នាព្រឹកថ្ងៃអាទិត្យ ១៣កើត ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៨ ខែមិថុនា ឆ្នាំ២០២៥ ឯកឧត្តមបណ្ឌិត ហ៊ឺ វីរៈ ប្រធានក្រុមការងារគណបក្សចុះមូលដ្ឋានស្រុកកំពង់ត្រឡាច បានអញ្ជើញសំណេះសំណាល និងពិនិត្យផ្ទៀងផ្ទាត់បញ្ជីឈ្មោះរបស់មេក្រុមបក្ស នៅឃុំច្រេស រួមមានភូមិត្រពាំងភ្លៅ ភូមិក្បាលដំរីភូមិប្របផ្ទះ ភូមិច្រមុះជ្រូក ភូមិចក និងភូមិដកស្អិត សរុបចំនួន ១៤៨នាក់ ដែលប្រារព្ធធ្វើឡើងនៅសាលាបុណ្យភូមិក្បាលដំរី ភូមិក្បាលដំរី ឃុំច្រេសស្រុកកំពង់ត្រឡាច ខេត្តកំពង់ឆ្នាំង។ ពិធីសំណេះសំណាលនោះផងដែរ ក៏មានការអញ្ជើញចូលរួមពី ឯកឧត្តមវេជ្ជបណ្ឌិត ប្រាក់ វ៉ុន ប្រធានក្រុមការងារចុះមូលដ្ឋានឃុំច្រេស លោក លោកស្រីក្រុមការងារចុះមូលដ្ឋានស្រុកកំពង់ត្រឡាច លោក សមាជិក សមាជិកាគណៈកម្មាធិការគណបក្សស្រុកកំពង់ត្រឡាច និងឃុំច្រេសផងដែរ។
ថ្លែងក្នុងឱកាសនោះ ឯកឧត្តមបណ្ឌិត ក៏បាននាំនូវប្រសាសន៍ផ្តាំផ្ញើសួរសុខទុក្ខដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្ដមបណ្ឌិត បានបន្តថាថ្នាក់ដឹកនាំប្រទេស ជាពិសេសសម្តេចទាំងពីរ តែងតែយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋទូទាំងប្រទេស ដោយមិនប្រកាន់នូវពូជសាសន៍ ពណ៌សម្បុរ និងនិន្នាការនយោបាយណាមួយឡេីយ។
ទន្ទឹមនឹងនោះដែរ ឯកឧត្តមបណ្ឌិត បានកោតសរសើរ និងវាយតម្លៃខ្ពស់ចំពោះគណៈកម្មាធិការគណបក្សឃុំច្រេស ដែលតែងតែយកចិត្តទុកដាក់ចំពោះប្រជាពលរដ្ឋមានទុក្ខលំបាក ដោយកៀរគរសម្ភារៈ ថវិកាពីសប្បុរសជនមកជួយឧបត្ថម្ភ ដេីម្បីជួយសម្រាលបន្ទុកបានមួយគ្រាផងដែរ។ ឯកឧត្តមបណ្ឌិត ក៏បានលើកទឹកចិត្តដល់ក្រុមការងារចុះមូលដ្ឋានឃុំ គណៈកម្មាធិការគណបក្សឃុំ ត្រូវកៀរគរធនធានទាំងសម្ភារៈ និងថវិកាបន្ថែមទៀត ដើម្បីឱ្យសកម្មភាពសប្បុរសធម៌នេះកាន់តែផុសផុល។ ជាមួយគ្នានោះដែរ ឯកឧត្ដមបណ្ឌិត បានណែនាំដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវបង្កើតកម្មវិធីចុះតាមសាលាបឋមសិក្សានៅមូលដ្ឋានឃុំ ដោយបង្ហាត់បង្រៀន និងពន្យល់ពីការសម្អាតអនាម័យខ្លួនប្រាណ និងជួលជាងកាត់សក់ កក់សក់ កាត់ក្រចកឱ្យក្មេងៗទាំងនោះ និងជាពិសេសណែនាំដល់ក្មេងៗមិនត្រូវទទួលទានភេសជ្ជៈ ឬអាហារកំប៉ុងដែលធ្វើឱ្យប៉ះពាល់ដល់សុខភាពនៅថ្ងៃមុខ។
ពិធីសំណេះសំណាលនោះ ឯកឧត្តមបណ្ឌិត បានចូលរួមថវិកាមួយចំនួន សម្រាប់ចំណាយលើអាហារសាមគ្គី ក្នុងនោះ ឯកឧត្តមវេជ្ជបណ្ឌិត ប្រាក់ វ៉ុន ក៏បានឧបត្ថម្ភប្រជាពលរដ្ឋដែលមកចូលរួម ក្នុងម្នាក់ៗថវិកាចំនួន ១០,០០០ រៀល ចុងបញ្ចប់នៃពិធី ក៏មានការទទួលទានអាហារសាមគ្គីដោយក្ដីសប្បាយរីករាយ៕
”
