ថ្នាក់ដឹកនាំខេត្តស្ទឹងត្រែង មន្ត្រីរាជការ និងប្រជាពុទ្ធបរិស័ទយ៉ាងច្រើនកុះករ នៅថ្ងៃទី២៧ ខែកញ្ញា ឆ្នាំ២០២៦ បានជួបជុំគ្នាតាមប្រពៃណីព្រះពុទ្ធសាសនា ក្នុងឱកាសកាន់បិណ្ឌវេនទី១ នៃពិធីបុណ្យកាន់បិណ្ឌ និងភ្ជុំបិណ្ឌ នៅវត្តស្រះកែវមុនីវណ្ណ (ហៅវត្តលើ) ស្ថិតក្នុងក្រុងស្ទឹងត្រែង ខេត្តស្ទឹងត្រែង។
ពិធីបុណ្យប្រពៃណីដ៏ថ្លៃថ្លានេះ ត្រូវបានប្រារព្ធឡើងដើម្បីរាប់បាត្រ វេរភត្ត បង្សុកូល និងឧទ្ទិសមហាកុសលជូនដល់បុព្វការីជន គ្រូឧបជ្ឈាយាចារ្យ និងយុទ្ធជនពលីដែលបានលះបង់ជីវិតដើម្បីជាតិមាតុភូមិ។ ពិធីនេះបានប្រព្រឹត្តទៅក្រោមវត្តមានចូលរួមយ៉ាងខ្ពង់ខ្ពស់ពី ឯកឧត្តម ផៃ ប៊ុនឈឿន រដ្ឋមន្ត្រីប្រតិភូអមនាយករដ្ឋមន្ត្រី ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង ព្រមទាំងថ្នាក់ដឹកនាំ មន្ត្រីរាជការ និងប្រជាពលរដ្ឋពុទ្ធបរិស័ទយ៉ាងច្រើនកុះករ។
នៅក្នុងឱកាសនោះ ថ្នាក់ដឹកនាំ និងពុទ្ធបរិស័ទទាំងអស់ បានរួមសាមគ្គីគ្នារៀបចំចង្ហាន់ បច្ច័យ និងគ្រឿងឧបភោគបរិភោគផ្សេងៗ វេរប្រគេនជូនព្រះសង្ឃដែលគង់ចាំវស្សាអស់ត្រីមាស ក្នុងវត្តស្រះកែវមុនីវណ្ណ។ បន្ទាប់មក ពិធីសូត្រមន្ត បង្សុកូល និងរាប់បាត្រ ត្រូវបានប្រារព្ធឡើងយ៉ាងមហោឡារិក ស្របតាមក្បួនខ្នាតប្រពៃណីព្រះពុទ្ធសាសនា ដើម្បីឧទ្ទិសនូវផលានិសង្ស មហាកុសល ជូនចំពោះវិញ្ញាណក្ខន្ធបុព្វការីជន និងយុទ្ធជនពលី។
ពិធីបុណ្យកាន់បិណ្ឌ និងភ្ជុំបិណ្ឌ ជាពិធីបុណ្យប្រពៃណីជាតិដ៏ធំមួយរបស់ខ្មែរ ដែលត្រូវបានប្រារព្ធឡើងជារៀងរាល់ឆ្នាំ ចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ ការជួបជុំធ្វើបុណ្យនៅវេនទី១នេះ មិនត្រឹមតែជាការថែរក្សា និងលើកស្ទួយវប្បធម៌ ប្រពៃណីជាតិ និងព្រះពុទ្ធសាសនាប៉ុណ្ណោះទេ ប៉ុន្តែថែមទាំងជាឱកាសស្ដែងចេញនូវកតញ្ញូកតវេទិតាធម៌ដ៏ជ្រាលជ្រៅ និងជាការបង្ហាញពីស្មារតីសាមគ្គីភាពយ៉ាងរឹងមាំរវាងអាជ្ញាធរដែនដី មន្ត្រីរាជការ និងប្រជាពលរដ្ឋនៅក្នុងខេត្តស្ទឹងត្រែងទាំងមូលផងដែរ៕
