ឧបនាយករដ្ឋមន្ត្រី ស៊ុន ចាន់ថុល ស្នើគណៈប្រតិភូសភាអាមេរិក ជំរុញការវិនិយោគរបស់អាមេរិកមកកម្ពុជា


នាព្រឹកថ្ងៃសុក្រ ទី២៩ ខែសីហា ឆ្នាំ២០២៥នេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញទទួលជួប​សម្ដែង​ការគួរសម និងពិភាក្សាការងារជាមួយគណៈប្រតិភូសភាសហរដ្ឋអាម៉េរិក (CODEL) ដឹកនាំដោយលោកស្រី Beth Van Duyne ប្រធានគណៈប្រតិភូ និងជាសមាជិកសភាប្រចាំរដ្ឋ Texas។

ទស្សនកិច្ចរបស់គណៈប្រតិភូសភាសហរដ្ឋអាម៉េរិកនាឱកាសនេះនឹងជួយជំរុញការផ្ដល់ព័ត៌មានអំពីភាពរីកចម្រើន និងសក្ដានុពលរបស់កម្ពុជា ពិសេសនឹងពង្រឹង​ និង​ពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការលើវិស័យ​សំខាន់ៗរវាង​ប្រទេសទាំងពីរ ទាំងក្នុងក្របខណ្ឌទ្វេភាគី និងពហុភាគី ដើម្បីផលប្រយោជន៍រួម។

ក្នុងជំនួបនេះ ឧបនាយករដ្ឋមន្ត្រី ស៊ុន ចាន់ថុល បានថ្លែង​អំណរគុណចំពោះសហរដ្ឋអាម៉េរិក ដែលសម្រេចបញ្ចុះអត្រាពន្ធលើទំនិញនាំចេញ​ពីកម្ពុជាទៅកាន់សហរដ្ឋអាម៉េរិកពី ៤៩ភាគរយ មកនៅត្រឹម ១៩ភាគរយ។ អត្រាពន្ធ​ដែលកម្ពុជាទទួលបាន គឺជាអត្រាល្អមួយដែលជួយជំរុញទាក់ទាញវិនិយោគិន​មក​បណ្តាក់​ទុននៅកម្ពុជា និងជំរុញឱ្យការធ្វើពាណិជ្ជកម្មរវាងកម្ពុជា-អាម៉េរិក កាន់តែល្អ​ប្រសើរជាងមុន។

ឆ្លៀតក្នុងឱកាសនោះ លោកឧបនាយករដ្ឋមន្ត្រី ក៏បានថ្លែងអំណរគុណលោកប្រធានា​ធិបតី Donald Trump ដែលបានជំរុញឱ្យមានបទឈប់បាញ់បានឆាប់រហ័សក្នុង​បញ្ហា​ជម្លោះកម្ពុជា-ថៃ។ គោលជំហររបស់កម្ពុជា គឺមានភាពច្បាស់លាស់ក្នុងការរក្សា​ការ​ពារ​សុខសន្តិភាពជូនប្រជាជាតិ ដែលប្រមុខថ្នាក់ដឹកនាំកម្ពុជា បានខិតខំកសាង​មក​​ដោយ​លំបាក។ គោលជំហរនេះ ក៏បានទទួលការជឿជាក់ពីប្រធានាធិបតី Donald Trump ផងដែរ តាមរយៈសារលិខិតជូនសម្ដេចធិបតីនាយករដ្ឋមន្ត្រី កាល​ពីថ្ងៃទី២០ ខែសីហា ឆ្នាំ២០២៥ ថ្លែងអំណរគុណ និងកោតសរសើរកម្ពុជាដែលគាំទ្រ​បេក្ខភាព​លោកសម្រាប់ពានរង្វាន់ណូបែលសន្តិភាព។

ក្នុងអង្គប្រជុំនេះក៏មានការគូសរំលេចជូនលោកស្រីប្រធានគណៈប្រតិភូសភាអាមេរិ ឱ្យ​បានជ្រាបអំពីសក្តានុពលវិជ្ជមាននានារបស់កម្ពុជា មានជាអាទិ៍ សុខសន្តិភាពតាម​រយៈ​រូបមន្តពិសេសគ្មានពីរគឺ «នយោបាយឈ្នះ-ឈ្នះ» របស់សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា ក្នុងការប្រែក្លាយសង្គ្រាម​ឱ្យទៅជាសន្តិភាព ស្ថិរភាព ឯករាជ្យភាព សាមគ្គីភាព និងបូរណភាពទឹកដី លំនឹង​ម៉ា​ក្រូ​សេដ្ឋកិច្ច កម្លាំងពលកម្មវ័យក្មេងដែលមានលក្ខណៈរួចរាល់​សម្រាប់បរិវត្តកម្មឌី​ជី​ថល ហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែមាន​ភាព​សម្បូរ​បែប និងប្រទាក់ក្រឡា។

