ខេត្តកំពង់ចាម ៖ នៅព្រឹកថ្ងៃទី ១៦ ខែឧសភា ឆ្នាំ២០១៧ មានពិធីចែកអំណោយជូនក្រុមគ្រួសារដែលមានជីវភាពខ្វះខាត និងជួបការលំបាកដែលរស់នៅក្នុងភូមិដំណាក់ព្រីងកើត និងភូមិរកាកោងត្បូង សិត្ថក្នុងឃុំមហាលាភ ស្រុកកោះសូទិន ខេត្តកំពង់ចាម ដោយមានការអញ្ចើញក្រោយអធិបតីភាពលោកជំទាវ ទេព រង្ស៊ី ភរិយាឯកឧត្តម ខៀវ កាញារឹទ្ធ រដ្ឋមន្ត្រី ក្រសួងព័ត៍មាន និងសហការីក្រសួងព័ត៍មានជាច្រើននាក់ទៀត។
ក្នុងពិធីសំណេះសំណាលនោះដែរ លោកជំទាវ ទេព រង្សី អមដំណើរដោយលោកជំទាវ អគ្គនាយក លោក លោកស្រី សហការីក្រសួងព័ត៍មានបានសួរសុខទុក្ខលោកតាលោកយាយដែលមានជីវភាពខ្វះខាត និងជួបការលំបាកក្នុងស្ថានភាពគ្រួសាររស់នៅពេលបច្ចុប្បន្ន ក្រោយការដឹកនាំរបស់ប្រមុខរាជរដ្ឋាភិបាល សម្តេចតេជោ ហ៊ុន សែន តែងតែជួយដល់ការលំបាកដល់ជីវភាពរស់នៅរបស់ប្រជាពលរដ្ឋតាមមូលដ្នាន។
ឆ្លៀតក្នុងឳកាសនោះដែរ លោកជំទាវ ទេព រង្សី និងលោកជំទាវ លោក លោកស្រី សហការីក្រសួងព័ត៍មានបានចែកអំណោយដល់ក្រុមគ្រួសារចំនួន ១២គ្រួសារដោយក្នុងមួយៗគ្រួសារទទួលបាន៖ ចំពោះគ្រួសារ១០ទទួលបានឃិតមួយកញ្ចប់ធំ អង្គរ២០គីឡូក្រាម ស្ករស១គីឡូក្រាម ទឹកត្រី២ដប ទឹកស៊ីអ៊ីវ២ដប ទឹកសុទ្ធ១កេះ មី១កេះ អំបិល២កញ្ចប់ មុង១ ភួយ១ និងថវិកាមួយចំនួនទៀត។
ចំណែកឯគ្រួសារ២ទៀតដែលមានសមាជិកច្រើនទទួលបានឃិតមួយកញ្ចប់ធំ អង្គរ៨០គីឡូក្រាម ស្ករស៣គីឡូក្រាម ទឹកត្រី៦ដប ទឹកស៊ីអ៊ីវ៦ដប ទឹកសុទ្ធ៣កេះ មី៣កេះ អំបិល៣កញ្ចប់ មុង២ ភួយ២ និងថវិកាមួយចំនួនទៀត៕
