នៅថ្ងៃទី ០១ ខែ មេសា ឆ្នាំ ២០១៦នេះក្រសួងការបរទេស និងសហប្រតិបត្តិការអន្តរជាតិបានចេញសេចក្តីជូនដំណឹងថា ស្ថានឯកអគ្គរាជទូតកម្ពុជា ប្រចាំសាធារណរដ្ឋប្រជាមានិតចិនបានសហការជាមួយប៉ូលីសក្រុងប៉េកាំង អន្តរាគមន៍ជួយស្ត្រីខ្មែរ ០១ រូប ឈ្មោះ លី ធី អាយុ ៤៤ឆ្នាំ មានស្រុកកំណើត នៅភូមិ កោះក្រសាំង ឃុំស្នាមព្រះ ស្រុកបាកាន ខេត្តពោធិសាត់ ដែលបានទៅធ្វើការងារជាមេផ្ទះ នៅប្រទេសចិន ដោយស័្មគ្រចិត្ត តាំងពីខែ មិថុនា ឆ្នាំ ២០១២ ឲ្យបានវិលត្រឡប់មកកម្ពុជាវិញ។ស្ត្រី លី ធី បានមកដល់អាកាសយានដ្ឋានអន្តរជាតិភ្នំពេញ កាលពីថ្ងៃទី ៣០ ខែ មីនា ឆ្នាំ ២០១៦ តាម ជើង យន្តហោះ MH ៧៥៤ ។
ដោយឡែកស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអន្តរាគមន៍ជួយស្ត្រីខ្មែរចំនួន ០២ រូប ដែលបានទៅធ្វើការនៅប្រទេសម៉ាឡេស៊ី ហើយជួបប្រទះការលំបាកក្នុងការងារ ឲ្យបានវិលត្រឡប់ មកកម្ពុជាវិញ ។
ឯកឧត្តម ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានថ្លែងប្រាប់ថា ស្ដ្រីទាំង ០២ រូបនោះ មានឈ្មោះ ស៊ិន សុផល អាយុ ២៥ ឆ្នាំ មានស្រុកកំណើត នៅភូមិថ្លើក ឃុំពើក ស្រុកអង្គស្នួល ខេត្តកណ្តាល បានទៅប្រទេសម៉ាឡេស៊ីដោយរថយន្ត កាត់តាមប្រទេសថៃ កាលពីថ្ងៃទី ២៨ ខែ កុម្ភៈ ឆ្នាំ ២០១៥ តាមរយៈការបោកបញ្ឆោតរបស់មេខ្យល់ទៅធ្វើការតាមផ្ទះ ។ ពលការីនីរូបនេះ ត្រូវបានថៅកែនាំទៅស្ថានទូតនៅថ្ងៃទី៣០ ខែ មីនា ឆ្នាំ ២០១៦ បន្ទាប់មានការធ្វើអន្តរាគមន៍របស់ស្ថានទូត ហើយថៅកែបានបើកប្រាក់ខែ បង់ពិន័យឲ្យរដ្ឋាភិបាលម៉ាឡេស៊ី និងទិញសំបុត្រយន្តហោះ ឲ្យធ្វើដំណើរត្រឡប់មកមាតុប្រទេស។
ពលការីនី ស៊ិន សុផល នឹងមកដល់អាកាសយានដ្ឋានអន្តរជាតិភ្នំពេញ នៅ ថ្ងៃទី ០១ ខែមេសា ឆ្នាំ ២០១៦ វេលាម៉ោង ១៥:៥៥ នាទី តាមជើងយន្តហោះ AK ៥៣៤។
ទុយ សុខលីន អាយុ ២៣ ឆ្នាំ មានស្រុកកំណើត នៅភូមិទន្លេក្រៅ ឃុំជលសារ ស្រុកជលគីរី ខេត្តកំពង់ឆ្នាំង បានទៅប្រទេសម៉ាឡេស៊ី កាលពីឆ្នាំ ២០១៤ ធ្វើការតាមផ្ទះ ។ ដោយពុំមានលិខិតឆ្លងដែន ពលការីនីរូបនេះ បានទៅស្ថានទូត នៅថ្ងៃទី ២៨ ខែ មីនា ឆ្នាំ ២០១៦ សុំជួយឲ្យបានវិលត្រឡប់មកកម្ពុជាវិញ ។
ពលការីនី ទុយ សុខលីន នឹងមកដល់អាកាសយានដ្ឋានអន្តរជាតិភ្នំពេញ នៅ ថ្ងៃទី ០៣ ខែ មេសា ឆ្នាំ ២០១៦ វេលាម៉ោង ៧:៣៥ នាទី ព្រឹក តាមជើងយន្តហោះ AK ៥៣៦។
កំឡុងពេលរង់ចាំការត្រឡប់មកកម្ពុជាវិញ ស្ថានទូតបានផ្តល់កន្លែងស្នាក់នៅ និងការហូប-ចុក ជូនដល់ពលការិនីទាំង ០២ រូប ខាងលើ ផងដែរ ។
ក្រសួងការបរទេស និងសហប្រតិបត្តិការអន្តរជាតិ អន្តរាគមន៍ជួយពលការិនីខ្មែរ៣រូបឲ្យបានវិលមកមាតុប្រទេសវិញ
