ក្រសួងពាណិជ្ជកម្មបានចេញសេចក្តីជូនដំណឺង នូវការកំណត់លក់តម្លៃប្រេងសាំង និងម៉ាស៊ូត ដល់បណ្តាក្រុមហ៊ុននានា ដើម្បីឱ្យតម្លាភាពជួនអតិថិជន ។
គួររំលឹកថា កន្លងមក ការតម្លើងតម្លៃប្រេងឡើង-ចុះ ដែលលក់តាមបណ្តាក្រុមហ៊ុនប្រេងឥន្ធនៈ បានធ្វើឡើងមិនស្របនឹងការពិត នៃតម្លៃឡើង-ចុះរបស់ប្រេងឥន្ធនៈ លើទីផ្សារពិភពលោកនោះឡើយ ដែលកត្តានេះ ត្រូវគេឃើញបានជម្រុញឱ្យក្រសួងពាណិជ្ជកម្ម បានប្រញាប់ចាត់វិធានការណ៍ ។
យោងតាមសេចក្តីជូនដំណឹងមួយ ចុះថ្ងៃទី១៤ មិនានេះ ការកំណត់រូបមន្តបានតម្រូវឲ្យលក់ដូចតទៅៈ តម្លៃប្រេងសាំងស៊ុបពែរ ចុះថ្លៃពី ៣៦៥០ ដល់ ៣១៥០រៀល ក្នុង ១លីត្រ… តម្លៃប្រេងសាំងធម្មតាចុះថ្លៃពី ៣៣៥០ ដល់ ៣០៥០រៀល ក្នុង ១លីត្រ… និងប្រេងម៉ាស៊ូត ចុះថ្លៃពី ៣១០០ ដល់ ២៧០០រៀល ក្នុង ១លីត្រ ។
ក្រសួងពាណិជ្ជកម្មបានថ្លែងថា ចំណែកស្ថានីយប្រេងឥន្ធន: ជាដេប៉ូឯកជនផ្ទាល់ខ្លួន ដែលមានលទ្ធភាពលក់រាយប្រេងសាំង និងប្រេងម៉ាស៊ូត ក្នុងតម្លៃថោកជាងតម្លៃដែលបានកំណត់ ក្រសួងសូមជំរុញការលក់ក្នុងតម្លៃថោកនោះជាបន្តទៀត ។ នៅជាមួយគ្នានេះដែរ តាមបណ្តាក្រុមហ៊ុនលក់ប្រេងឥន្ធនៈ ត្រូវគេកត់សម្គាល់ថា បានអនុវត្តតម្លៃតាមការកំណត់របស់ក្រសួងពាណិជ្ជកម្មនេះផងដែរ ។
ក្រសួងពាណិជ្ជកម្ម បានអោយដឹងថា រៀងរាល់ដប់ថ្ងៃម្តង ក្រសួងនឹងចេញសេចក្តីជូនដំណឹង ដែលមានការកំណត់តម្លៃអតិបរមាជាថ្មីឡើងវិញ ។