សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តាមរយៈលោកអ្នកឧកញ៉ា ទ្រី ភាព បេសកជនពិសេសរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងលោកជំទាវឧកញ៉ា គៀន ស្រីនា បានឧបត្ថម្ភម៉ូតូចំនួន ១ពាន់គ្រឿងជូនដល់កងទ័ពជួរមុខ ក៏ដូចជាអង្គភាពទ័ពប្រើប្រាស់តាមតម្រូវការចាំបាច់លើកិច្ចការពារជាតិ។
ការលំបាករបស់កងទ័ពនៅជួរមុខមិនរំលងពីកែវភ្នែក និងការគិតគូររបស់រាជរដ្ឋាភិបាលកម្ពុជានោះឡើយ ជាពិសេសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត។ កំលុងពេលសង្គ្រាមឈ្លានដោយកងទ័ពថៃ បានធ្វើឱ្យកងទ័ពជួរមុខរបស់កម្ពុជាមួយចំនួន រងការខូចខាតម៉ូតូ ហើយកងទ័ពខ្លះ ព្រមទាំងនៅតាមអង្គភាពទ័ពមួយចំនួនមានតម្រូវការម៉ូតូសម្រាប់ធ្វើជាមធ្យោបាយផងដែរ។
ដោយមើលឃើញពីតម្រូវការទាំងនេះ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត តាមរយៈលោកអ្នកឧកញ៉ា ទ្រី ភាព និងលោកជំទាវឧកញ៉ា គៀន ស្រីនាង បានរៀបចំទិញម៉ូតូហុងដាវ៉េវ ដោយមានការបង់ពន្ធត្រឹមត្រូវចំនួន១ពាន់គ្រឿង សម្រាប់ចែកជូនដល់កងទ័ព និងអង្គភាពទ័ព។
ជំហានដំបូងនេះ ម៉ូតូចំនួន៥០០គ្រឿង ត្រូវបានរៀបចំរួចរាល់ ហើយត្រូវបានលោកអ្នកឧកញ៉ា ទ្រី ភាព អញ្ជើញប្រគល់ជូនតំណាងកងទ័ពនាព្រឹកថ្ងៃសុក្រ ទី២៩ ខែសីហា ឆ្នាំ២០២៥នេះ។ បន្ទាប់ពីបានប្រគល់រួចហើយនោះ ម៉ូតូក៏ត្រូវបានដឹកចេញពីឃ្លាំងភ្លាមៗផងដែរ យកទៅកាន់គោលដៅក្នុងខេត្តព្រះវិហារ និងខេត្តឧត្តរមានជ័យ។ ដោយឡែកម៉ូតូចំនួន៥០០គ្រឿងផ្សេងទៀត នឹងរៀបចំចាត់ចែងក្នុងពេលឆាប់ៗខាងមុខនេះ។
លោកអ្នកឧកញ៉ា ទ្រី ភាព បានថ្លែងថា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត មានការគិតគូរខ្ពស់ចំពោះសុខទុក្ខរបស់កងទ័ពនៅសមរភូមិមុខ ជាពិសេសការខូចខាតម៉ូតូកំលុងពេលសង្គ្រាមនៃការឈ្លានពានរបស់កងទ័ពថៃ ក៏ដូចជាកងទ័ពខ្វះខាតម៉ូតូសម្រាប់ធ្វើមធ្យោបាយ។ ឈរលើស្មារតីនៃការគិតគូរនេះ ទើបសម្តេច និងលោកជំទាវបណ្ឌិត ចាត់ចែងរៀបចំម៉ូតូចំនួន១ពាន់គ្រឿងជូនដល់ពួកគាត់។
លោកអ្នកឧកញ៉ា ទ្រី ភាព ជាសប្បុរសជនដែលតែងចូលរួមយ៉ាងសកម្មជាមួយរាជរដ្ឋាភិបាលរាល់ពេលជួបការលំបាកនានា ដោយគ្មានការអល់អែកនោះឡើយ។ លោកអ្នកឧកញ៉ា បានបង្ហាញក្តីសប្បាយរីករាយយ៉ាងក្រៃលែង បានចូលរួមជាមួយរាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត ក្នុងការរៀបចំអំណោយជាម៉ូតូជូនដល់កងទ័ពជួរមុខនាពេលនេះ។ សម្រាប់លោកអ្នកឧកញ៉ា ការជួយដល់កងទ័ពនាពេលនេះ គឺជាចូលរួមស្រាក់ដៃជាមួយរាជរដ្ឋាភិបាល ជាមួយកងទ័ព ដើម្បីជាប្រយោជន៍ក្នុងកិច្ចការពារជាតិ។
លោកអ្នកឧកញ៉ា ទ្រី ភាព បានគូសបញ្ជាក់ថា ទាំងអតីតកាល បច្ចុប្បន្នកាល និងទៅថ្ងៃមុខ រូបលោកត្រៀមខ្លួនជានិច្ចក្នុងការចូលរួមចំណែកជាមួយរាជរដ្ឋាភិបាល ដើម្បីដោះស្រាយ និងជម្នះការលំបាកទាំងឡាយ៕
