ទឹកប្រាក់ប្រមាណជិត ២០ម៉ឺនដុល្លារ ត្រូវបានរដ្ឋាភិបាលជប៉ុន ប្រគល់មកឱ្យមន្ទីរសាធារណការខេត្តចំនួន២ ដើម្បីកសាងហេដ្ឋារចនាសម្ព័ន្ធ ។ ទឹកប្រាក់ចំនួន ១៧៧.៨២១ ដុល្លារអាម៉េរិក ជាជំនួយឥតសំណងរបស់ជប៉ុន នៃគំរោងគូសាណូណិ បានប្រគល់ជូនខេត្តឧត្តរមានជ័យ និងខេត្តព្រះវិហារ នៅថ្ងៃទី២៨ ខែមីនានេះ ក្នុងពិធីមួយក្នុងស្ថានទូតជប៉ុន ប្រចាំកម្ពុជា ។ មន្ត្រីតំណាងស្ថាប័នទទួលជំនួយទាំង២ខេត្ត បានអញ្ជើញចូល រួមក្នុងពិធីនេះ ក្រោមវត្តមានរបស់ ឯកអគ្គរដ្ឋទូតជប៉ុន ប្រចាំកម្ពុជា លោក គូម៉ាម៉ារ៉ូ យូជិ ។
ប្រាក់ជំនួយទាំង២ខេត្តនោះ គឺសម្រាប់សាងសង់ស្ពានបេតុងថ្មី ១កន្លែង ឈ្មោះស្ពានដងទង់ មានប្រវែង ១៥ម៉ែត្រ ក្នុងស្រុកសំរោង ខេត្តឧត្តរមានជ័យ ក្នុងទឹកប្រាក់ចំនួន ៩០,៣៥០ដុល្លារ ។ គម្រោងសាងសង់មួយទៀត គឺសម្រាប់គម្រោងកែលំអផ្លូវក្នុងឃុំឆែប២ ស្រុកឆែប ខេត្តព្រះវិហារ ដែលនឹងត្រូវស្ថាបនាផ្លូវគ្រួសក្រហមមួយខ្សែ ប្រវែង ៤ពាន់ម៉ែត្រ និងលូចំនួន៦ កន្លែងក្នុងឃុំឆែបពីរ ក្នុងទឹកប្រាក់ ៨៧,៤៧១ ដុល្លារអាម៉េរិក ។
ស្ថានទូតជប៉ុនបានឱ្យដឹងថា រដ្ឋាភិបាលជប៉ុន ចាប់តាំងពីឆ្នាំ ១៩៩១ មក បានផ្តល់ថវិកាជាង ៥៥លានដុល្លារអាមេរិក ដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តនូវគម្រោង គូសាណូណិ ចំនួន ៥៥៤គម្រោង ទូទាំងប្រទេស ។
