(កំពង់ធំ)៖ ឯកឧត្តម ចាយ បូរិន សមាជិគណៈកម្មាធិការកណ្តាលគណបក្សប្រជាជនកម្ពុជា និងជាប្រធានផ្នែកឃោសនាអប់រំ នៃយុវជនគណបក្សថ្នាក់កណ្តាល តំណាងឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ ណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវ ពេជ ចន្ទមុន្នី នៅព្រឹកថ្ងៃទី២៣ ខែមីនា ឆ្នាំ២០២២នេះ បានដឹកនាំប្រតិភូយុវជនគណបក្សថ្នាក់កណ្តាល ចុះសួរសុខទុក្ខឯកឧត្តម អ៊ុន នឹង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាទីប្រឹក្សាជាន់ខ្ពស់រដ្ឋសភា ដែលកំពុងមានជំងឺសម្រាកព្យាបាលនៅគេហដ្ឋាន ស្ថិតនៅភូមិតាអោក ឃុំឈូក ស្រុកប្រាសាទសំបូរ ខេត្តកំពង់ធំ។
នាឱកាសនោះដែរឯកឧត្តម ចាយ បូរិន បានផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជាថ្នាក់ដឹកនាំគណបក្សគ្រប់លំដាប់ថ្នាក់ រួមនឹងឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ជូនចំពោះឯកឧត្តម អ៊ុន នឹង និងភរិយា ព្រមទាំងក្រុមគ្រួសារ។
ប្រធានប្រតិភូបានលើកឡើងថា គណបក្សប្រជាជនកម្ពុជា តែងតែរក្សាចាស់បង្កើនថ្មី ហើយជានិច្ចជាកាល សម្តេច និងថ្នាក់ដឹកនាំគណបក្សគ្រប់ជាន់ថ្នាក់តែងតែយកចិត្តទុកដាក់ គិតគូរដល់សុខទុក្ខ និងជីវភាពរស់នៅ របស់ឥស្សរជនស្នេហាជាតិ ចាស់ព្រឹទ្ធាចារ្យ និវត្តន៍ជន និងសមាជិក សមាជិកាគណបក្សទាំងអស់ ដែលមានគុណបំណាច់ ចំពោះគណបក្ស និងប្រទេសជាតិមាតុភូមិ។
ប្រតិភូយុវជនថ្នាក់កណ្តាល បានសម្ដែងនូវមនោសញ្ចេតនា និងការគោរព ដឹងគុណ កោតសរសើរដោយស្មោះចំពោះវីរភាព និងស្នាដៃដ៏ធំធេងជាច្រើន មិនអាចកាត់ថ្លៃបាន របស់ឯកឧរ្រម អ៊ុន នឹង ដែលបានចូលរួមចំណែកក្នុងការស្តារ កសាង និងអភិវឌ្ឍន៍ប្រទេសជាតិ ជារៀងរហូតមក ជាពិសេសលោកបានបំពេញការងារយ៉ាងសកម្មជាច្រើនអាណត្តិ ទាំងនៅក្នុងក្របខ័ណ្ឌនីតិប្រតិបត្តិ និងស្ថាប័ននីតិប្បញ្ញតិ និងមានវីរភាព ក្នុងការបម្រើផលប្រយោជន៍គណបក្សនៅគ្រប់កាលៈទេស:។
បន្ថែមពីនេះ ប្រធានប្រតិភូ និងសមាជិកទាំងអស់ បានចាត់ទុកគុណបំណាច់របស់ឯកឧត្តម អ៊ុន នឹង នាពេលកន្លងមក ជាកេរ្តិ៍ដំណែល និងជាគំរូដ៏ល្អ សម្រាប់យុវជនជំនាន់ក្រោយៗ បានរៀនសូត្រ និងអនុវត្តតាម។
សូមរម្លឹកថា ឯកឧត្តមបណ្ឌិត ហ៊ុន ម៉ាណែត តែងតែណែនាំដល់ថ្នាក់ដឹកនាំយុវជនគ្រប់ផ្នែក គ្រប់ជាន់ថ្នាក់ យកចិត្តទុកដាក់ពីសុខទុក្ខ និងជីវភាពរស់នៅ របស់ចាស់ព្រឹទ្ធាចារ្យ ឥស្សរជនគណបក្សទាំងអស់ ដែលលោកកំពុងស្ថិតនៅក្នុងវ័យជរា ឬមានជំងឺត្រូវសហការគ្នា ចុះសួរសុខទុក ផ្តល់កម្លំាងចិត្ត ជូនឯកឧត្តមជាប្រចាំពីព្រោះថាចាស់ព្រឹទ្ធាចារ្យ រៀមច្បងជំនាន់មុន បានធ្វើពលីកម្មដ៏ធំធេង និងសម្រេចបានសមិទ្ធផលជាច្រើន សម្រាប់ប្រទេសជាតិ និងប្រជាជនដែលយុវជនជាអ្នកបន្តវេន ត្រូវសម្ដែងការដឹងគុណ ចំពោះថ្នាក់ដឹកនាំជំនាន់មុន ហើយខិតខំថែរក្សា មរតកដ៏ថ្លៃថ្លា និងកសាងឱ្យបាននូវសមិទ្ធផលថ្មីៗ បន្ថែមទៀត។
ក្នុងឱកាសដ៏មានអត្ថន័យនេះដែរ ឯកឧត្តម ចាយ បូរិន រួមជាមួយសមាជិកផ្នែកឃោសនាអប់រំ នៃយុវជនគណបក្សថ្នាក់កណ្តាល បានប្រគល់ជូនវត្ថុអនុស្សារីយ៍ និងថវិកាចំនួន៤លានរៀល របស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ជូនឯកឧត្តម អ៊ុន នឹង និងបានបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិក្នុងលោក ទេវតាថែរក្សាព្រះរាជាណាចក្រកម្ពុជា សូមតាមជួយបីបាច់ថែរក្សា ឯកឧត្តម អ៊ុន នឹង ឆាប់បានជាសះស្បេីយ ពីជំងឺដង្កាត់នានា មានសុខភាពល្អ កម្លាំងមាំមួន និងមានជន្មាយុយឺនយូរ។
លោកជំទាវ ហ៊ុយ ហុកឃី អ៊ុននឹង និងក្រុមគ្រួសារ បានថ្លែងអំណរគុណយ៉ាងជ្រាលជ្រៅ ចំពោះប្រតិភូ ចុះសួរសុខទុក្ខ ជាពិសេសឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ដែលតែងតែយកចិត្តទុកដាក់ពីសុខទុក្ខ ផ្តល់ភាពកក់ក្តៅ និងក្តីសង្ឃឹមជូនដល់ចាស់ព្រឹទ្ធាចារ្យ ឥស្សរជនគណបក្ស ស័ក្កិសមជា អ្នកបន្តវេន ពោពេញដោយគុណធម៌ សមត្ថភាព ជាទំពំាងស្នងឫស្សីរបស់គណបក្ស និងប្រទេសជាតិទៅថ្ងៃអនាគត៕
