក្រសួងបរិស្ថាន និងមន្ទីរបរិស្ថាន ទាំង២៥ រាជធានី-ខេត្ត។
កិច្ចប្រជុំនេះ ផ្តោតសំខាន់ទៅលើ៖ ១) លទ្ធផលនៃការអនុវត្តកម្មវិធីការកែទម្រង់ហិរញ្ញវត្ថុសាធារណៈ ២) ការពង្រឹងការអនុវត្តថវិកាកម្មវិធី ដើម្បីសម្រេចបានសូចនាករ ៣) ការពង្រឹងស្ថាប័ន និងភាពជាម្ចាស់រួមទាំងមានការទទួលខុសត្រូវខ្ពស់ក្នុងការដឹកនាំ ក៏ដូចជាការអនុវត្តសកម្មភាពការងារនៅក្នុងស្ថាប័នប្រកបដោយប្រសិទ្ធភាព។
ជាមួយគ្នានេះ ឯកឧត្តមរដ្ឋមន្ត្រី បានផ្តល់អនុសាសន៍មួយចំនួនដើម្បីអនុវត្តន៍បន្តរួមមាន៖ ១) ការអភិវឌ្ឍន៍តំបន់ឧទ្យានជាតិ ឱ្យមានលក្ខណៈជាស្តង់ដា និងពង្រឹងសេវាកម្មល្អ ដើម្បីទាក់ទាញភ្ញៀវទេសចរណ៍ ២) ការគិតគូរពីសារធាតុគ្រោះថ្នាក់ ដើម្បីកាត់បន្ថយផលប៉ះពាល់សុខភាពប្រជាជន ៣) ពង្រឹងនិងយកចិត្តទុកដាក់ការរស់នៅរបស់ប្រជាសហគមន៍ ក្នុងតំបន់ការពារធម្មជាតិ ៤) ពង្រឹងការអប់រំផ្សព្វផ្សាយបរិស្ថានតាមគ្រប់មធ្យោបាយ ដូចជាការបញ្ចាំងភាពយន្ត និងស្ពតអប់រំ ៥)ការលើកទឹកចិត្ត និងផ្តល់រង្វាន់ដល់អ្នកចូលរួមក្នុងកិច្ចគាំពារបរិស្ថានជាមួយស្ថាប័នឯកជន និងការរចនារង្វាន់លើកទឹកចិត្ត ៦) ការពិនិត្យលទ្ធភាពសាងសង់អគារបន្ថែមសម្រាប់មជ្ឈមណ្ឌលជីវៈចម្រុះ និងមន្ទីរពិសោធន៍ជាតិ
និង ៧) និងការពិនិត្យលទ្ធភាពរៀបចំយានដ្ឋានសម្រាប់មន្ត្រីបរិស្ថាន៕
