ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC នៅថ្ងៃទី៦ ខែតុលា ឆ្នាំ២០២៥នេះ បានទទួលជួបសម្តែងការគួរសម និងពិភាក្សាការងារជាមួយលោកស្រី Astrid Emilie Helle ឯកអគ្គរដ្ឋទូតប្រទេសន័រវេស្សប្រចាំកម្ពុជា ដែលមាននិវេសដ្ឋាននៅក្រុងបាងកក ប្រទេសថៃ និងសហការី អមដំណើដោយលោក Hans Risser ប្រធានអង្គការ NPA ប្រចាំនៅកម្ពុជាផងដែរ។
ក្នុងជំនួបនេះ ឯកឧត្តម ហេង រតនា បានជម្រាបជូនលោកស្រីឯកអគ្គរដ្ឋទូត អំពីលទ្ធផលការងារនៃវិស័យមីននៅកម្ពុជា និងសមិទ្ធិផលសម្រេចបានរបស់អង្គភាព CMAC ជាពិសេសកិច្ចសហការជាមួយអង្គការ Norwegian People’s Aid (NPA) ដែលជាដៃគូយ៉ាងជិតស្និតជិតរបស់អង្គភាព CMAC ជាង៣៣ឆ្នាំមកហើយ ពោលចាប់ពីឆ្នាំ១៩៩២មកម្លេះ។
ជំនួយដ៏មានតម្លៃរបស់ប្រជាជន និងរដ្ឋាភិបាលន័រវេស្សបានរួមចំណែកយ៉ាងសំខាន់ ក្នុងការជួយដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការលុបបំបាត់គ្រាប់មីន និងសំណល់យុទ្ធភណ្ឌសង្គ្រាម ដើម្បីការពារអាយុជីវិតប្រជាពលរដ្ឋកម្ពុជា និងចូលរួមពង្រឹងសន្តិភាព ព្រមទាំងការអភិវឌ្ឍសេដ្ឋកិច្ចសង្គមជាតិឡើងវិញក្រោយសង្គ្រាម។
ជាមួយគ្នានេះដែរ ក៏មានការផ្លាស់ប្តូរយោបល់គ្នា អំពីស្ថានការណ៍ជម្លោះព្រំដែនកម្ពុជា-ថៃ ដែលជាបញ្ហាសំខាន់ត្រូវការការតាមដាន ជាពិសេសផលប៉ះពាល់យ៉ាងធ្ងន់ធ្ងរពីសំណល់យុទ្ធភណ្ឌសង្គ្រាមរបស់ថៃ មកលើដែនអធិបតេយ្យ និងភូមិដ្ឋានរបស់ប្រជាពលរដ្ឋកម្ពុជា។ ក្នុងកាលៈទេសៈនេះ រាជរដ្ឋាភិបាលកម្ពុជាក្រោមការដឹកនាំរបស់សម្តេចបវរធិបតី ហ៊ុន ម៉ាណែត បាននិងកំពុងគោរពអនុវត្តកិច្ចព្រមព្រៀងបទឈប់បាញ់ យ៉ាងម៉ឺងម៉ាត់ និងសង្កត់ចិត្តអត់ធ្មត់សំដៅសម្រេចបានសន្តិភាព សម្រាប់ប្រទេសនិងប្រជាជនជិតខាងគ្នាទាំង២។
ជាការឆ្លើយតប លោកស្រីឯកអគ្គរដ្ឋទូត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលក្នុងវិស័យមីន ដែលបានសម្រេចសមិទ្ធិផលយ៉ាងធំធេង និងជាគំរូល្អស្របតាមស្មារតនៃអនុសញ្ញាអូតាវ៉ា។
លោកស្រីក៏បានបញ្ជាក់បន្ថែមថា ប្រទេសន័រវេស្សមានក្តីសោមនស្ស ក្នុងការធ្វើកិច្ចសហប្រតិបត្តិការជាមួយកម្ពុជា លើវិស័យសកម្មភាពមីន ដើម្បីរួមចំណែកក្នុងការអភិវឌ្ឍ សង្គមជាតិឱ្យកាន់តែរីកចម្រើនបន្ថែមទៀត ព្រមទាំងបានបញ្ជាក់ជំហថា រដ្ឋាភិបាលន័រវេស្សនឹងបន្តគាំទ្រកម្ពុជា តាមរយៈអង្គការ NPA ក្នុងការបោសសម្អាតមីន ការអប់រំអំពីគ្រោះថ្នាក់មីន និងអភិវឌ្ឍសហគមន៍ក្រោយការបោសសម្អាតមីនរួច។
លោកស្រីក៏បញ្ជាក់បន្ថែមអំពីជំហររបស់រដ្ឋាភិបាលន័រវេស្សពិតជាចង់ឃើញការអនុវត្តបទឈប់បាញ់ឱ្យបានម៉ឺងម៉ាត់ និងការស្តារសន្តិភាពឡើងវិញ ដែលនេះជាឧត្តមប្រយោជន៍សម្រាប់ប្រទេស និងប្រជាជនទាំង២ ក៏ដូចជាប្រទេសក្នុងតំបន់ និងក្នុងសកលលោកផងដែរ។
ក្នុងពេលជាមួយគ្នានេះដែរ លោក Hans Risser ក៏បានបញ្ជាក់ជំហរបន្ថែមថា អង្គភាព NPA និងបន្តសហការជាមួយអង្គភាព CMAC ក្នុងរយៈពេល៥ឆ្នាំ (២០២៦-២០៣០) បន្តទៀត តាមរយៈទទួលជំនួយពីរដ្ឋាភិបាលន័រវេស្ស និងសហរដ្ឋអាមេរិក ក៏ដូចជាម្ចាស់ជំនួយមួយចំនួនទៀត។
ក្នុងឱកាសក្នុងជំនួបនេះដែរ លោកស្រីឯកអគ្គរដ្ឋទូត ក៏បានបង្ហាញនូវក្ដីសោកស្តាយ និងចូលរួមរំលែកទុក្ខយ៉ាងជ្រាលជ្រៅ ចំពោះការបាត់បង់ជីវិត និងទ្រព្យសម្បត្តិរបស់ប្រជាពលរដ្ឋកម្ពុជា ដោយសារសង្គ្រាមរយៈពេល៥ថ្ងៃរវាងកម្ពុជា-ថៃ៕
