(តួកគី)៖ ក្រុមការងារសម្របសម្រួលការទូតសេដ្ឋកិច្ចនៃក្រសួងការបរទេស និងសហប្រតិបត្តិការអន្តរជាតិ (កបទ.សអ)កម្ពុជា កាលពីថ្ងៃទី២២ ខែកុម្ភៈ ឆ្នាំ២០២២ បានជួបពិភាក្សាការងារជាមួយក្រុមប្រឹក្សាទំនាក់ទំនងសេដ្ឋកិច្ចបរទេសតួកគី (DEIK) ដើម្បីពង្រឹង និងពង្រីកកិច្ចសហប្រតិបត្តិការ សេដ្ឋកិច្ច និងពាណិជ្ជកម្មរវាងប្រទេសទាំងពីរ។
កម្មវិធីនេះ ប្រព្រឹត្តិទៅក្រោមវត្តមានរបស់ ឯកឧត្តម ប្រាក់ ផល្លា ទីប្រឹក្សាសម្តេចតេជោ ហ៊ុន សែន និងជាតំណាងលោកឧបនាយករដ្ឋមន្រ្តី ប្រាក់ សុខុន និង លោក សន ច័ន្ទរិទ្ធី តំណាងលោកប្រធានក្រុមការងារសម្របសម្រួលការទូតសេដ្ឋកិច្ច ដោយមានការចូលរួមពីតំណាងក្រុមប្រឹក្សាទំនាក់ទំនងសេដ្ឋកិច្ចបរទេសតួកគី សរុបប្រមាណជាង ២០នាក់។
កិច្ចពិភាក្សានេះ ផ្តោតលើប្រធានបទសំខាន់មួយចំនួនដូចជា ការផ្សព្វផ្សាយច្បាប់វិនិយោគថ្មីរបស់កម្ពុជា ការលើកកម្ពស់ពាណិជ្ជកម្ម និងការជំរុញវិស័យទេសចរណ៍ និងវប្បធម៌។
គោលបំណងនៃការរៀបចំកិច្ចប្រជុំនេះ គឺដើម្បីជួយត្រួសត្រាយផ្លូវដល់ធុរជន និងវិនិយោគិនតួកគី អាចស្វែងយល់ពីឱកាសវិនិយោគនៅកម្ពុជា តាមរយៈច្បាប់វិនិយោគថ្មីដែលមានភាពអនុគ្រោះច្រើន ពង្រីកឱកាសទីផ្សាររបស់កម្ពុជា តាមរយៈអនុវត្តកិច្ចព្រមព្រៀងសេរីទ្វេភាគី និងពហុភាគី និងការផ្សព្វផ្សាយពីវិស័យទេសចរណ៍កម្ពុជា តាមរយៈវិធានការនានារបស់រាជរដ្ឋាភិបាល រួមមានការបើកទទួលទេសចរណ៍វ៉ាក់សាំង បន្ទាប់ពីជោគជ័យនៃយុទ្ធនាការចាក់វ៉ាក់សាំងដែលកម្ពុជា សម្រេចបានជិត ៩០% នៃចំនួនប្រជាជនសរុប និងកម្មវិធីស្តារនិងលើកស្ទួយវិស័យទេសចរណ៍កម្ពូជាក្នុងនិងក្រោយវិបត្តិជំងឺកូវីដ-១៩ព្រមទាំងជំរុញការធ្វើដំណើរទៅវិញទៅមករវាងប្រទេសទាំងពីរ។
ក្រោយកិច្ចប្រជុំបានបញ្ចប់ គណប្រតិភូក៏បានអញ្ជើញទទួលទានអាហារថ្ងៃត្រង់ជាមួយនឹងសភាពាណិជ្ជកម្មតួកគី ដើម្បីរឹតចំណងមិត្តភាព ជាពិសេសក្នុងឱកាសខួបលើកទី ៦៣ នៃទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋតួកគីផងដែរ៕
