រសៀលថ្ងៃទី ១៤ ខែ កញ្ញា ឆ្នាំ ២០១៧ នៅទីស្តីការក្រសួង ដៃគូ សន្ទនា បានផ្តោតការយកចិត្តទុកដាក់ ទៅ លើយន្តការកិច្ចសហប្រតិបត្តិការ រវាងរាជរដ្ឋា ភិបាល ដៃគូអភិវឌ្ឍន៍ និងវិស័យឯកជន ធ្វើយ៉ាងណាដើម្បីមានភាពសង្វាក់គ្នា ក្នុងការ អនុវត្តគម្រោអាទិភាពនានាទាក់ទងវិស័យ ឧស្សាហកម្ម និងវិស័យសហគ្រាសធុនតូច និងមធ្យម (SME) នៅកម្ពុជា ។
លោកជំទាវ Claire Van der Vaeren អ្នកសម្របសម្រួលនៃអង្គការសហប្រជាជាតិ នៅកម្ពុជា បានលើកឡើងពីសារៈសំខាន់នៃគោលដៅអភិវឌ្ឍន៍ប្រកបដោយនិរន្តរភាព (SDG)របស់អង្គការសហប្រជាជាតិដល់ឆ្នាំ ២០៣០ ដែលប្រទេសជាសមាជិកទាំងអស់ត្រូវមានកិច្ចខិតខំប្រឹងប្រែងក្នុងការអនុវត្តឲ្យ
បានសម្រេចតាមគោលដៅដែលបានកំណត់ ។ ដោយឡែកកម្ពុជា មានគោលនយោ បាយ អភិវឌ្ឍវិស័យឧស្សាហកម្ម (IDP)ដែលជាត្រី វិស័យដ៏សំខាន់ក្នុងការតម្រង់ទិសការ អភិវឌ្ឍន៍វិស័យឧស្សាហកម្មប្រកបដោយចិរភាព ។
ឯកឧត្តម ទេសរដ្ឋមន្ត្រី ចម ប្រសិទ្ធ បានចាត់ទុក ដៃគូអភិវឌ្ឍមានសារៈសំខាន់សម្រាប់រួម ចំណែកការអភិវឌ្ឍន៍នៅកម្ពុជា ។ ជាពិសេស នៅពេលថ្មីៗនេះ កម្ពុជា ត្រូវបានអង្គការ UNIDO ជ្រើសរើសជាប្រទេសចូលក្នុង សមាជិកអនុវត្តកម្មវិធីភាពជា ដៃគូ ប្រចាំប្រទេស (PCP) ដែលកម្មវិធីនេះឆ្លើយតបជាវិជ្ជមានទៅលើគោល នយោបាយអភិវឌ្ឍវិ ស័យឧស្សាហកម្មពីឆ្នាំ ២០១៥-២០២៥ ។ ឯកឧត្តមទេសរដ្ឋមន្ត្រី បានបន្តថា៖ បច្ចុប្បន្នរាជរដ្ឋាភិបាលមានក្រុមការងាររវាងរាជរដ្ឋា ភិបាល និងវិស័យឯកជន តាមវិស័យនីមួយៗ ដើម្បីដោះស្រាយបញ្ហាប្រឈមទាំង ឡាយជាមួយវិស័យឯកជន ។ ក៏ប៉ុន្តែក្រុមការងារ មិន មានដៃគូអភិវឌ្ឍចូលរួមទេ ។ ចំណុចនេះ ឯកឧត្តមទេសរដ្ឋមន្ត្រី បានផ្តល់សារៈសំខាន់ ទៅលើការចូលរួមរបស់ដៃគូអភិវឌ្ឍ។ក្នុងនោះការ ប្រមូលផ្តុំ ឧស្សាហកម្ម ជាពិសេស សហគ្រាសធុនតូច និងមធ្យម ដែលនៅ រប៉ាត់ រប៉ាយអោយចូលក្រោមច្បាប់ តាមរយៈសមាគម សម្ព័ន្ធ រឺ សហព័ន្ធ ជាការចាំបាច់ដើម្បីពង្រឹងវិស័យនេះ ដែលបានដើរតួសំខាន់ក្នុងសរសៃឈាមសេដ្ឋកិច្ចជាតិ ។
ជាចុងក្រោយ ដៃគូសន្ទនា បានឯកភាព បង្កើតនូវចំណុចទំនាក់ទំនង(Focus Point) រវាងក្រសួង និងដៃគូអភិវឌ្ឍ ដើម្បីពិភាក្សា និងផ្លាស់ប្តូរឯកសារគ្នាទៅវិញ ទៅមក ក្នុងគោលដៅជម្រុញប្រសិទ្ធិភាព និងជោគជ័យលើការងារអនុវត្តគម្រោង ។