នាព្រឹកថ្ងៃទី១៦ ខែមីនា ឆ្នាំ២០២៦នេះ ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានអញ្ជេីញជាអធិបតីក្នុងកិច្ចប្រជុំស្តីពីការពិនិត្យ និងកំណត់ព្រំប្រទល់ដីព្រែក ចំនួន ០៥ទីតាំង និង ការស្នើសុំចុះបញ្ជីដីតាមនីតិវិធីពិសេសជូនមន្ទីរធនធានទឹក និងឧតុនិយមខេត្ត។
កិច្ចប្រជុំនេះមានការអញ្ជេីញចូលរួមពី លោក អភិបាលរងខេត្ត លោកប្រធានមន្ទីរពាក់ព័ន្ធនានាក្នុងខេត្ត លោកអភិបាលស្រុករមាសហែក-ស្រុកស្វាយជ្រំ និងស្រុករំដួល
លោកនាយកទីចាត់ការអន្តរវិស័យសាលាខេត្ត លោកប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាល ស្រុករំដួល ស្រុករមាសហែក និងស្រុកស្វាយជ្រំ លោក លោកស្រីមេឃុំពាក់ព័ន្ធ នៃស្រុករំដួល ស្រុករមាសហែក និងស្រុកស្វាយជ្រំ។
សូមជម្រាបជូនថា ក្រោមការដឹកនាំរបស់ ឯកឧត្តមអភិបាលនៃគណៈអភិបាលខេត្ត ប៉េង ពោធិ៍សា និងជាប្រធានគណៈ កម្មាធិការគ្រប់គ្រងអាងទន្លេ ខេត្ត បានយកចិត្តទុក្ខដាក់ឲ្យមានការចុះសិក្សាកំណត់ផ្ទៃអាងទឹក ទន្លេ និង ព្រែក ក្នុងខេត្ត គឺវាពិតជាមានសារៈសំខាន់ណាស់ សម្រាប់បម្រើឲ្យវិស័យកសិកម្ម និងពហុបំណង ដល់ ប្រជាពលរដ្ឋនៅក្នុងខេត្ត។
ទន្ទឹមនេះ ការកំណត់ គឺស្របទៅនឹងទំហំនៃការរីករាលដាល ការវាទយកដីសាធារណៈជា កម្មសិទ្ធិ និងមានការស្នើសុំដីធ្វើកម្មសិទ្ធិពាក់ព័ន្ធនឹងអាងទឹក ទន្លេ និងព្រែក កើនឡើងពីមួយឆ្នាំទៅមួយឆ្នាំ។ ផ្អែកលើកត្តាទាំងអស់នេះ រដ្ឋបាលខេត្តមានបំណងកំណត់ផ្ទៃអាងទឹក ទន្លេ និងព្រែក ទាំងអស់ក្នុងខេត្តឲ្យ បានច្បាស់លាស់ ក្នុងនោះកន្លងមកគណៈកម្មាធិការគ្រប់គ្រងអាងទន្លេខេត្ត បានកំណត់ព្រំប្រទល់អាងទឹកបាន ចំនួន ១២ កន្លែង ហើយបានសម្រេចដោយ ឯកឧត្តម សាយ សំអាល ឧបនាយករដ្ឋមន្ត្រី រដ្ឋមន្រ្តីក្រសួង រៀបចំដែនដី នគរូបនីយកម្ម និងសំណង់ ព្រមទាំង ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុ និយម នៅថ្ងៃទី១២ ខែកុម្ភៈ ឆ្នាំ២០២៦ ហេីយកិច្ចការនេះរដ្ឋបាលខេត្ត និងនៅតែបន្តធ្វេីជាជំហានបន្តបន្ទាប់ទៀត សម្រាប់បន្សល់ទុកដល់កូនចៅជំនាន់ក្រោយ។
