សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានថ្លែងសារទៅកាន់ក្រុមប្រឆាំង ដែលតែងជំរុញឱ្យរាជរដ្ឋាភិបាលប្រើកម្លាំងវាយយកដីពីថៃ និងប្រាប់ឱ្យមើលព្រៃទាំងមូល កុំមើលឈើមួយដើម។
សម្រាប់សម្តេចតេជោ ការប្រើកម្លាំងវាយយកដីពីថៃ គឺជាការបរាជ័យខាងផ្នែកនយោបាយ និងការទូតចំពោះមុខអន្តរជាតិ មិនថាប្រទេសតូច ឬប្រទេសធំនោះទេ។ សម្តេចតេជោ បានថ្លែងបន្តថា បន្ថែមពីលើនោះ បើមានការផ្ទុះអាវុធ កងទ័ព និងប្រជាជននឹងត្រូវស្លាប់ និងរងរបួស ហើយនឹងបង្កការលំបាកជាច្រើនដល់ប្រជាពលរដ្ឋ។
សម្តេចតេជោ ហ៊ុន សែន បានថ្លែងបែបនេះ នៅព្រឹកថ្ងៃអង្គារ ទី៩ ខែមិថុនា ឆ្នាំ២០២៦ ក្នុងឱកាសអញ្ជើញសំណេះសំណាល និងចែកអំណោយជូនជនភៀសសឹក ៣ ៣១៨នាក់ កំពុងស្នាក់នៅមជ្ឈមណ្ឌលជនភៀសសឹកនៅភូមិ-ឃុំស្លក្រាម ស្រុកស្វាយចេក ខេត្តបន្ទាយមានជ័យ។
សម្តេចតេជោ ហ៊ុន សែន បានបញ្ជាក់ថា «ពួកជ្រុលនិយមខ្មែរមួយចំនួននៅក្រៅប្រទេស ចង់ណាស់ឲ្យយើងប្រើប្រាស់កម្លាំងវាយយកមកវិញ ទីតាំងដែលគេកាន់កាប់។ តែខ្ញុំសូមសួរបងប្អូននៅទីនេះ តើចង់មានសង្គ្រាមសាជាថ្មីឬអត់? ខ្ញុំជាអតីតទាហានតាំងពីអាយុ ១៨ឆ្នាំ រហូតមកដល់ពេលនេះ ខ្ញុំនៅតែជាតួអង្គម្នាក់ ក្នុងចំណោមតួអង្គដែលមានឥទ្ធិពលលើកម្លាំងប្រដាប់អាវុធ ក៏ប៉ុន្តែរឿងនេះយើងត្រូវឃើញឲ្យច្បាស់ជាមុន។ តើយើងត្រូវយកតាមការញុះញង់តាមពួកក្រៅប្រទេសទេ? ឥលូវខ្ញុំបញ្ជាក់ ហេតុអ្វីបានជាយើងមិនប្រើប្រាស់កម្លាំង ដើម្បីនឹងវាយកាន់កាប់? ខ្ញុំសូមអានសេចក្តីថ្លែងការណ៍បទឈប់បាញ់ កាលពីថ្ងៃទី២៧»។
សូមជម្រាបថា ថៃបានឈ្លានពានកម្ពុជាចំនួន ២លើក នៅឆ្នាំ២០២៥ រួមមាន៖ លើកទី១ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ដោយយោធាថៃបានបើកការវាយប្រហារមុនមកលើកងទ័ពកម្ពុជាដែលឈរជើងនៅតំបន់ប្រាសាទតាមាន់ធំ និងលើកទី២ ចាប់ពីថ្ងៃទី៧ ដល់ថ្ងៃទី២៨ ខែធ្នូ ឆ្នាំ២០២៥ ដោយសារថៃបានរំលោភលើកិច្ចព្រមព្រៀងសន្តិភាព (ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥) ដោយបានបើកការវាយប្រហារទ្រង់ទ្រាយធំជាថ្មី ដោយចោទថា កម្ពុជាបានបាញ់ចូលដីថៃមុន៕
