ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២៧ ខែមិថុនា ឆ្នាំ២០២៥នេះ បានអញ្ជើញជាអធិបតី សម្ពោធបើកឱ្យប្រើប្រាស់ជាផ្លូវការ លេខពិសេសផ្ទាល់ខ្លួន សម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន និងមណ្ឌលផ្តល់សេវាសាធាណៈ ផ្សារទំនើបអូឡាំព្យានៅផ្សារទំនើបអូឡាំព្យា និងដោយមានកាចូលរួមពីថ្នាក់ដឹកនាំក្រសួង និងអ្នកពាក់ព័ន្ធជាច្រើនរូបទៀត។
ថ្លែងនាឱកាសនោះឯកឧត្តម ប៉េង ពោធិ៍នា បានឱ្យដឹងថា សមិទ្ធផលការងារជាច្រើននៅក្នុងវិស័យសាធារណការ និងដឹកជញ្ជូន ដែលសម្រេចបាននាពេលកន្លងមក ពុំមែនកើតឡើងដោយការចៃដន្យនោះទេ តែកើតឡើងដោយសារកិច្ចខិតខំប្រឹងប្រែង និងការយកចិត្តទុកដាក់ខ្ពស់របស់ថ្នាក់ដឹកនាំទាំងនៅក្នុងអាណត្តិមុនៗ និងអាណត្តិទី៧នេះ ព្រមទាំងការចូលរួមរបស់មន្ត្រីរាជការ និងបុគ្គលិកគ្រប់លំដាប់ថ្នាក់ ដែលបានគិតគូរបំពេញ ការងារប្រកបដោយស្មារតីបុរេសកម្ម និងការទទួលខុសត្រូវខ្ពស់។ បន្ថែមពីនេះសុខសន្តិភាព និងស្ថិរភាពនយោបាយក្នុងប្រទេស គឺជាកត្តាមិនអាចខ្វះបាន ដែលបានបើកឱកាសឱ្យ រាជរដ្ឋាភិបាលអាចសម្រេចបាននូវសមិទ្ធផលជាច្រើនលើគ្រប់វិស័យក្នុងរយៈពេលជាង ២ទសវត្សចុងក្រោយនេះ ក្រោមការដឹកនាំប្រកបដោយភាពឈ្លាសវៃរបស់បិតាសន្តិភាពសម្តេចអគ្គមហាសេនាបតីតេជោ ហ៊ុន សែន។
ឯកឧត្តម ប៉េង ពោធិ៍នា បានបន្ថែមថា ការបើកឱ្យប្រើប្រាស់លេខចុះបញ្ជីលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រ យានយន្ត និងម៉ូតូកង់បួន និងមណ្ឌលផ្តល់សេវាសាធារណៈផ្សារទំនើបអូឡាំព្យានាពេលនេះ គឺជាសមិទ្ធផលថ្មីបន្ថែមទៀតរបស់ក្រសួងសាធារណការ និងដឹកជញ្ជូន ស្របតាមចក្ខុវិស័យនិងយុទ្ធសាស្ត្របញ្ចកោណរបស់រាជរដ្ឋាភិបាល ដែលបានកំណត់អាទិភាពសម្រាប់ជំរុញកំណើនប្រសិទ្ធភាព សេដ្ឋកិច្ច និងសង្គម ក៏ដូចជាប្រសិទ្ធភាពការងាររដ្ឋបាលតាមរយៈការប្រើប្រាស់សក្តានុពល បច្ចេកវិទ្យាឌីជីថល។
ឯកឧត្តមបានបន្ថែមថា ការបើកឱ្យប្រើប្រាស់មណ្ឌលផ្តល់សេវាសាធារណៈ នៅផ្សារទំនើបអូឡាំព្យានាពេលនេះ មានគោលបំណង ដើម្បីបង្ខិតសេវាសាធារណៈរបស់ក្រសួងឱ្យកាន់តែជិតប្រជាពលរដ្ឋ បង្កលក្ខណៈងាយស្រួល ចំណេញពេលវេលា និងកាត់បន្ថយការចំណាយក្រៅផ្លូវការ និងបង្កើនប្រសិទ្ធភាព និងតម្លាភាពនៃការផ្តល់សេវាសាធារណៈរបស់ក្រសួងជូនដល់ប្រជាពលរដ្ឋ ហើយស្របពេលជាមួយគ្នានេះ ការបើកឱ្យប្រើប្រាស់ប្រព័ន្ធលក់លេខពិសេសផ្ទាល់ ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន គឺដើម្បីផ្តល់ជម្រើសបន្ថែម ដល់បងប្អូនប្រជាពលរដ្ឋ ក្នុងការជ្រើសរើសលេខតាមចំណង់ចំណូលចិត្ត។
ជាក់ស្តែងការប្រើប្រាស់ប្រព័ន្ធថ្មីនេះ នឹងផ្តល់ភាពងាយស្រួលដល់បងប្អូនប្រជាពលរដ្ឋ ក្នុងការចុះបញ្ជីទោចក្រយានយន្ត ត្រីចក្រយានយន្ត និងម៉ូតូកង់បួនតាមប្រព័ន្ធឌីជីថល ដោយពួកគាត់អាចធ្វើការទិញលេខ និងចុះបញ្ជីតាមប្រព័ន្ធដោយខ្លួនឯងនៅកន្លែងណាក៏បានឱ្យតែមានសេវាអ៊ីនធឺណិត។
ឆ្លៀតឱកាសនេះឯកឧត្តម ប៉េង ពោធិ៍នា ក៏បានថ្លែងកោតសរសើរ និងវាយតម្លៃខ្ពស់ចំពោះគណៈកម្មការអន្តរក្រសួង គ្រប់គ្រងការលក់លេខចុះបញ្ជីយានជំនិះ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ អគ្គនាយកដ្ឋានដឹកជញ្ជូនផ្លូវគោក និងភាគីពាក់ព័ន្ធទាំងអស់ ដែលបានសហការរៀបចំប្រព័ន្ធលក់លេខពិសេសផ្ទាល់ខ្លួន សម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន និងមណ្ឌលផ្តល់សេវាសាធារណៈនេះឡើងផងដែរ។
សូមបញ្ជាក់ដែរថា លេខចុះបញ្ជីពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន បានដាក់លក់តាមប្រព័ន្ធស្វ័យប្រវត្តិកម្មរបស់ក្រសួងសាធារណការ និងដឹកជញ្ជូន ដោយអនុញ្ញាតឱ្យប្រជាពលរដ្ឋ អាចចូលទៅស្វែងរកលេខចុះបញ្ជីដែលខ្លួនពេញចិត្ត ហើយអាចបំពេញពាក្យស្នើសុំចុះបញ្ជី និងពាក់ផ្លាកលេខ។ តម្លៃផ្លាកលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូ បានរៀបចំក្នុងតម្លៃមួយសមរម្យទៅតាមចំណង់ចំណូលចិត្តរបស់បងប្អូនប្រជាពលរដ្ឋដែលមានតម្លៃចាប់ពី ១០ម៉ឺនរៀលឡើងទៅ។
លេខចុះបញ្ជីពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន កំពុងមានការចាប់អារម្មណ៍ខ្ពស់ បន្ទាប់ពីត្រូវបង្កើតចេញពីការសំណូមពរ និងតម្រូវការរបស់បងប្អូនប្រជាពលរដ្ឋដោយផ្ទាល់៕
