ខេត្តកំពង់ធំ៖ នៅថ្ងៃទី២២ ខែវិច្ឆិកា ឆ្នាំ២០១៧ ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្ត កំពង់ធំ បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ធំ នៅក្រុងស្ទឹងសែន។ វេទិកានេះផ្តោតសំខាន់លើប្រធានបទ៖ សេវាសាធារណៈ ភូមិ-ឃុំមានសុវត្ថិភាព ការគ្រប់គ្រងសំណល់រឹងរាវ ក្នុងក្រុង សណ្តាប់ធ្នាប់សាធារណៈទីប្រជុំជន ការអភិវឌ្ឍហេដ្ឋារចនាសម្ព័ន្ធនៅមូលដ្ឋាន ការបង់ពន្ធលើអចលនទ្រព្យ ។
ឯកឧត្តម ឈុន ឈន់ មានប្រសាសន៍ថា វេទិកានេះបានលើកកម្ពស់ គណនេយ្យភាព តម្លាភាព ផ្តល់ជូនប្រជាពលរដ្ឋដែលបានចូលរួម ដើម្បីធ្វើការផ្លាស់ប្តូរយោបល់ បទពិសោធន៍ និងពិភាក្សាគ្នា ដោយលើកឡើង នូវសំណួរ សំណូមពរ ឬមតិយោបល់ផ្ទាល់ខ្លួន ដាក់ជូនមន្ត្រីជំនាញ ដើម្បីធ្វើការឆ្លើយបំភ្លឺនូវរាល់បញ្ហាដែលបងប្អូនប្រជាពលរដ្ឋបានជួបប្រទះកន្លងមក។ ម្យ៉ាងវិញទៀតសូមឱ្យអាជ្ញាធរក្រុង- ស្រុកទាំងអស់ ត្រូវខិតខំបម្រើសេវាសាធារណៈជូនប្រជាពលរដ្ឋឱ្យកាន់តែប្រសើរឡើង។
បន្ទាប់ពីប្រជាពលរដ្ឋបានលើកជាសំណួរ និងសំណូមពរជាច្រើនរួចមក មន្ត្រីជំនាញតាមមន្ទីរ អង្គភាពពាក់ព័ន្ធ បានធ្វើការឆ្លើយបំភ្លឺ នូវបញ្ហាមួយចំនួន និងផ្តល់នូវមតិយោបល់ ជូនដល់ម្ចាស់សំណួរ ក៏ដូចជាប្រជាពលរដ្ឋ។
ឯកឧត្តម សុខ លូ បានកោតសរសើរដល់មន្ត្រីជំនាញ ដែលបានខិតខំបំពេញការងារនៅតាមមន្ទីរ អង្គភាពជំនាញកន្លងមក ក្នុងនោះឯកឧត្តមអភិបាលខេត្តបានជំរុញដល់មន្ត្រីជំនាញទាំងអស់ត្រូវខិតខំធ្វើការងារទៅតាមតួនាទី និងភារកិច្ចរបស់ខ្លួន ក្នុងការបម្រើសេវាសាធារណៈជូនប្រជាពលរដ្ឋឱ្យកាន់តែប្រសើរឡើង។
ជាមួយគ្នានេះដែរ ឯកឧត្តមបានជំរុញដល់អាជ្ញាធរក្រុង-ស្រុកទាំងអស់ក្នុងខេត្ត ត្រូវលុបបំបាត់រាល់សកម្មភាពសំណង់ខុសច្បាប់ ដែលកន្លងមកតែងតែបណ្តែតបណ្តោយឱ្យប្រជាពលរដ្ឋមួយចំនួនសាងសង់សំណង់ដោយមិនបានសុំច្បាប់ និង រំលោភយកដីសាធារណៈជាដើម។ ចំពោះការបញ្ហា ភូមិ-ឃុំមានសុវត្ថិភាព ការគ្រប់គ្រងសំណល់រឹងរាវក្នុងក្រុង សណ្តាប់ធ្នាប់សាធារណៈទីប្រជុំជន ការអភិវឌ្ឍហេដ្ឋារចនាសម្ព័ន្ធនៅមូលដ្ឋាន ការបង់ពន្ធលើអចលនទ្រព្យ គឺជាការទទួលខុសត្រូវខ្ពស់របស់អាជ្ញាធរក្រុង-ស្រុកគ្រប់លំដាប់ថ្នាក់ ត្រូវមានការសាម គ្គីភាព ឯកភាពផ្ទៃក្នុង ត្រូវមានវិធានការយ៉ាងហ្មត់ចត់ ជាពិសេសត្រូវដោះស្រាយរាល់បញ្ហា និងសំណូមពររបស់ប្រជាពលរដ្ឋដែល កើតមានឡើងនៅក្នុងមូលដ្ឋាន ដោយមិនចាំបាច់មានការសំណូមពរពីប្រជាពលរដ្ឋឡើយ។
ឯកឧត្តមអភិបាលខេត្តបានបន្តថា ម្យ៉ាងវិញទៀតខេត្តកំពង់ធំ បាននិងកំពុងទាក់ទាញភ្ញៀវទេសចរជាតិ អន្តរជាតិ ចូលមកទស្សនារមណីយដ្ឋាននានា ជាពិសេស រមណីយដ្ឋានប្រាសាទសំបូរព្រៃគុក មានការកើនឡើង។ ទន្ទឹមនោះដែរសម្រាប់ក្រុងស្ទឹងសែន អាជ្ញាធរខេត្តកំពុងតែគិតគូរពីសោភ័ណភាពក្រុង នឹងធ្វើការកែលម្អផ្ទះនៅតាមដងផ្លូវជាតិលេខ៦ ក្នុងក្រុងស្ទឹងសែន ត្រូវលាបពណ៌ឱ្យមានលក្ខណៈដូចគ្នា ពង្រីកសួនច្បារកុមារ និងកន្លែងផ្សេងៗទៀត ឱ្យមានទីធ្លាធំទូលាយ ដើម្បីឱ្យមានផាសុខភាពល្អ ជាពិសេសមានភាពងាយស្រួលដល់បងប្អូនដែលមកហាត់ប្រាណនៅតាមទីសាធារណៈ និងជាកន្លែងសម្រាប់ដើរកម្សាន្តលម្ហែកាយផងដែរ៕
