(ភ្នំពេញ)៖ នៅព្រឹកថ្ងៃទី០៦ ខែ វិច្ឆិកា ឆ្នាំ២០១៧ ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានទទួលជួបតំណាងមកពីអង្គការអភិវឌ្ឍន៍ឧស្សាហកម្មសហប្រជាជាតិ ហៅកាត់ថា UNIDO រួមមានលោក Steffen Kaeser ប្រធានទទួលបន្ទុកផ្នែកស្តង់ដារ និងកិច្ចសម្រួលពាណិជ្ជកម្ម និងលោក Karl Shebesta ប្រធានទទួលបន្ទុកផ្នែកប្រព័ន្ធម្ហូបអាហារ និងអាហារបំប៉ន ដើម្បីពិភាក្សាការងារនៅទីស្តីការក្រសួងឧស្សាហកម្ម និងសិប្បកម្ម។
គោលបំណងនៃជំនួបពិភាក្សា គឺតំណាងអង្គការ UNIDO បានធ្វើសេចក្តីរាយការណ៌សង្ខេបអំពីការត្រៀមរៀបចំបើកសិក្ខាសាលាស្តីពីក្របខ័ណ្ឌការងារនៃកម្មវិធីសម្រាប់ភាពជាដៃគូប្រចាំប្រទេស (PCP Framwork) និងចង់បានការណែនាំ និងការផ្តល់ធាតុចូលមួយចំនួនពី ឯកឧត្តមទេសរដ្ឋមន្ត្រី ចម ប្រសិទ្ធ ផងដែរ។
តំណាង UNIDO បានបញ្ជាក់ថា៖ ការត្រៀមបើកសិក្ខាសាលានាថ្ងៃបន្ទាប់នេះ គឺផ្តោតជាសំខាន់ទៅលើផែនការសកម្មភាពនៃភាពជាដៃគូ សម្រាប់ការអភិវឌ្ឍវិស័យឧស្សាហកម្មពីឆ្នាំ២០១៨-២០២៣។ ជាមួយគ្នានេះតំណាងអង្គការ UNIDO ក៏បានជម្រាបជូនពីពីគម្រោងចុះស្វែងយល់នៅតាមបណ្តាខេត្តមួយចំនួនដូចជា៖ ខេត្តកំពត ខេត្តព្រះសីហនុ និងខេត្ត សៀមរាប ដែលជាខេត្តមានសក្តានុពលផ្នែកទេសចរណ៌ និងឧស្សាហកម្ម។
ឯកឧត្តម ទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងចាត់ទុកការត្រៀមរៀបចំសិក្ខាសាលានៅថ្ងៃស្អែកនេះ ជាសម្មតិកម្មដ៏សំខាន់សម្រាប់ការស្វែងយល់នូវអ្វីជាឱកាស និងភាពប្រឈមក្នុងការអភិវឌ្ឍវិស័យឧស្សាហកម្មនៅកម្ពុជា ក៏ដូចជាប្រសិទ្ធិភាពនៃការទទួល និងការប្រើប្រាស់ជំនួយអន្តរជាតិសម្រាប់ការអភិវឌ្ឍវិស័យឧស្សាហកម្មប្រកបដោយចិរភាព។
ដើម្បីអោយគម្រោងកម្មវិធីអនុវត្តបានជោគជ័យតាមការរំពឹងទុក ឯកឧត្តមទេសរដ្ឋមន្ត្រី ចម ប្រសិទ្ធ បានផ្តល់អនុសាសន៍ទៅលើការកំណត់កាលបរិច្ឆេទ ច្បាស់លាស់នៃការអនុវត្តគម្រោងកម្មវិធីនីមួយៗ តាមរយៈការបង្កើតក្រុមការងារជំនាញដោយឡែកៗពីគ្នា ដើម្បីអនុវត្តទៅលើវិស័យជាអាទិភាពតាមផែនការជាក់លាក់ដូចជា៖
-ការគណនាអោយឃើញនូវតម្លៃសង្វាក់ផលិតកម្ម
-គុណសម្បត្តិនៃតំបន់សេដ្ឋកិច្ចពិសេស
-ភាពចាំបាច់នៃការកាត់បន្ថយបែបបបទរដ្ឋបាលស្មុគស្មាញ
-កិច្ចសម្រួលពាណិជ្ជកម្ម
-ប្រសិទ្ធិភាពនៃការអនុវត្តគោលនយោបាយអភិវឌ្ឍន៌វិស័យឧស្សាហកម្ម និង
-តម្រូវការនៃការបង្កើតមជ្ឈមណ្ឌលវិជ្ជាជីវៈ ដើម្បីបណ្តុះបណ្តាលពង្រឹងសមត្ថភាព និងជំនាញអោយឆ្លើយតបនឹងទីផ្សារការងារ។ល។
សូមបញ្ជាក់ថា៖ កម្មវិធីសម្រាប់ភាពជាដៃគូប្រចាំប្រទេស (PCP) ជាគម្រោងកម្មវិធីថ្មីមួយរបស់អង្គការ UNIDO ដើម្បីជម្រុញអភិវឌ្ឍវិស័យឧស្សាហកម្មប្រកបដោយចិរភាព និងបរិយាប័ន ស្របតាមគោលដៅអភិវឌ្ឍរបស់អង្គការសហប្រជាជាតិដល់ឆ្នាំ២០៣០។ គម្រោងកម្មវិធីនេះ បាននិងកំពុងអនុវត្តនៅប្រទេសចំនួន០៣រួមមាននៅប្រទេស៖ អេត្យូពី សេណេហ្គាល និងប៉េរូ។ ដោយឡែកនៅតំបន់អាសីុ អង្គការ UNIDO បានជ្រើសរើសប្រទេសកម្ពុជា ជាប្រទេសគំរូក្នុងការអនុវត្តកម្មវិធីនេះ ហើយនៅចុងខែវិច្ឆិកានេះដែរ ឯកឧត្តមទេសរដ្ឋមន្ត្រី ចម ប្រសិទ្ធ នឹងដឹកនាំប្រតិភូក្រសួងឧស្សាហកម្ម និងសិប្បកម្ម អញ្ជើញទៅចូលរួមសន្និសីទលើកទី១៧ របស់អង្គការ UNIDO នៅទីក្រុង Vienna ប្រទេសអូទ្រីស ព្រមទាំងត្រៀមចុះហត្ថលេខាលើការអនុវត្តគម្រាងកម្មវិធី PCP នេះផងដែរ។