អភិបាលខេត្តកំពង់ចាមឯកឧត្តម អ៊ុន ចាន់ដា នៅថ្ងៃទី១៤ ខែកក្កដា ឆ្នាំ២០២៣ បានដឹកនាំក្រុមការងារមន្ត្រីជំនាញពាក់ព័ន្ធ ចុះពិនិត្យវឌ្ឍនភាពការសាងសង់ផ្លូវក្រាលកៅស៊ូប្រភេទ DBST មួយខ្សែ មានប្រវែងជាង ១១ គីឡូម៉ែត្រ ពីឃុំអូរស្វាយ តភ្ជាប់ទៅឃុំស្រក ក្នុងស្រុកកំពង់សៀម ខេត្តកំពង់ចាម។
តាមមន្ត្រីរដ្ឋបាលស្រុកកំពង់សៀម បានឲ្យដឹងថា ផ្លូវក្រាលកៅស៊ូប្រវែងសរុប ១១,៦០០ម៉ែត្រ ឆ្លងកាត់ឃុំអូរស្វាយមានប្រវែង ៦,០០០ម៉ែត្រ កាត់ចំនួនបីភូមិ គឺភូមិអន្លង់ស្នូក ភូមិអូរស្វាយ និងភូមិត្រពាំងកក់ មានប្រជាពលរដ្ឋ ៩៥១ គ្រួសារ និងឃុំស្រក មានប្រវែង៥,៦០០ ម៉ែត្រ ឆ្លងកាត់ចំនួនពីរភូមិគឺ ភូមិព្រៃគុយ និងភូមិល្ពាក មានប្រជាពលរដ្ខ ៩៩៧គ្រួសារ។ ផ្លូវនេះដែរ ចាប់ផ្តើមបើកការដ្ឋានសាងសង់នៅដើម ខែគុម្ភ: ឆ្នាំ២០២៣ ហូតមកបច្ចុប្បន្ន ស្ថាបនាបាន ៨០% ហើយ។
មន្ត្រីដដែលបានបញ្ជាក់ថា ផ្លូវមួយខ្សែនេះ ពិតជាមានសារៈសំខាន់ និងបានតភ្ជាប់ពីតំបន់មួយទៅតំបន់មួយរបស់ស្រុកកំពង់សៀម ដែលអាចនិយាយបានថា ផ្លូវនោះជាសសៃឈាមសេដ្ឋកិច្ចដ៏សំខាន់សម្រាប់ប្រជាពលរដ្ឋរស់នៅ មានភាពប្រសើរឡើង ទាំងការធ្វើដំណើរ ក៏ដូចជាការដឹកកសិផលទៅរកទីផ្សារ និងការប្រកបមុខរបរចិញ្ចឹមជីវិតផ្សេងៗទៀត នៅក្នុងមូលដ្ឋានរបស់ខ្លួន៕
