(ភ្នំពេញ)៖ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានទទួលជួបសម្តែងការគួរសម និងពិភាក្សាការងារជាមួយឯកឧត្តម សាហារូឌីន ប៊ីន អន (SHAHARUDDIN BIN ONN) ឯកអគ្គរាជទូតម៉ាឡេស៊ី ប្រចាំព្រះរាជាណាចក្រកម្ពុជា នៅវិមានសន្តិភាព រាជធានីភ្នំពេញ នាព្រឹកថ្ងៃទី២៦ ខែមិថុនា ឆ្នាំ២០២៤។
ជាកិច្ចចាប់ផ្តើម ឯកឧត្តមបណ្ឌិត អូស្មាន ហាស្សាន់ បានសម្តែងការស្វាគមន៍យ៉ាងកក់ក្តៅជូនដល់លោក Shaharuddin Bin Onn និងបានអបអរសាទរដល់លោក ដែលទើបទទួលបានការតែងតាំងជាឯកអគ្គរាជទូតម៉ាឡេស៊ីប្រចាំនៅព្រះរាជាណាចក្រកម្ពុជា។
ក្នុងឱកាសនោះ ឯកឧត្តមបណ្ឌិតបានថ្លែងអំណរគុណប្រជាជន និងរដ្ឋាភិបាលម៉ាឡេស៊ី ដែលបានជួយប្រជាជនកម្ពុជាជាពិសេសសហគមន៍ឥស្លាមកម្ពុជា ចាប់តាំងពីទសវត្ស៨០រហូតដល់បច្ចុប្បន្ន។
ឯកឧត្តមបណ្ឌិត ក៏បានជម្រាបជូនពីវឌ្ឍនភាពនៃការអភិវឌ្ឍន៍សហគមន៍ឥស្លាមកម្ពុជា ដែលទទួលបានការយកចិត្តទុកដាក់ខ្ពស់ពីរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តមក សម្តេចធិបតីនាយករដ្ឋមន្ត្រីបច្ចុប្បន្ន។
លើសពីនេះទៅទៀត សហគមន៍ឥស្លាមកម្ពុជា ត្រូវបានអនុញ្ញាតឲ្យមានតំណាងសហគមន៍ខ្មែរឥស្លាម បានក្លាយជាថ្នាក់ដឹកនាំក្នុងស្ថាប័ន នីតិប្បញ្ញត្តិ និងនីតិប្រតិបត្តិ ដើម្បីជួយសម្របសម្រួល និងដោះស្រាយរាល់បញ្ហាជូនសហគមន៍ឥស្លាមឲ្យបានទាន់ពេលវេលា។
ទន្ទឹមគ្នានេះ ឯកឧត្តមបណ្ឌិត បានស្នើរដ្ឋាភិបាលម៉ាឡេស៊ី ជួយអភិវឌ្ឍន៍លើឧស្សាហកម្មហាឡាល និងការបណ្តុះបណ្តាលធនធានមនុស្សលើវិស័យហាឡាល នៅកម្ពុជា និងស្នើរដ្ឋាភិបាលម៉ាឡេស៊ីជួយផ្តល់អាហារូបករណ៍ដល់និស្សិតកម្ពុជា លើជំនាញវិទ្យាសាស្ត្រសង្គម និងវិទ្យាសាស្ត្រ ដូចជា សេដ្ឋកិច្ច ពាណិជ្ជសាស្ត្រ ច្បាប់ វិស្វករ និងបច្ចេកវិទ្យាឌីជីថល។
ឯកឧត្តម Shaharuddin Onn ឯកអគ្គរដ្ឋទូតម៉ាឡេស៊ីប្រចាំកម្ពុជា បានអរគុណលោកទេសរដ្ឋមន្ត្រី ដែលអនុញ្ញាតិទទួលជួបដើម្បីសម្តែងការគួរសម និងបានវាយតម្លៃខ្ពស់ចំពោះសមិទ្ធផលដែលសហគមន៍ឥស្លាមកម្ពុជា សម្រេចបាន។
ជាមួយគ្នានេះ ឯកឧត្តមបានកោតសរសើររាជរដ្ឋាភិបាលកម្ពុជា ចំពោះគោលនយោបាយសុខដមនីយកម្ម និងបរិយាបន្ន ដោយបានរួមបញ្ចូលសហគមន៍ឥស្លាម ក្នុងការចូលរួមអភិវឌ្ឍន៍ប្រទេសជាតិ។
ជាចុងក្រោយ ឯកឧត្តមលើកឡើងថា ម៉ាឡេស៊ីនឹងយកចិត្តទុកដាក់តាមដាន នូវរាល់សំណើគាំទ្រលើឧស្សាហកម្មហាឡាល ដែលប្រមុខរាជរដ្ឋាភិបាល នៃប្រទេសទាំងពីរ បានឯកភាពគ្នារួច៕
