ក្នុងបរិយាកាសដ៏សប្បាយរីករាយ និងពោរពេញដោយក្តីស្រឡាញ់អាណិតអាសូរ នារសៀលថ្ងៃទី៣១ ខែមីនា ឆ្នាំ២០២៦ ឯកឧត្តមហ៊ុន ម៉ានីឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) បានអញ្ជើញជាអធិបតីក្នុងពិធីសំណេះសំណាល និងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ជាមួយបងប្អូនភៀសសឹក នៅជំរំជនភៀសសឹក ស្ថិតក្នុងវត្តច័ន្ទស៊ីសាមគ្គីរតនារាម ឃុំកូប ស្រុកអូរជ្រៅ ខេត្តបន្ទាយមានជ័យ។
ជាកិច្ចចាប់ផ្តើមនៃពិធីនេះ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ស្វាគមន៍យ៉ាងកក់ក្តៅចំពោះវត្តមានរបស់ឯកឧត្តមឧបនាយករដ្ឋមន្ត្រី ដែលតែងតែយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋគ្រប់ស្រទាប់វណ្ណៈ។ ឯកឧត្តមអភិបាលខេត្តបានគូសបញ្ជាក់ថា «វត្តមានរបស់ឯកឧត្តមឧបនាយករដ្ឋមន្ត្រី នាពេលនេះ គឺជាការផ្តល់កម្លាំងចិត្តយ៉ាងធំធេងដល់បងប្អូនភៀសសឹក និងប្រជាពលរដ្ឋក្នុងមូលដ្ឋាន ស្របពេលដែលយើងកំពុងត្រៀមអបអរសាទរបុណ្យចូលឆ្នាំថ្មី។ នេះសបញ្ជាក់ឱ្យឃើញពីស្មារតីសាមគ្គីភាព និងការមិនបោះបង់ចោលពលរដ្ឋណាម្នាក់ឱ្យនៅឯកោឡើយ»។
ក្នុងឱកាសដ៏មានអត្ថន័យនោះ ឯកឧត្តមឧបនាយករដ្ឋមន្ត្រី ហ៊ុន ម៉ានី បានពាំនាំនូវការសួរសុខទុក្ខពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រី និងសម្តេចតេជោ ហ៊ុន សែន ប្រធានព្រឹទ្ធសភា ជូនដល់បងប្អូនប្រជាពលរដ្ឋទាំងអស់។ ឯកឧត្តមបានសង្កត់ធ្ងន់លើតម្លៃនៃ «សន្តិភាព» ដែលអនុញ្ញាតឱ្យយើងមានឱកាសជួបជុំគ្នាសើចសប្បាយ និងរៀបចំកម្មវិធីសង្ក្រាន្តនៅគ្រប់ទីកន្លែង។
ឯកឧត្តមឧបនាយករដ្ឋមន្ត្រីបានមានប្រសាសន៍ទៅកាន់បងប្អូនភៀសសឹកថា ការយកចិត្តទុកដាក់ជានិរន្តរ៍ រាជរដ្ឋាភិបាល និងសហភាពសហព័ន្ធយុវជនកម្ពុជា មិនដែលបំភ្លេចបងប្អូនឡើយ ទោះស្ថិតក្នុងកាលៈទេសៈណាក៏ដោយ។ ការរៀបចំកម្មវិធីសង្ក្រាន្តនៅទីនេះ គឺដើម្បីនាំមកនូវស្នាមញញឹម និងការផ្សារភ្ជាប់ទំនាក់ទំនងរវាងយុវជន និងប្រជាពលរដ្ឋដែលធ្លាប់ឆ្លងកាត់ការលំបាក។ ឯកឧត្តមបានលើកទឹកចិត្តឱ្យបងប្អូនបន្តរក្សាក្តីសង្ឃឹម និងចូលរួមជាមួយរាជរដ្ឋាភិបាលក្នុងការកសាងសហគមន៍ឱ្យកាន់តែរីកចម្រើន។
បន្ទាប់ពីកិច្ចសំណេះសំណាល ឯកឧត្តមឧបនាយករដ្ឋមន្ត្រី បានចូលរួមលេងល្បែងប្រជាប្រិយខ្មែរ និងរាំលេងកម្សាន្តយ៉ាងស្និទ្ធស្នាលជាមួយបងប្អូនភៀសសឹក និងយុវជន ស.ស.យ.ក. យ៉ាងកក់ក្តៅបំផុត។ សកម្មភាពនេះបានបង្កើតនូវរូបភាពដ៏រំភើប និងសបញ្ជាក់ពីសាមគ្គីភាពខ្មែរតែមួយ មិនមានការរើសអើង។
ជាមួយគ្នានោះ ឯកឧត្តមឧបនាយករដ្ឋមន្ត្រីក៏បានផ្តល់ជូននូវអំណោយជាគ្រឿងឧបភោគបរិភោគ និងថវិកាមួយចំនួន ដើម្បីជួយសម្រួលដល់ជីវភាពបងប្អូនក្នុងឱកាសបុណ្យចូលឆ្នាំថ្មីដែលនឹងឈានចូលមកដល់ក្នុងពេលឆាប់ៗខាងមុខនេះផងដែរ។
ពិធីនេះមិនត្រឹមតែជាការអបអរសាទរពិធីបុណ្យប្រពៃណីជាតិប៉ុណ្ណោះទេ ប៉ុន្តែគឺជាការបង្ហាញពីមនោសញ្ចេតនាដ៏ជ្រាលជ្រៅរបស់ថ្នាក់ដឹកនាំចំពោះពលរដ្ឋដែលងាយរងគ្រោះ និងជាការរំលឹកដល់តម្លៃនៃការរួបរួមជាតិក្រោមម្លប់នៃសន្តិភាព៕
