ឯកឧត្តម វង្សី វិស្សុតឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ នៅថ្ងៃទី២៣ ខែសីហា ឆ្នាំ២០២៥ បានបន្តអញ្ជើញបំពេញបេសកកម្មជំរុញវិស័យវារីវប្បកម្ម ក្នុងភូមិសាស្រ្តស្រុកស្ទោង ខេត្តកំពង់ធំ ដើម្បីជំរុញ និងលើកទឹកចិត្តដល់ការបង្កើនផលិតភាព ការធ្វើពិពិធកម្មការជួយគាំទ្រក្នុងខ្សែច្រវាក់តម្លៃ និងលើកកម្ពស់សុវត្ថិភាពផលិតផលក្នុងស្រុក។
ពិធីដោយមានការចូលរួមអមដំណើរពីសំណាក់ឯកឧត្តមទេសរដ្ឋមន្រ្តីថោង ខុន, លោក ថោ ជេដ្ឋា រដ្ឋមន្រ្តីក្រសួងធនធានទឹកនិងឧតុនិយម, ឯកឧត្តម ទេព ភិយ្យោរិន្រ្ទ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាសមាជិកក្រុមប្រឹក្សាភិបាលធនាគារសហគ្រាសធុនតូច និងមធ្យមកម្ពុជា, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិនៃសហគ្រិនខ្មែរ, ឯកឧត្តម នួន ផារ័ត្ន អភិបាលខេត្តកំពង់ធំ, តំណាងក្រសួង ស្ថាប័នពាក់ព័ន្ធ និងក្រុមការងារចុះមូលដ្ឋាន ព្រមទាំងអាជ្ញាធរមូលដ្ឋាន។
ឯកឧត្តមឧបនាយករដ្ឋមន្ត្រីប្រចាំការ និងប្រតិភូអមដំណើរបានបន្តអញ្ជើញចុះពិនិត្យក្រុមអ្នកចិញ្ចឹមត្រី ខ្នាតមធ្យម និងលក្ខណៈគ្រួសាររួមមានការចិញ្ចឹមត្រីឆ្ដោ ត្រីរ៉ស់ ត្រីប្រា ត្រីពោ, សិប្បកម្មកែច្នៃត្រីងៀត, កន្លែងទទួលទិញ បង្កក ចែកចាយ និងនាំចេញផលនេសាទធម្មជាតិ និងសិប្បកម្មធ្វើប្រហុក ផ្អក ពងទាប្រៃ ពងទាសាប ពងទាកូន ដែលមានទីតាំងស្ថិតក្នុងឃុំចំណាក្រោម ឃុំសំព្រោជ ឃុំកំពង់ចិនត្បូង និងឃុំកំពង់ចិនជើង ស្រុកស្ទោង ខេត្តកំពង់ធំ។ ជារួមពួកគាត់បានជួបនូវបញ្ហាប្រឈមមួយចំនួនដូចជា ពូជត្រី ចំណីត្រី ការទទួលនិងប្រើប្រាស់ ហិរញ្ញប្បទាន បច្ចេកទេសចិញ្ចឹម ប្រព័ន្ធហេដ្ឋារចនាសម្ព័ន្ធគាំទ្រនៅមានកម្រិត និងបញ្ហាទីផ្សារ ព្រមទាំងបញ្ហាការប្រកួតប្រជែងជាមួយនឹងការនាំចូលត្រីពីប្រទេសជិតខាង។
ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានលើកឡើងថាយោងតាមកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ស្វាហាប់ ច្បាស់លាស់ប្រកបដោយចក្ខុវិស័យវែងឆ្ងាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានផ្ដោតអាទិភាពបន្តលើកកម្ពស់ និងបង្កើនតម្លៃបន្ថែមវិស័យកសិកម្ម និងកសិ-ឧស្សាហកម្ម ដែលជាប្រភពសក្ដានុពលនៃកំណើនក៏ដូចជាការធ្វើពិពិធកម្មមូលដ្ឋានកំណើនសេដ្ឋកិច្ច ក៏ដូចការលើកតម្កើងជីវភាពរបស់ប្រជាពលរដ្ឋ។