ជាមួយគ្នានេះ លោកឧបនាយករដ្ឋមន្ត្រីក៏បានបន្តលើកឡើងអំពីវឌ្ឍនភាព​សំខាន់ៗ​របស់រាជរដ្ឋាភិបាលកម្ពុជាក្នុងនីតិកាលទី៧ នៃរដ្ឋសភា ពិសេសក្នុងក្របខណ្ឌ​របស់​ក្រុមប្រឹក្សាអភិវឌ្ឍន៍កម្ពុជាលើកិច្ចការងារសម្របសម្រួល និងជំរុញកិច្ចវិនិយោគ។ ស្របតាមចក្ខុវិស័យដ៏វែងឆ្ងាយរបស់ប្រមុខថ្នាក់ដឹកនាំកម្ពុជា ក្រុមប្រឹក្សាអភិវឌ្ឍន៍​កម្ពុជាបានបន្តធ្វើឱ្យប្រសើរឡើងនូវបរិយាកាសវិនិយោគនៅក្នុងប្រទេសកម្ពុជាតាមរយៈការធ្វើឌីជីថលូបនីយកម្ម ដោយដាក់ឱ្យប្រើប្រាស់ប្រព័ន្ធគ្រប់គ្រងគម្រោង​វិនិយោគ​កម្ពុជា (ប្រព័ន្ធ cdcIPM) ដែលផ្ដល់លទ្ធភាពទាំងស្រុងជូនវិនិយោគិនអាចដាក់​ពាក្យ​ស្នើ​សុំចុះបញ្ជីវិនិយោគមានលក្ខណៈសម្បត្តិគ្រប់គ្រាន់ និងតាមដានវឌ្ឍនភាពពាក្យ​ស្នើសុំ​របស់​ខ្លួនបានដោយងាយស្រួល គ្រប់ពេលវេលា និងពីគ្រប់ទីកន្លែង។ ជា​ពិសេស​ការអនុម័តគម្រោងវិនិយោគរបស់ថ្នាក់ដឹកនាំចំណាយពេលវេលាតិច និង​អាច​អនុវត្តការងារបានគ្រប់ពេលវេលា និងពីគ្រប់ទីកន្លែងផងដែរ។

លោកឧបនាយករដ្ឋមន្ត្រី បានសម្តែងនូវការកោតសរសើរ និងវាយតម្លៃខ្ពស់​ចំពោះ​ទំនាក់ទំនងមិត្តភាពជាមួយសហរដ្ឋអាម៉េរិក ដោយឈរលើគោលការណ៍​គោរពគ្នា​ទៅ​វិញទៅមក ព្រមទាំងមានក្តីសោមនស្សរីករាយចំពោះភាពវិជ្ជមាន​ក្នុងទំនាក់​ទំនង​ទ្វេ​ភាគីរាប់ចាប់ពីវិស័យវិនិយោគ ពាណិជ្ជកម្ម ការតភ្ជាប់រវាងប្រជាជននិងប្រជាជន និង​ទំនាក់ទំនងការទូត។

លោកឧបនាយករដ្ឋមន្ត្រី បានស្នើសុំគណៈប្រតិភូសភាអាម៉េរិក បន្តជំរុញវិនិយោគិន​អា​​ម៉េរិកឱ្យមកបណ្តាក់ទុន និងធ្វើធុរកិច្ចនៅកម្ពុជាឱ្យបានកាន់តែប្រសើរ​ឡើងបន្ថែម​ទៀត។

ក្នុងឱកាសនេះ លោកស្រីប្រធានគណៈប្រតិភូ​ក៏បានថ្លែងអំណរគុណចំពោះ​បដិ​សណ្ឋារ​កិច្ចប្រកបដោយភាពកក់ក្តៅរបស់រាជរដ្ឋាភិបាលកម្ពុជា និងសម្តែងនូវភាពរីក​រាយដែលបានមកបំពេញទស្សនកិច្ចជាលើកទី២ នៅក្នុងប្រទេសកម្ពុជា។ ពិសេស​ជាង​នេះ លោកស្រីបានសម្តែងនូវការកោតសរសើរចំពោះអំពីការ​អភិវឌ្ឍ​ដ៏ឆាប់​រហ័ស​របស់ប្រទេសកម្ពុជា និងការវិវត្តជាវិជ្ជមាននៃទំនាក់ទំនងទ្វេភាគីរវាងប្រទេសកម្ពុជា និងសហរដ្ឋអាម៉េរិក។ តាមរយៈជំនួបជាមួយសម្តេចមហាបវរធិបតីនាយករដ្ឋមន្ត្រី និង​ថ្នាក់​ដឹកនាំកម្ពុជាជាច្រើនរូបនៅក្នុងឱកាសដំណើរទស្សនកិច្ចនេះ លោកស្រីបាន​បង្ហាញនូវសុទិដ្ឋិនិយមខ្ពស់លើការបន្តរីកលូតលាស់នៃទំនាក់ទំនង និងកិច្ចសហ​ប្រតិ​បត្តិការរវាងប្រទេសទាំងពីរនាពេលអនាគត។

សូមបញ្ជាក់ថា តាមរយៈជំនួបកាលពីខែឧសភា ឆ្នាំ២០២៥ នៅទីក្រុងវ៉ាស៊ីនតោន រវាងលោកឧបនាយករដ្ឋមន្ត្រី និងលោកស្រីផ្ទាល់ ពោលគឺអំឡុងពេល​ចរចាលើ​កិច្ច​ព្រម​ព្រៀងពន្ធបដិការ លោកស្រីក៏បានលើកឡើងអំពីគោលបំណងក្នុង​ការ​បង្កើនកិច្ចសហប្រតិបត្តិការរវាងប្រទេសកម្ពុជា និងសហរដ្ឋអាម៉េរិកបន្ថែមផងដែរ។

សូមបញ្ជាក់បន្ថែមថា ទស្សនកិច្ចលើកទី១ របស់លោកស្រី Beth Van Duyne មកកាន់ប្រទេសកម្ពុជា គឺនៅអំឡុងខែសីហា ឆ្នាំ២០២២ កន្លងទៅ៕