ខេត្តកំពង់ធំ៖ នៅរសៀលថ្ងៃទី២៩ ខែវិច្ឆិកា ឆ្នាំ២០១៧ រដ្ឋបាល ខេត្តកំពង់ធំបានរៀបចំកិច្ចប្រជុំបូកសរុបលទ្ធផលនៃការចាត់តាំងអនុវត្តន៍គោលនយោបាយ “ភូមិ ឃុំមានសុវត្តិភាព” រយៈពេល ៩ខែ ឆ្នាំ២០១៧ និងទិសដៅអនុវត្តន៍បន្តសម្រាប់ រយៈពេល ៩ខែ ឆ្នាំ២០១៨ក្រោមអធិបតីភាព ឯកឧត្តម ឡុង ផល អនុរដ្ឋលេខាធិការក្រសួងមហាផ្ទៃ ឯកឧត្តម ឈុន ឈន់ ប្រធានក្រុម ប្រឹក្សាខេត្ត និងឯកឧត្តម សុខ លូ អភិបាលខេត្តកំពង់ធំ ដោយមានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត លោក លោកស្រីប្រធានអង្គភាពមន្ទី កងកម្លាំង ប្រដាប់អាវុធ អភិបាល អភិបាលរងក្រុង ស្រុក ប្រមាណជាង ៣០០នាក់។
លោកឧត្តមសេនីយ៍ត្រី អ៊ុក កុសល ស្នងការនគរបាលខេត្ត បានធ្វើរបាយការណ៍ថារយៈពេល ៩ខែ ក្នុងឆ្នាំ២០១៧នេះ បទល្មើសព្រហ្មទណ្ឌកើតឡើងចំនួន ៥៩លើ៥៤ករណីប្រៀបធៀបរយៈពេល ៩ខែ ឆ្នាំ២០១៦ កើនឡើង ៥ករណី ស្មើនឹង ៩ភាគរយ កើតឡើងលើ ៤១លើ៨១ ឃុំ-សង្កាត់ បណ្តាលឱ្យមនុស្សស្លាប់០៤នាក់ របួស ៣៤នាក់ រងគ្រោះ ចំនួន ០៤នាក់ បាត់ម៉ូតូចំនួន ១៤គ្រឿង និងទ្រព្យសម្បត្តិមួយចំនួនទៀត។
ឯកឧត្តម សុខ លូ មានប្រសាសន៍ថា ដោយមានការយកចិត្តទុកដាក់ពីសំណាក់រាជរដ្ឋាភិបាល ជាមួយសភាពការណ៍ វិវត្តន៍នៃស្ថានភាពសង្គមបច្ចុប្បន្ន ដែលត្រូវបានដាក់ជាសកម្ម ភាពស្នូលនៃចលនាការពាសន្តិសុខ សណ្តាប់ធ្នាប់ ដោយឆ្លងកាត់សកម្មភាពការងារ និងចាត់តាំងអនុវត្តន៍ បាននាំមកនូវភាពជោគជ័យ និងប្រសិទ្ធភាពការអនុវត្តគោលនយោបាយ ភូមិ ឃុំ មានសុវត្ថិភាព កើតចេញពីការខិតខំប្រឹងប្រែងរបស់យើងទាំងអស់គ្នា។ ត្រូវបន្តពង្រឹងអនុវត្តន៍ការងារទ្វេដងដើម្បីថែរក្សា ការពារសុខ សុវត្ថិភាពជូនប្រជាពលរដ្ឋ ត្រូវធ្វើការផ្សព្វផ្សាយឱ្យត្រូវចំណុច ចំគោលដៅដើម្បីទទួលបានចំណាត់ថ្នាក់ល្អ។
ឯកឧត្តម ឡុង ផល បានថ្លែងអំណរគុណដល់អភិបាលខេត្តកំពង់ធំ និងកងកម្លំាងទាំង អស់ ដែលមានសាមគ្គីភាព ឯកភាពផ្ទៃក្នុងបានល្អ ក្នុងការថែរក្សាការពារសុខសន្តិភាពបានល្អ និងធ្វើការផ្សព្វផ្សាយអប់រំដល់ប្រជាពលរដ្ឋឱ្យបានយល់ ដូចជាច្បាប់ចរាចរណ៍ផ្លូវគោក និងគ្រឿងញៀន គ្រឿងស្រវឹង នៅតាមភូមិ វត្តអារាម សាលារៀន ទីប្រជុំជនពេលមានពិធីបុណ្យទាន ឬ ពិធីរៀបអាពាហ៍ពិពាហ៍ និងពិធីផ្សេងៗទៀតដែលចាក់ធុងបាស់ រាំលេងកម្សាន្ត ត្រូវធ្វើដូចភ្លៀងរលឹម។
ឯកឧត្តមអនុរដ្ឋលេខាធិការបានបន្ថែមទៀតថា សូមកងកម្លាំងសមត្ថកិច្ចទំាងអស់ មិន ត្រូវយកតួនាទីរបស់ខ្លួនទៅប្រព្រឹត្តនូវបទល្មើសផ្សេងៗ ដែលនាំឱ្យប៉ះពាល់ដល់ការរស់នៅរបស់ប្រជាពលរដ្ឋនិងធ្វើឱ្យពួកមិនសប្បាយចិត្ត។ ចំពោះការដាក់ប៉ុស្តិ៍ត្រួតពិនិត្យចរាចរណ៍ត្រូវអនុវត្តន៍ឱ្យមានប្រសិទ្ធភាព ចំគោលដៅ និងផ្សាភ្ជាប់សាមគ្គីភាពជាមួយសហគមន៍ ត្រូវបង្កើនការប្រមូលផ្តុំដឹកនាំមូលដ្ឋានឱ្យចូលរួមសកម្មក្នុងការថែទាំរក្សាសន្តិសុខ សណ្តាប់ធ្នាប់សាធារណៈ ព្រមទាំងខិតខំដោះស្រាយនូវរាល់សំណូម ពរដែលប្រជាពលរដ្ឋបានលើកឡើង ឱ្យបានទាន់ពេលវេលាប្រកបដោយស្មារតីទទួលខុសត្រូវ ៕
