នៅរសៀលថ្ងៃអង្គារ ៥រោច ខែផល្គុន ឆ្នាំរោង ឆស័ក ពស២៥៦៨ ត្រូវនឹងថ្ងៃទី១៨ ខែមីនា ឆ្នាំ២០២៥ នេះ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ដោយមានការអញ្ជើញចូលរួមពីឯកឧត្តម Li Guoying រដ្ឋមន្ត្រីក្រសួងធនធានទឹកនៃសាធារណរដ្ឋប្រជាមានិតចិន និងគណៈប្រតិភូអមដំណើរ បានអញ្ជើញចុះពិនិត្យទីតាំងស្ថានីយជលសាស្រ្ត និងឧតុនិយមកំពង់ថ្កូវ ស្ថិតក្នុងស្រុកក្រឡាញ់ ទស្សនកិច្ចបារាយណ៍ទឹកថ្លា និងបឹងទន្លេសាប ស្ថិតនៅតំបន់ភូមិបណ្តែតទឹកចុងឃ្នៀស ក្រុងសៀមរាប ខេត្តសៀមរាប។
ក្នុងឱកាសនោះ ឯកឧត្តមរដ្ឋមន្រ្តីប្រធានអាជ្ញាធរទន្លេសាប បានសម្តែងនូវការស្វាគមន៍យ៉ាងកក់ក្តៅចំពោះឯកឧត្តម Li Guoying រដ្ឋមន្ត្រីក្រសួងធនធានទឹកនៃសាធារណរដ្ឋប្រជាមានិតចិន និងបានជម្រាបជូនប្រតិភូពីតួនាទីដ៏សំខាន់របស់ស្ថានីយជលសាស្រ្ត និងឧតុនិយម ក្នុងការទទួល-បញ្ជូនទិន្នន័យ ការតាមដានគ្រប់គ្រងធនធានទឹក និងអាកាសធាតុ និងគ្រប់គ្រងគ្រោះមហន្តរាយទឹកជំនន់ ដើម្បីចែករំលែក និងផ្សព្វផ្សាយជូនដល់សាធារណជន។
លើសពីនេះ ឯកឧត្តមរដ្ឋមន្រ្តីប្រធានអាជ្ញាធរទន្លេសាប ក៏បានបញ្ជាក់ជូនប្រតិភូផងដែរ អំពីអត្ថប្រយោជន៍បឹងទន្លេសាបលើវិស័យធនធានទឹក ទេសចរណ៍ អេកូឡូស៊ី បរិស្ថាន មច្ឆជាតិជាដើម ដែលក្នុងនោះ ត្រីជាប្រភពប្រូតេអ៉ីនដ៏សំខាន់ទ្រទ្រង់សុខភាពមនុស្ស និងសេដ្ឋកិច្ចជាតិ ខណៈព្រៃលិចទឹកជុំវិញបឹងទន្លេសាបផ្តល់នូវមុខងារជាច្រើនលើការការពារបឹងទន្លេសាបពីការគោករាក់ ការពារទប់ស្កាត់ភាពកករដីល្បាប់ ភាពកខ្វក់និងជាតិពុលពីតំបន់អភិវឌ្ឍន៍ផ្នែកខាងលើហូរចាក់ចូលបឹងទន្លេសាប ដែលជះឥទ្ធិពលអវិជ្ជមានដល់គុណភាពទឹក បរិស្ថាន សុខមាលភាពបឹងទន្លេសាប និងបង្កគ្រោះថ្នាក់ដល់ការប្រើប្រាស់របស់មនុស្ស សត្វ និងរុក្ខជាតិព្រៃលិចទឹក ប្រព័ន្ធជីវចម្រុះ និងប្រព័ន្ធអេកូឡូស៊ី។
ឯកឧត្តម Li Guoying រដ្ឋមន្រ្តីក្រសួងធនធានទឹកនៃសាធារណរដ្ឋប្រជាមានិតចិន បានបង្ហាញនូវការគាំទ្រ និងជំរុញពង្រឹងកិច្ចសហប្រតិបតិ្តការរវាងអាជ្ញាធរទន្លេសាប និងក្រសួងធនធានទឹកនៃសាធារណរដ្ឋប្រជាមាននិតចិន ដើម្បីចូលរួមការពារ អភិរក្សបឹងទន្លេសាបឱ្យបានគង់វង្ស និងចីរភាព និងបានណែនាំឱ្យវិទ្យាស្ថានស្រាវជ្រាវជលគតិណានជីង និងវិទ្យាស្ថានស្រាវជ្រាវណានជីងផ្នែកជលសាស្រ្តនិងប្រព័ន្ធស្វ័យប្រវត្តិកម្មសម្រាប់ការអភិរក្ស បន្តសហការជាមួយអាជ្ញាធរទន្លេសាប សិក្សារួមគ្នាលើតម្រូវការផ្តល់នូវឧបករណ៍បំពាក់និងបច្ចេកទេសបន្ថែម នៅតំបន់អាងបឹងទន្លេសាប(ស្ទឹងសំខាន់ៗទាំង១១) និងបណ្តុះបណ្តាលធនធានមនុស្សប្រកបដោយសមត្ថភាពក្នុងការថែទាំ ជួសជុល គ្រប់គ្រងទិន្នន័យជលសាស្រ្ត សិក្សាពីវដ្តនៃព្រៃលិចទឹក និងដកស្រង់បទពិសោធន៍ពីការដាំព្រៃលិចទឹកនៅបឹងទន្លេសាប ទៅដាំនៅបឹង Tiahu ប្រទេសចិន៕
