ថ្ងៃទី១១ ខែកញ្ញា ឆ្នាំ២០២៦ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច បានអញ្ជើញដឹកនាំកិច្ចប្រជុំ ដើម្បីពិនិត្យ និងពិភាក្សាវឌ្ឍនភាពនៃការរៀបចំវិធាន និងនីតិវិធី ដោះស្រាយបណ្តឹងតវ៉ា និងបណ្តឹងបរិហារ ដោយមានការចូលរួមពីថ្នាក់ដឹកនាំ និងមន្ត្រីពាក់ព័ន្ធ នៅទីស្ដីការក្រសួង។ ក្នុងឱកាសនោះ ថ្នាក់ដឹកនាំ បានធ្វើបទបង្ហាញលម្អិតអំពីវឌ្ឍនភាពនៃការរៀបចំ ព្រមទាំងបានផ្ដល់មតិ និងធាតុចូលសំខាន់ៗ ដើម្បីបំពេញបន្ថែមលើការរៀបចំវិធាន និងនីតិវិធីនេះ ឱ្យកាន់តែមានភាពស៊ីជម្រៅ គ្រប់ជ្រុងជ្រោយ និងមានប្រសិទ្ធភាពខ្ពស់ក្នុងការអនុវត្ត។
ឯកឧត្តមរដ្ឋមន្ត្រី បានថ្លែងអំណរគុណចំពោះការខិតខំប្រឹងប្រែងរបស់ថ្នាក់ដឹកនាំ និងមន្ត្រីពាក់ព័ន្ធទាំងអស់ ព្រមទាំងបានផ្ដល់នូវអនុសាសន៍ណែនាំឱ្យបន្តពិនិត្យ និងកែសម្រួលខ្លឹមសារនៃវិធាន និងនីតិវិធីនេះឱ្យបានគ្រប់ជ្រុងជ្រោយ ព្រមទាំងពន្លឿនការរៀបចំឱ្យបានឆាប់រហ័សនិងពេញលេញ ដើម្បីធានាបាននូវភាពច្បាស់លាស់ តម្លាភាព និងឆ្លើយតបបានយ៉ាងទាន់ពេលវេលាក្នុងការអនុវត្តការងារដោះស្រាយបណ្តឹងឱ្យកាន់តែមានប្រសិទ្ធភាពខ្ពស់។