ក្នុងន័យនេះផ្អែកតាមសក្ដានុពលរបស់ខេត្តកំពង់ធំ ជាពិសេស ទន្លេសាប និងស្ទឹងធំៗ ដែលអំណោយផលដល់ការជំរុញវារីវប្បកម្មក្នុងស្រុកក្រុមការងារបានបន្តផ្ដោត លើការសិក្សាពីបញ្ហាប្រឈម និងដំណោះស្រាយ ព្រមទាំងការរៀបចំផែនការមេ ប្រព័ន្ធអេកូឡូស៊ីវារីវប្បកម្មមួយជាខ្សែច្រវាក់ផលិតកម្ម ដែលមានលក្ខណៈប្រទាក់ក្រឡាគ្នា ចាប់ពីការផលិតពូជ ការចិញ្ចឹមការកែច្នៃទីផ្សារ និងការប្រកួតប្រជែង ក្នុងគោលដៅលើកកម្ពស់សមត្ថភាពផលិតកម្មក្នុងស្រុក និងលើកស្ទួយ ការគាំទ្រផលិតផលក្នុងស្រុក ព្រមទាំងបង្កើនសមត្ថភាព ក្នុងការនាំចេញ សំដៅបង្កើនតម្លៃបន្ថែមសេដ្ឋកិច្ច, បង្កើតឱកាសការងារ, ប្រាក់ចំណូលបន្ថែម និងធ្វើឱ្យជីវភាពប្រជាពលរដ្ឋកាន់តែល្អប្រសើរ ក៏ដូចធ្វើឱ្យសកម្មភាពសេដ្ឋកិច្ចឱ្យកាន់តែរស់រវើក និងជវភាព។
ឯកឧត្តមឧបនាយករដ្ឋមន្ត្រីប្រចាំការ បានលើកទឹកចិត្តដល់បងប្អូនអ្នកចិញ្ចឹមត្រី អ្នកប្រមូលទិញ ចែកចាយ និងនាំចេញព្រមទាំងសិប្បកម្មកែច្នៃ ឱ្យពង្រឹងសមត្ថភាពបង្កើនផលិតភាព គុណភាព និងសេវាកម្ម ដើម្បីឆ្លើយតប ទៅនឹងតម្រូវការ ទីផ្សារ និងស្ដង់ដាទីផ្សារ និងត្រូវចេះសហការគ្នា ឱ្យក្លាយទៅជាប្រព័ន្ធអេកូឡូស៊ីដ៏រស់រវើក និងជាខ្សែច្រវាក់ផលិតកម្មរួមដ៏រឹងមាំ មាន ភាពទាក់ទាញ និងមានតម្លៃបន្ថែមកាន់តែខ្ពស់ ព្រមទាំងមានសមត្ថភាពប្រកួតប្រជែងជាមួយប្រទេសជិតខាងទាំងបរិមាណនិងគុណភាព។
ឯកឧត្តមឧបនាយករដ្ឋមន្ត្រីប្រចាំការ ក៏បានផ្តល់ការណែនាំឱ្យក្រុមការងារ ចុះមូលដ្ឋានដែលទទួលបន្ទុកតាមវិស័យ ក្នុងខេត្តកំពង់ធំ ជាពិសេសក្រុមការងារ លើកកម្ពស់ ជីវភាពប្រជាជន ក្រុមការងារអភិវឌ្ឍន៍សេដ្ឋកិច្ចមូលដ្ឋាននិងទីផ្សារផលិតផលខ្មែរ សហការជាមួយអាជ្ញាធរមូលដ្ឋាន តំណាងក្រសួង ស្ថាប័នពាក់ព័ន្ធ ធនាគារជាដៃគូ ដើម្បីសិក្សា និងរៀបចំចងក្រងជាបណ្ដុំ អ្នកផលិត សមាគម ឬជាសហគមន៍, ផ្ដល់ការបណ្តុះបណ្ដាលជំនាញ បច្ចេកទេស និងការគ្រប់គ្រងអាជីវកម្ម, ការផ្ដល់ហិរញ្ញប្បទានដែលមានអត្រាការប្រាក់សមស្រប, ការជួយដោះស្រាយនូវប្រព័ន្ធហេដ្ឋារចនាសម្ព័ន្ធគាំទ្រ ចាំបាច់នានា, នវានុវត្តន៍ម៉ាស៊ីនកែច្នៃ, ព្រមទាំងបង្កលក្ខណៈ ងាយស្រួលដល់ដំណើរការនៃខ្សែច្រវាក់ផលិតកម្ម ដើម្បីកាត់បន្ថយថ្លៃដើមផលិតកម្ម និងបង្កើនប្រាក់ចំណេញ ធានានូវចីរភាព ស្ថិរភាពនៃការផ្គត់ផ្គត់ ការតភ្ជាប់ទីផ្សារក្នុងស្រុក និងជំរុញការនាំចេញ ក្នុងគោលដៅគាំទ្រ ការពារលើកស្ទួយផលិតផលក្នុងស្រុក និងការប្រកួតប្រជែង។
គួរបញ្ជាក់ដែរថា ស្រុកស្ទោងនៃខេត្តកំពង់ធំ តាំងពីដើមរៀងមកគឺជាទីតាំងពិសេសដែលមានការ សម្គាល់ថាជាកន្លែងធ្វើវារីវប្បកម្មដ៏សំបូរបែប ពិសេសការកែច្នៃត្រីធ្វើជាត្រីងៀត ដើម្បីផ្គត់ផ្គង់ ចែកចាយក្នុងស្រុក និងបម្រើឱ្យការនាំចេញទៀតផង ហើយបច្ចុប្បន្ន មានគ្រួសារប្រជាពលរដ្ឋកំពុងចិញ្ចឹមត្រីចំនួន១១៥គ្រួសារ និងមានសិប្បកម្មកែច្នៃត្រីចំនួន ៦៥ទីតាំង៕
