ភ្នំខ្នងផ្សារតំបន់ទេសចរណ៍ធម្មជាតិដ៏ល្បាញល្បីនាទឹកដីស្រុកឱរ៉ាល់ខេត្តកំពង់ស្ពឺ សាងភាពល្បីរន្ទឺគ្រប់ទីកន្លែងព្រោះតែសម្រស់ដងគិរីបព្វតាដ៏ស្រស់បំព្រងនោះ នៅពេលនេះត្រូវបានស្អិតស្អាងឱ្យកាន់តែទាក់ទាញថែមទៀត ជាមួយការរៀបចំហេដ្ឋារចនាសម្ព័ន្ធជាច្រើនដើម្បីបដិសណ្ឋារកិច្ចឱ្យកាន់តែល្អប្រសើរសម្រាប់អ្នកទេសចរទីជិតឆ្ងាយ។
ភ្នំខ្នងផ្សារ ជាតំបន់ព្រៃភ្នំដ៏ធំមួយ មានទីតាំងប្រសព្វមុម៣ នៃខេត្តកំពង់ស្ពឺ កោះកុង និងពោធិ៍សាត់ សម្បូរទៅដោយព្រៃឈើក្រាស់ ជ្រលងភ្នំទាបខ្ពស់ៗ វាលស្រល់ដ៏ស្រស់ស្អាត និងសម្បូរទៅដោយសត្វព្រៃកម្រជាច្រើនប្រភេទ។ មានចម្ងាយប្រមាណ១៦៥គីឡូម៉ែត្រ ពីរាជធានីភ្នំពេញ ភ្នំខ្នងផ្សារជាទីឋានធម្មជាតិ ដែលបានអន្ទងដួងចិត្តអ្នកទេសចរជិតឆ្ងាយឱ្យទៅលេងកម្សាន្តមិនចេះជិនណាយនោះឡើយ។
អំណាចសម្រស់ធម្មជាតិដ៏អស្ចារ្យនៃភ្នំខ្នងផ្សារអន្ទងមិនត្រឹមតែប្រជាពលរដ្ឋទូទៅនោះទេ ប៉ុន្តែក៏បានអន្ទងលួងលោមដួងចិត្តប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត ឱ្យលបលួចទៅគយគន់ផងដែរ។ ដំណើរលបលួចទៅកាន់ភ្នំខ្នងផ្សាររបស់សម្តេចមហាបវរធិបតី ហ៊ុន ម៉ាណែត កាលពីថ្ងៃទី៨ ខែមីនា ឆ្នាំ២០២៥ មិនមែនជាដំណើរដើម្បីតែគយគន់សម្រស់ភ្នំខ្នងផ្សារនោះទេ តែក៏ជាដំណើរដើម្បីពិនិត្យពិច្ច័យកែខៃច្នៃឱ្យទីឋានធម្មជាតិដ៏ពិសិដ្ឋមួយនេះ ក្លាយទៅជាកន្លែងកម្សាន្ត និងទាញយកប្រយោជន៍សេដ្ឋកិច្ចដល់ប្រជាពលរដ្ឋនៅតំបន់នោះផងដែរ។
ដំណើរអមដោយលោក អ៊ាង សុផល្លែត រដ្ឋមន្ត្រីក្រសួងបរិស្ថាន លោក ហួត ហាក់ រដ្ឋមន្ត្រីក្រសួងទេសចរណ៍ និងលោក ជាម ច័ន្ទសោភ័ណ អភិបាលខេត្តកំពង់ស្ពឺផងនោះ សម្តេចមហាបវរធិបតី បានជ្រើសយកថ្មើរជើងចាប់ពីជើងភ្នំ រហូតដល់កំពូលភ្នំ។ ការជ្រើសយកការធ្វើដំណើរដោយថ្មើរជើងចាប់ពីជើងភ្នំ ដល់កំពូលភ្នំ ដើម្បីសម្តេចពិនិត្យពិច្ច័យ និងចាត់ចែងលើការរៀបចំហេដ្ឋារចនាសម្ព័ន្ធ រួមនិងកិច្ចការមួយចំនួន ដើម្បីសម្រួលដល់ការធ្វើដំណើររបស់អ្នកទេសចរ និងការធានាបានផលប្រយោជន៍សម្រាប់ប្រជាពលរដ្ឋនៅក្នុងសហគមន៍។
ក្រោយដំណើរទស្សនកិច្ចទៅកាន់ភ្នំខ្នងផ្សារ សម្តេចមហាបវរធិបតី ហ៊ុន ម៉ាណែត បានណែនាំឱ្យក្រសួងបរិស្ថាន ក្រសួងទេសចរណ៍ ក្រសួងប្រៃសនីយ៍ និងទូរគមនាគមន៍ ក្រសួងអភិវឌ្ឍន៍ជនបទ ក៏ដូចជាអាជ្ញាធរខេត្តកំពង់ស្ពឺ រៀបចំកែលំអហេដ្ឋារចនាសម្ព័ន្ធរួមមានផ្លូវ ចំណតយានយន្ត បន្ទប់ទឹក ទីស្នាក់អាស្រ័យ និងដំឡើងប្រព័ន្ធចាប់សេវាទូរស័ព្ទជាដើម។ ជាពិសេសសម្តេចមហាបវរធិបតី បានដកហូតសិទ្ធិក្រុមហ៊ុនឯកជន ដែលមានបំណងវិនិយោគនៅតំបន់នោះ ធ្វើឱ្យបាត់ប្រយោជន៍ប្រជាសហគមន៍ ហើយជំនួសដោយការពង្រឹងសមត្ថភាពបដិសណ្ឋារកិច្ចជូនប្រជាសហគមន៍វិញ ដើម្បីរួមចំណែកលើកកម្ពស់របស់ប្រជាសហគមន៍។
