ក្រុមហ៊ុនជំនាញផ្លូវដែករបស់ចិនចំនួនពីរទទួលបានភ្លើងខៀវពីរាជរដ្ឋាភិបាលកម្ពុជា ឱ្យសិក្សាលើគម្រោងផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលតភ្ជាប់រវាងរាជធានីភ្នំពេញ និងព្រលានយន្តហោះអន្តរជាតិតេជោ។
បន្ទាប់ពីទទួលបានភ្លើងខៀវពីរាជរដ្ឋាភិបាលកម្ពុជា ឱ្យសិក្សាលើគម្រោងដ៏មានសារៈសំខាន់ខាងលើនេះ ថ្នាក់ដឹកនាំក្រុមហ៊ុនឆាយណាមេត្រូ និងហ្គ័ងចូវមេត្រូ បានធ្វើដំណើរមកដល់ប្រទេសកម្ពុជាហើយ ដើម្បីជួបជាមួយស្ថាប័នពាក់ព័ន្ធឈានទៅសិក្សាគម្រោង។
នៅព្រឹកថ្ងៃចន្ទ ទី១៨ ខែមីនា ឆ្នាំ២០២៤នេះ គណៈប្រតិភូក្រុមហ៊ុនទាំងពីរ បានចូលរួមកិច្ចប្រជុំជាមួយក្រសួងស្ថាប័នពាក់ព័ន្ធរបស់កម្ពុជា ក្រោមការដឹកនាំរបស់ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា។ កិច្ចប្រជុំនេះ ក៏មានការអញ្ជើញចូលរួមពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន, ឯកឧត្តម គង់ សោភ័ណ អភិបាលខេត្តកណ្តាល ឯកឧត្តម នួន ផារ័ត្ន អភិបាលរងរាជធានីភ្នំពេញ ព្រមទាំងមន្ត្រីមកពីក្រសួងសេដ្ឋកិច្ច និងហិរញ្ញវត្ថុ និងតំណាងក្រុមហ៊ុន OCIC របស់អ្នកឧកញ៉ា ពុង ខៀវសែ ផងដែរ។
ជាកិច្ចចាប់ផ្តើមនៃកិច្ចប្រជុំនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានស្វាគមន៍គណៈប្រតិភូក្រុមហ៊ុនចិនទាំងពីរប្រកបដោយក្តីសោមនស្សរីករាយបំផុត។ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានគូសរំលេចថា ការរៀបចំប្រព័ន្ធដឹកជញ្ជូនក្នុងរាជធានីភ្នំពេញឱ្យបានល្អប្រសើរ គឺជាកិច្ចការដ៏សំខាន់ ហើយត្រូវបានយកចិត្តទុកដាក់ខ្ពស់ពីរាជរដ្ឋាភិបាលនីតិកាលចាស់ដឹកនាំដោយសម្តេចតេជោ ហ៊ុន សែន និងក្នុងនីតិកាលថ្មីដឹកនាំដោយសម្តេចមហាបវរធិបតី ហ៊ុន ម៉ាណែត។
ឯកឧត្តម ស៊ុន ចាន់ថុល បានឱ្យដឹងថា កម្ពុជាធ្លាប់បានអនុញ្ញាតឱ្យមានការសិក្សាជាច្រើនពាក់ព័ន្ធការដឹកជញ្ជូននេះ រួមមានការធ្វើរថភ្លើងលើអាកាស ដែលសិក្សាដោយចៃការបស់ជប៉ុនផងដែរ។ ប៉ុន្តែសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ចាប់អារម្មណ៍ខ្ពស់លើការធ្វើផ្លូវរថភ្លើងក្រោមដីច្រើនជាង។
ឯកឧត្តម ស៊ុន ចាន់ថុល បានលើកឡើងថា ផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលតភ្ជាប់រវាងរាជធានីភ្នំពេញ និងព្រលានយន្តហោះអន្តរជាតិតេជោ មានសារៈសំខាន់ខ្លាំងណាស់សម្រាប់សម្រួលការធ្វើដំណើរគ្រាដែលការចរាចរណ៍ក្នុងរាជធានីភ្នំពេញ កាន់តែកកស្ទះ។ លោកបន្តថា ការធ្វើផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលភ្ជាប់រវាងភ្នំពេញ និងព្រលានយន្តហោះអន្តរជាតិតេជោ បានជួយដល់សេដ្ឋកិច្ចកម្ពុជា និងផ្នែកបរិស្ថានថែមទៀតផង។
ឯកឧត្តមឧបនាយករដ្ឋមន្ត្រី ស៊ុន ចាន់ថុល បានណែនាំក្រុមហ៊ុនទាំងពីររបស់ចិន ធ្វើការផ្ទាល់ជាមួយលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ពន្លឿនការសិក្សាឱ្យបានលឿន ដើម្បីដាក់ជូនរាជរដ្ឋាភិបាលពិនិត្យ។
ឯកឧត្តម ស៊ុន ចាន់ថុល ក៏បានណែនាំដល់អាជ្ញាធរពាក់ព័ន្ធបង្កលក្ខណៈសម្បត្តិងាយស្រួលដល់ក្រុមហ៊ុនចិនទាំងពីរ ដើម្បីការសិក្សាបានលឿនរហ័ស។
ក្រុមហ៊ុនឆាយណាមេត្រូ និងហ្គ័ងចូវមេត្រា គឺជាក្រុមហ៊ុនដែលមានបទពិសោធន៍យូរឆ្នាំលើការសាងសង់ផ្លូវដែក។ ក្រុមហ៊ុនមិនត្រឹមតែបានចូលរួមអភិវឌ្ឍន៍ផ្លូវដែកក្នុងប្រទេសចិនប៉ុណ្ណោះ តែក៏បានសាងសង់ផ្លូវ ដែកនៅតាមបណ្តាប្រទេសនានាជាច្រើនផងដែរ។
តំណាងក្រុមហ៊ុនបានសម្តែងក្តីរីករាយចំពោះឱកាសបានសិក្សាគម្រោងធ្វើឱ្យប្រសើរប្រព័ន្ធដឹកជញ្ជូនក្នុងរាជធានីភ្នំពេញ ក៏ដូចជាការតភ្ជាប់ប្រព័ន្ធដឹកជាមួយព្រលានយន្តហោះអន្តរជាតិតេជោ។ តំណាងក្រុមហ៊ុន បានប្រកាសថា ជាមួយបទពិសោធន៍យូរឆ្នាំរបស់ក្រុមហ៊ុន គឺក្រុមហ៊ុននឹងប្រឹងប្រែងឱ្យអស់លទ្ធភាពប្រកបដោយការទទួលខុសត្រូវខ្ពស់ប្រមូលយកលទ្ធផលសិក្សាដ៏ល្អមួយលើគម្រោងខាងលើនេះ ជូនរាជរដ្ចាភិបាលកម្ពុជា។
ក្នុងកិច្ចប្រជុំនាព្រឹកមិញនេះ ក៏មានការចូលរួមជាមតិយោបល់ជាច្រើនពីសំណាក់តំណាងក្រសួង និងអាជ្ញាធរពាក់ព័ន្ធ។ ក្នុងនោះអភិបាលខេត្តកណ្តាល និងអភិបាលរងរាជធានីភ្នំពេញ បានប្រកាសត្រៀមខ្លួនផ្តល់កិច្ចសហការគ្រប់ពេលវេលាជាមួយក្រុមហ៊ុន ដើម្បីសម្រេចលទ្ធផលបានឆាប់រហ័ស៕
