នៅថ្ងៃព្រហស្បតិ៍ ១៥កើត ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៧ ខែតុលា ឆ្នាំ២០២៤ នេះ នៅសាលប្រជុំរំដួលនៃទីស្តីការក្រសួង ឯកឧត្តម ចាន់ ស៊ីណាត រដ្ឋលេខាធិការ ដោយមានការអនុញ្ញាតដ៏ខ្ពង់ខ្ពស់ពីឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំពិភាក្សាការងារជាមួយគណៈប្រតិភូក្រុមការងារប្រើប្រាស់ថាមពលពន្លឺព្រះអាទិត្យរបស់ធនាគារអភិវឌ្ឍន៍អាស៊ី(ADB) ដែលជាម្ចាស់គម្រោងនៃការប្រើប្រាស់ថាមពលពន្លឺព្រះអាទិត្យក្នុងវិស័យគ្រប់គ្រងធនធានទឹក និងឧតុនិយមនៅក្នុងព្រះរាជាណាចក្រកម្ពុជា។
សូមជម្រាបថា កិច្ចប្រជុំពិភាក្សានេះមានការអញ្ជើញចូលរួមពីសំណាក់ឯកឧត្តមរដ្ឋលេខាធិការ អនុរដ្ឋលេខាធិការ អគ្គលេខាធិការរង លោកប្រធាន អនុប្រធាននាយកដ្ឋានពីគ្រប់នាយកដ្ឋានចំណុះ ប្រធាន អនុប្រធានមន្ទីរធនធានទឹក និងឧតុនិយមគ្រប់ខេត្តគោលដៅ មន្រ្តីក្រុមការងារទាំងអស់នៃអង្គភាពគ្រប់គ្រង និងអនុវត្តគម្រោងរបស់ក្រសួង(PMU) និងក្រុមទីប្រឹក្សាជាតិ និងអន្តរជាតិប្រចាំក្រសួង។
ឯកឧត្តមរដ្ឋលេខាធិការបានបញ្ជាក់ឱ្យដឹងថា កិច្ចប្រជុំនាពេលនេះបានទទួលលទ្ធផលជោគជ័យល្អប្រសើរដែលឈានទៅអនុវត្តការងារដាក់បន្ទះស្រូបពន្លឺព្រះអាទិត្យក្នុងតំបន់អាងទឹក នៅតាមបណ្តាខេត្តគោលដៅ នាពេលដ៏ខ្លីខាងមុខនេះ ក្នុងគម្រោងកិច្ចសហប្រតិបត្តិការត្រីភាគីរវាងក្រសួងធនធានទឹក និងឧតុនិយម ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) ដែលរួមមាន គម្រោងកែលម្អវិស័យធារាសាស្រ្ត គម្រោងគ្រប់គ្រងវិស័យធនធានទឹកដោយវិធានការចម្រុះ គម្រោងពង្រឹងពង្រីកវិស័យធារាសាស្រ្តក្នុងការទប់ទល់ទៅនឹងបម្រែបម្រួលអាកាសធាតុ គម្រោងកសាងហេដ្ឋារចនាសម្ព័ន្ធទឹកដើម្បីលុបបំបាត់ចោលនូវគ្រោះទឹកជំនន់ និងហានិភ័យដែលកើតឡើងពីគ្រោះរាំងស្ងួតក្នុងក្របខ័ណ្ឌទូទាំងប្រទេស និងបណ្តាគម្រោងដទៃទៀតជាច្រើន៕