ក្រោយពីដាក់ចេញនូវផែនការដ៏ច្បាស់លាស់របស់ប្រមុខរាជរដ្ឋាភិបាលហើយនោះ ក្រសួងទាំង៣ និងអាជ្ញាធរខេត្តកំពង់ស្ពឺ បានចាប់ផ្តើមបំពេញកិច្ចការរបស់ខ្លួនរៀងៗខ្លួន ដោយមិនបង្អង់នោះឡើយ។ ៦៦ថ្ងៃក្រោយដំណើររបស់សម្តេចមហាបវរធិបតី ពោលនៅថ្ងៃទី១៦ ខែឧសភា ឆ្នាំ២០២៥ លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក៏បានបើកការដ្ឋានសាងសង់ផ្លូវ ហើយហេដ្ឋារចនាសម្ព័ន្ធនានា ក៏បានចាប់ផ្តើមសាងសង់ជាបន្តបន្ទាប់ផងដែរ។
រយៈពេលជាង២០០ថ្ងៃ មកដល់ត្រឹមដើមខែមករា ឆ្នាំ២០២៦នេះ មានសមិទ្ធផលជាច្រើននៅទីតាំងជើងភ្នំខ្នងផ្សារ ដែលគេហៅថា ដំណាក់ដំរីនោះ បានសាងសង់រួចរាល់ហើយ។ សមិទ្ធផលទាំងនោះរួមមាន៖ ផ្លូវលំក្រាលគ្រួសដែលនឹងបន្តក្រាលកៅស៊ូដោយក្រសួងអភិវឌ្ឍន៍ជនបទ មណ្ឌលព័ត៌មានជាមួយទីសង្គ្រោះបន្ទាន់ ផ្សារសហគមន៍ ហាងកាហ្វេសសហគមន៍ ចំណតរថយន្តក្រុង រថយន្តទេសចរណ៍ ទោចក្រយានយន្ត ប្រព័ន្ធទឹកអណ្ដូងអនាម័យដើរដោយថាមពលពន្លឺព្រះអាទិត្យ ប្រព័ន្ធអគ្គិសនីដើរដោយថាមពលពន្លឺព្រះអាទិត្យ សួនច្បារ បន្ទប់ងូតទឹកប្រុស-ស្រី បន្ទប់អនាម័យ ប្រុស-ស្រី-ជនពិការ ផ្ទះស្នាក់នៅរបស់ប្រជាសហគមន៍ដែលជាអ្នកគ្រប់គ្រងគោលដៅលម្ភៃបៃតង និងផ្លូវថ្មើរជើងឡើងទៅទីតាំងដានព្រះអង្គ ដែលមានកន្លែងដាក់សំរាម និងកន្លែងអង្គុយសម្រាកតាមដងផ្លូវក្រោមម្លប់ឈើដ៏ត្រឈឹងត្រឈៃ។
ជាជំហានបន្តក្រសួងបរិស្ថាន នឹងចាប់ផ្តើមអភិវឌ្ឍនៅទីតាំងដានព្រះអង្គ (ចង្កេះភ្នំខ្នង ផ្សារ) នឹងបើកការដ្ឋានគម្រោងដើម្បីបន្តកសាងហេដ្ឋារចនាសម្ព័ន្ធចាំបាច់ រួមមានមណ្ឌលព័ត៌មានជាមួយនឹងទីសង្គ្រោះបន្ទាន់ ហាងលក់វត្ថុអនុស្សាវរីយ៍ ភោជនីយដ្ឋាន ចំណតរថយន្តទេសចរណ៍-ទោចក្រយានយន្ត អាងស្តុកទឹក អណ្តូងទឹកសម្រាប់អ្នកថ្មើរជើងប្រើប្រាស់ បន្ទប់ងូតទឹកប្រុស-ស្រី បន្ទប់អនាម័យប្រុស-ស្រី-ជនពិការ និងជាពិសេសកន្លែងអង្គុយលម្ហែ បណ្តែតអារម្មណ៍គយគន់ទេសភាព និងស្រូបខ្យល់អាកាសដ៏ល្អបរិសុទ្ធពីធម្មជាតិបៃតង។
លោក អ៊ាង សុផល្លែត បានឱ្យដឹងថា ទន្ទឹមនឹងកសាងហេដ្ឋារចនាសម្ព័ន្ធនានាហើយនោះ ក្រសួងបរិស្ថានបាននិងកំពុងអភិវឌ្ឍគោលដៅលម្ភៃបៃតងភ្នំខ្នងផ្សារ ដើម្បីលើកកម្ពស់ជីវភាពសហគមន៍មូលដ្ឋានឱ្យកាន់តែប្រសើរ តាមរយៈការផ្តល់សេវាកម្មជូនភ្ញៀវទេសចរ ការអភិរក្សធនធានធម្មជាតិ ការលើកកម្ពស់សម្រស់ធម្មជាតិ ការអនុវត្តកសិកម្មវៃឆ្លាត និងការប្រែក្លាយប្រជាសហគមន៍ឱ្យទៅជាសហគ្រិន គ្រប់គ្រងអាជីវកម្មគោលដៅលម្ហែបៃតងនៅមូលដ្ឋានរបស់ខ្លួនដោយផ្ទាល់៕
