គណៈប្រតិភូកម្ពុជាដឹកនាំដោយ ឯកឧត្តមបណ្ឌិត ថោង ខុន រដ្ឋមន្រ្ដីក្រសួងទេសចរណ៍
ចូលរួមសន្និសីទផ្សព្វផ្សាយគោលដៅទេសចរណ៍កម្ពុជា “Cambodia Tourism Roadshow”
ថ្ងៃទី០១ ខែឧសភា ឆ្នាំ២០១៧នៅសណ្ឋាគារ ANA InterContinental Hotel, Tokyo, Japan
ក្រសួងទេសចរណ៍ដឹកនាំដោយ ឯកឧត្តមរដ្ឋមន្ត្រី ថោង ខុន និងដោយបានការចូលរួមគាំទ្រពីស្ថានឯកអគ្គរាជទូត កម្ពុជាប្រចាំប្រទេសជប៉ុន ទីភ្នាក់ងារទេសចរណ៍ជាតិជប៉ុន មជ្ឃមណ្ឌលអាស៊ាន-ជប៉ុន ស្ថានតំណាងក្រសួងទេសចរណ៍ កម្ពុជាប្រចាំប្រទេសជប៉ុន សមាគមន៍ទីភ្នាក់ងារទេសចរណ៍កម្ពុជា CATA និងផ្នែកឯកជនផ្សេងទៀតក្នុងឧស្សាហកម្មទេសចរណ៍និងឧស្សាហកមមធ្វើដំណើរ ជាអាទិ ក្រុមហ៊ុនអាកាសចរណ៍ ANA SCA សណ្ឋាគារសុខា រមនីយដ្ឋានទេសចរណ៍ vKirirum ។ល។បានរៀបចំ សន្និសីទផ្សព្វផ្សាយគោលដៅទេសចរណ៍កម្ពុជា “Cambodia Tourism Roadshow”នៅថ្ងៃទី០១ ខែឧសភា ឆ្នាំ២០១៧ ដោយមានការអញ្ជើញចូលរួមជាកិត្តិយសពី លោកជំទាវ ជាត គឹមថា ឯកអគ្គរាជទូតកម្ពុជាប្រចាំប្រទេសជប៉ុន លោក. Akihiko Tamura អគ្គលេខាធិការ ស្ថាប័នទេសចរណ៍ជាតិ នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន។
នៅក្នុងសន្និសីទផ្សព្វផ្សាយ “Cambodia Tourism Roadshow” មានការធ្វើបទបង្ហាញផ្សេងៗ អំពីការអភិវឌ្ឍ និងការរីកចំរើនវិស័យទេសចរណ៍ ផលិតផលនិងសេវាកម្ម ព្រមទាំងសក្ដានុពលវិនិយោគនៅកម្ពុជាជូនដល់ធុរៈជន ចំនួន ២០០នាក់ មកពី១៥០ក្រុមហ៊ុន ពាក់ព័ន្ធវិស័យទេសចរណ៍និងការដឹកជញ្ជូន។ សន្និសីទនេះជាឱកាសចំពោះប្រតិបត្តិករ និងទីភ្នាក់ងារទេសចរណ៍ ជប៉ុន-កម្ពុជា ជួបជុំផ្លាស់ប្ដូរបទពិសោធន៍ និងធ្វើធុរៈកិច្ចជាដៃគូជាមួយគ្នា។
ឯកឧត្តម ថោង ខុន រដ្ឋមន្រ្ដីក្រសួងទេសចរណ៍ បានថ្លែងទៅកាន់ធុរៈជន អ្នកសារព័ត៌មានដែលបានចូលរួមថាៈ ការរៀបចំសន្និសីទនេះជាពេលវេលាដ៏សមស្របក្នុងការផ្សព្វផ្សាយគោលដៅទេសចរណ៍កម្ពុជា បន្ទាប់ពីមានការហោះហើរត្រង់របស់ក្រុមហ៊ុនអាកាសចរណ៍ជប៉ុន All Nippon Airways (ANA) រវាងទីក្រុងតូក្យូ និងភ្នំពេញ។ ការតភ្ជាប់ផ្លូវអាកាសនេះបានជួយជំរុញអោយមាន លំហូរទេសចរ និងអ្នកវិនិយោគទុនជប៉ុនមានការកើនឡើង និងរមចំណែកដល់ការពង្រីកការប្រាស្រ័យទាក់ទងកាន់តែជិតស្និទ្ធរវាងប្រជាជនប្រទេសទាំងពីរ។ រាជរដ្ឋាភិបាលកម្ពុជា បាននិងកំពុងបន្តអភិវឌ្ឍវិស័យទេសចរណ៍ជាគោលដៅទេសចរណ៍វប្បធម៌ និងធម្មជាតិប្រកបដោយភាពទាក់ទាញ រួមជាមួយនិងការខិតខំ កសាងហេដ្ឋារចនាសម្ព័ន្ធ អភិវឌ្ឍផលិតផលទេសចរណ៍ថ្មីៗ និងការធ្វើអោយប្រសើរឡើងនូវគុណភាព សេវាកម្មទេសចរណ៍ ព្រមទាំងបង្កើនផ្សព្វផ្សាយពីគោលដៅទេសចរណ៍ថ្មីៗបន្ថែមទៀត ជាពិសេសតំបន់ឆ្នេរសមុទ្រដ៏ស្រស់ស្អាតក្នុងពិភពលោកនិងតំបន់អេកូទេសចរណ៍ដ៏ទាក់ទាញ។
ក្នុងពិធីនេះក៏មានរៀបចំពិធីសំែដងទស្សនិយភាពសិល្បះដោយក្រុមសិល្បះរបស់ក្រសួងវប្បធម៌និងវិចិត្រសិល្បះនិងការរៀបចំលៀងសាយភោជន៏ផងដែរ។
គួរបញ្ជាក់ផងដែរថា ក្នុងឆ្នាំ២០១៦ កម្ពុជាទទួលបានទេសចរអន្តរជាតិចំនួនជាង ៥លាននាក់ កើនឡើង៥% ក្នុងនោះទេសចរជប៉ុនមានចំនួន ជិត២០ម៉ឺននាក់ ហើយនៅក្នុងរយៈពេល០២ខែដើមឆ្នាំ ២០១៧ កម្ពុជាទទួលបានទេសចរអន្តរជាតិចំនួន ១,៣ លាននាក់ ព្រមជាមួយទេសចរជប៉ុនចំនួន ជាង៤ម៉ឺននាក់ កើនឡើង១៤% ព្រមជាមួយនោះ ទេសចរកម្ពុជាក៏បានទៅទស្សនាជប៉ុន ចំនួន ១ម៉ឺន ២ពាន់នាក់ ផងដែរក្នុងឆ្នាំ ២០១៦។ ក្នុងឆ្នាំ២០១៧ កម្ពុជានឹងទទួលបានទេសចរអន្តរជាតិប្រមាណ ៥,៤លាននាក់ និងឆ្នាំ២០២០ កម្ពុជារំពឹងថានឹងទទួលបានទេសចរអន្តរជាតិប្រមាណ ៧លាននាក់ ដោយក្នុងនោះរំពឹងថានឹងទទួលបានទេសចរជប៉ុនប្រមាណ ៣៥ម៉ឺននាក់។
