ឯកឧត្តម អ៊ុន ចាន់ដា អភិបាល នៃគណអភិបាល ខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជម្ងឺកូវីដ ១៩ បានលើកទឹកចិត្ត ដល់ក្រុមគ្រូពេទ្យ ត្រូវសាមគ្គីគ្នា ក្នុងយុទ្ធនាការ ការទប់ស្កាត់បង្ការជម្ងឺកូវីដ ១៩ ដើម្បី កាត់ផ្តាច់ខ្សែចម្លងវីរុសមួយនេះ ខណៈដែលតួលេខអ្នកជម្ងឺនេះ នៅក្នុងខេត្តកំពង់ចាម បន្តហក់ឡើងខ្ពស់ ។ ថ្លែងយ៉ាងដូច្នេះនៅក្នុងឱកាសដោនឯកឧត្តមរួមជាមួយនឹង ឯកឧត្តម ខ្លូត ផន ប្រធានក្រុមប្រឹក្សាខេត្តអមដំណើរ ដោយឯកឧត្តម លោកជំទាវ ជាអភិបាលរងខេត្ត ថ្នាក់ដឹកនាំមន្ទីរ អង្គភាពពាក់ព័ន្ធនិងអាជ្ញាធរមូលដ្ឋាន អញ្ជើញ សំណេះសំណាល និងចុះ សួរសុខទុក្ខ ក្រុមគ្រូពេទ្យ កងយោធពលខេមរភូមិន្ទ ចាក់វ៉ាក់សាំង កូវីដ-១៩ នៅមន្ទីរពេទ្យយោធភូមិភាគទី២ (7D) ក្នុងភូមិអំពិលក្រោម ឃុំអំពិល ស្រុកកំពង់សៀម ខេត្តកំពង់ចាម នាព្រឹកថ្ងៃទី២០ ខែឧសភា ឆ្នាំ២០២១ នេះ ។
ឯកឧត្តម អ៊ុន ចាន់ដា មានប្រសាសន៍ថា មកដល់ថ្ងៃនេះ តួលេខអ្នកជម្ងឺកូវីដ ១៩ នៅខេត្តកំពង់ចាម បានឆ្លងក្នុងព្រឹត្តិការណ៍ សហគមន៍ ២០ កុម្ភ: បានហក់ឡើងចំនួន ៣០៧នាក់ ដែលជាតួលេខខ្ពស់ បន្ទាប់ពីបានរកឃើញកម្មករ កម្មការិនី ប្រមាណ ៥២ នាក់បន្ថែមទៀត កាលពីថ្ងៃទី ១៩ ឧសភា ទៅនោះ ។ ឯកឧត្តមអភិបាល ខេត្តកំពង់ចាម បានថ្លែងថា នៅចំពោះមុខ យើងបាន និងកំពុងស្វែងរក អ្នកប៉ះពាល់ផ្ទាល់ ជាមួយនឹងអ្នកជំងឺនេះចំនួន ៥២នាក់ បន្តទៀត ដើម្បី យកសំណាកពួកគាត់មកធ្វើតេស្តរហ័ស គឺប្រមូលកុំឱ្យចម្លងចូល ដល់ក្នុងសហគមន៍ បន្តទៀត ។ ទន្ទឹមនឹងនោះ មកដល់ពេលនេះ យើងបានចាត់វិធានការ បិទផ្អាកផលិតកម្ម ជាបណ្តោះអាសន្ន នូវរោងចក្រកាត់ដេរ ចំនួន ៤កន្លែង ដែលកំពុងប៉ះពាល់នឹងជម្ងឺកូវីដ ១៩ ។
ក្នុងឱកាសនោះ ឯកឧត្តមអភិបាលខេត្ត ក៏បាននាំអំណោយ របស់រដ្ឋបាលខេត្តកំពង់ចាម ផ្តល់ជូនក្រុមគ្រូពេទ្យចាក់ វ៉ាក់សាំង ការពារជំងឺកូវីដ ១៩ ចំនួន ១៨៤នាក់ ម្នាក់ៗទទួលបាន÷ អង្ករ ២៥ គីឡូក្រាម មី ១កេស ត្រីខ ១យួរ និងថវិកា ៥០.០០០ រៀល ។ ផ្តល់ជូនខាងមន្ទីរពេទ្យ ភូមិភាគ២ ចំនួន ១០.០០០ម៉ាស់ និងជែលលាងដៃ ៥០កាន ផងដែរ ៕