រដ្ឋមន្ត្រីការបរទេសថ្មី បានចូលកាន់តំណែងនៅថ្ងៃទី៥ ខែមេសានេះហើយ ក្រោយការអនុម័តពីរដ្ឋសភានិងព្រះរាជ ក្រិត្យពីព្រះមហាក្សត្រ ។ ឯកឧត្តមទេសរដ្ឋមន្ត្រី ប្រាក់ សុខុន បានក្លាយជារដ្ឋមន្ត្រីក្រសួងការបរទេសនៅរសៀល ថ្ងៃទី៥ ខែមេសានេះ ក្នុងពិធីមួយដែលអញ្ជើញចូលរួមដោយ សម្តេចអគ្គមហាសេនាបតីតេជោ ហ៊ុនសែន ។
ឯកឧត្តម ហោ ណាំហុង បានមានប្រសាសន៍រំលឹកកិច្ចប្រឹងប្រែងខិតខំក្នុងរយៈពេល ៣ទសវត្ស ដែលលោកបានបំពេញការងារដែល សម្តេចតេជោសែន បានប្រគល់ជូន ដើម្បីផលប្រយោជន៍ជាតិ និងនយោបាយ ។ ឯកឧត្តម ហោ ណាំហុង បានថ្លែងអំណរគុណចំពោះ សម្តេចតេជោ ដែលបានផ្តល់កិត្តិយសដល់លោកបំរើការងារជាឧបនាយករដ្ឋមន្ត្រីបន្តទៀត ។
ក្នុងពិធីតែងតាំងនោះ ឯកឧត្តមទេសរដ្ឋមន្ត្រី ប្រាក់ សុខុន បានមានប្រសាសន៍ប្តេជ្ញាដឹកនាំក្រសួងការ បរទេស ដើម្បីការពារផលប្រយោជន៍ប្រទេសជាតិ និងប្រជាជនកម្ពុជា ។ ឯកឧត្តម ប្រាក់ សុខុន បានបញ្ជាក់ថា កាលពី ១៧ឆ្នាំមុន លោកធ្លាប់បានបន្តតំណែងម្តងរួចមកហើយពី ឯកឧត្តម ហោ ណាំហុង ក្នុងឋានៈជាឯកអគ្គរាជទូតកម្ពុជាប្រចាំប្រទេសបារាំង… សហភាពអឺរ៉ុប និងការិយាល័យអង្គការសហប្រជាជាតិ ប្រចាំទីក្រុងហ្សឺណែវប្រទេសស្វីស ។ ឯកឧត្តមបញ្ជាក់ថា ថ្ងៃនេះ គឺជាលើកទី ២ហើយ ដែលឯកឧត្តមបានបន្តតំណែងពី ឯកឧត្តម ហោ ណាំហុង ក្នុងការដឹកនាំក្រសួងការបរទេស និងសហប្រតិបត្តិការអន្តរជាតិ ។
